Vawiin 'Ni' Hi Aw

Kei, pian leh murna aṭang reng pawha ṭawng thiam tura ngaih ni hauh lo ber hian han ziak ve leh ngawt ila. Ṭawng lama kan mi ril leh mi thiam, chhuanvawr hote cho nan pawh a ni ang chu.

Tuna ka han sawi tur hi chu ziaka kan dah ni lovin, ṭawngka ngeia kan sawi, kan hman uar em em, dik si lo hi a ni. Chutianga kan ṭawng hman dik lo fo chu, 'Vawiin Ni' kan tih ṭhin hi a ni. Vawiin 'ni' tih hi kan hmang tlanglawn ta lutuk deuh va, ṭum khat chu kei ngei pawhin ka hmang a, "Vawiin ni," ka tih ve tak chu. Ka ti zui nghe nghe a, hetia kan ti zel a nih chuan a dik emaw tih vang kher lo pawhin, tih leh hun pawh a la awm mai thei.

Vawiin 'Ni' tih hmang ṭhintute hi mi nep lo tak tak deuh vek kan ni awm e. Kan Pastor te leh Upa, Evangelist ten Pulpit leh Kohhran prog-a thu ṭha tak tak an sawinaah, "Vawiin Ni," an ti a. Kan Politician ten an ti bawk a, Sawrkar, kohhran, pawl anga hun serh hmannaah te, chhiat leh ṭhat ni prog–Mitthi vuina, inneihna etc. zawng zawngah ti tawh mai ang, "Vawiin Ni," kan ti ta deuh vek a ni ber. Pu Lalmanzuala IAS Officer Rtd in, Mizoram hi Corruption kai rualna ber a tih ang deuhin, "Vawiin Ni" tih ṭawngkam pawh hi kan hmang rual tlang khawp mai.

Vawiin chu 'Vawiin' a ni mai a, chutiang bawkin Nimin lam te, naktukte pawh a ni leh mai. Nimin sawi nan tu mahin Nimin 'Ni' kan ti lova, naktuk kan sawi pawhin, Naktuk 'Ni' kan ti kher lo. Eng vanga mi zawng zawng deuh thawin, Vawiin tih mai duh tawk lo va, Ni tih belh kher ngaia kan hriat aw? School leh College-a Zirtirtute lahin, tih zel tur an tih a rinawm bawk si loh. Ram hnuk khawih leh hmasawnna lam thil chu ni hauh lo mah se la, Vawiin kan tih rual a, kim lo ni chuang si lo, 'Ni' belh talh hi chu sim tlan tum ila, a ṭha hle ang.

Mizoram hi a zau lo viau nain, awmna hmun azira ṭawng hman dan kal hmang inang lo (regional variation) erawh kan nei nual mai thei, chutiangin thil hmingte pawh. Kohhran pawl hrang kan nih anga kan hming (term hman) inang lote a awm a, TKP, KTP, PYD, SAY tih te hi chu (Denominational variation) a ni a, kan inhriatpui vek mai. Chutih laia mi zawng zawng deuh thawin kan hman fuh lo, Vawiin Ni tih hi chu bansan tum ila, a ṭha ngawt ang.

Kan Pastor te, Kohhran Upa te, Politician te, vantlang zinga mi pawimawh, hun hmang ṭhin te, kohhran leh pawl hruaitute chuan, 'Ni' ti tel lovin, Vawiin tih hram hram tum ṭheuh ila...

- Rev Biaka Chinzah