RE-UNION KAN HMANG E

Kum 70 dawn a lo ni reng tawh a lawm le, Kum 1956 Kuma Lunglei Govt High Sikul Pawl 10 (sawm) zir naupang 33 zinga la dam awmchhun mi 12 te chuan, Dt 15.3.24 khan Pu Bualhranga in thar, Dawrpui Bungkawnah Re-Union hlimawm tak kan hmang a, kan Siniar in Kum 87 chunglam kan ni deuh vek tawh. Programme mumal tak buatsaihin nilengin kan inpawlkhawm a. Kawppuiten min ṭawiawm a, remchang lote chu an tu leh faten an rawn ṭawiawm a ni.

Kan zavaiin hun thawl tak hnuaiah (Sharing) hun kan hmang a, kan Head Master C. Ṭhuamluaia leh kan Class Master JK Kenglawta te hoa kan pawl thlalakte kan thlirho a, kan Class Room-a kan ṭhutho dan leh kan ninhlei theih ṭhinziate kan sawi a. Siamveli'n, Bualhranga leh Saptawnaten an fiam nasat ṭhin thu sawiin ṭhiante angin ka hleitling ve si lo nen, min chawi sawn sek ṭhin a'n tih phei chuan, Buala te chhuat laiah Denghnuna'n i la rit viau lo maw? tia an fiam leh te chu, kan hlimpui teh asin. C Thanchungnunga'n Lunglei aṭanga Sharing Short Message of Sweet Memories; a fanu, Mawitei kaltlanga a rawn thawnte kan chhiar chhuak a, lung a leng tlang a ni ang, kan hrut kim bawk a, sawi ṭha hlei thei lo, hnukulh ṭeuhin kan sawi hlawm a.

Kan zinga tel ve ta lo Dr Thansiama nupui, Zuali leh Lallunghnema IRS nupui, Tluangtei te lo tel vein min tihlimin hmun khawhar leh mi rama khawhar taka an awm laia an paten an sawi zin tak, Lunglei kan Class Room leh kan Farewell thute an sawi a, kan hming an lam fo ṭhin an ṭhiante min han hmu an lawm thu leh an lung a len thu an sawi a. Kan nute ho leh kan tu leh fate'n ngaihnawm tiin khawi mah tawlhsawn loin an awm a, an Pi leh Pute message te an sawi ve nghe nghe a ni.

Kan Re-Union hlawhtlinna Pakhat chu maw! Keiniho chhiatni ṭhatni pawha chhuak ngai tawh lo, mahni ina mut leh ṭhut inchhawka awm nileng mai mai tawh ṭhinte pawh khan, hemi ni hi chuan harsatna awm loin nilengin hlim takin kan inpawlkhawm a, Bualhranga te nupain an Testemony ngaihnawm tak an sawi a, a tawpa an pain Hla saa a'n Solo zui phei chu a ropuiin a hlimawm a, kan vaiin kan lam lo chauh a ni.

Tlaiah hlim takin Zanriah chaw kan kilho a, chak lo leh theih thawh loa inngai kha rinai daihin kan lo la chak a, kan chaw lak pawh a la ziaawm e. Hrisel, chakna leh damna te hi ni tin tuk zana kan damdawi ei ṭhin chauh hi a lo ni lo, kan rilru leh ngaihtuahnate hi a lo ni. Hetianga ṭhian zahoa hlim tak maia kan inpawlho fote hi a lo va ṭha em! Kan ti. Hun remchang hmasa berah Programme buatsaih leh ngei ni se, te zuk la ti hlawm a.

Hetiang deuh hian, Agriculture, Horti leh Irrigation Officer Pension ho hian MAHIOPEN tiin nghet takin pawl an din a, Constitution mumal tak neiin Registration thlap a ni a, pawl thil tum leh hmalakna kawng engto tham a awm lo. Kum eng emaw chen lo thawkho ṭhin, pension hnua tlatna mual a lo danin, kan inhre zui ta lo mai ṭhin hi awm loin, membership fee pein kan lut zel a. Designation-in min tibuai lo a, member chak lo deuh leh damlote inṭanpuiin, hruaituten member eng emaw zatte nen khawhar loin an kan kual ṭhin. Kal hmasa apiang kan inral a, nupui zun thlengin kan inral ṭhin.

A hlimawm ber chu, kum tin intawhkhawmna hun February thla hian kan nei ziah ṭhin a, ruai hlimawm taka buatsaih ṭhin a ni. Zoram hmun hrang hranga Agriculture leh Horti hmalaknate tlawhin Field Visit kan nei ṭhin a. Service hun laia kan dulhnu han fan lehna hun thawl tak neih ṭhinte hi a hlimawmin a zawngchhangthlak tak zet zet a. Hei hian Pensioner te min tuai tharin, min tichak sauh ṭhin. Heng kan kalphungte hian MUP, Pensioner leh kawng danga kan activities te min tibuai lo va, kan service hun lai ai mahin kan Pension hnu rei fe thlengin, he MAHIOPEN – kan pawl hian min pawtkhawm hnaiin, kan hlim ṭhin khawp a ni.

- Lalhmangaiha Sailo

Holy Cross Bakery

9436360275