KAWL A PHê, TEK A TLA (Lalpa kan lawm e)

Kawlah kawl a rawn phe ziau ziau a, chik taka lo hmutu kan tam lo, khua a hniam ta hle mai. Ruah a rawn hnai ta a, a mal a hraw riau mai. Ring takin, leilung nghawr khawp hialin khawpui riin min tizam ta em em mai a, a rawn phe zuai zuai a, beng kan hup a, kan khûr lo thei ta lo.

Van sang boruakah khian oxygen, nitrogen, hydrogen leh adangte an cheng za a, an inhaw lo va, an inpawh viau hek lo. An leng dial dial a. Thli a lo tleh a, chhum a lo let but but a, inhip emaw, innek per thei tura ngaih loh ho positive leh negative ho (van boruaka lengza dial dialho) kha an intawk sir ta mai a e. An thawm chu na tak a ni, an ri nghal ṭhuai ṭhuaia, an ri dum dum a, an ṭek chhuai chhuai a, thui tak tak an inum a, ti mai ang. Oxygen leh nitrogen leh eng eng emaw ni ho kha an inbelhbawm a, nitric oxide emaw ni, ka chiang tawh lo, an siam a, ruahin lei lamah a rawn surpui a, kan leilung hmun tina ammonia lo awmsa keuh keuh kha a zuk fin ta a, Ammonium Nitrate a lo piang ta a nih chu. A va ropui tak em. Lei ṭha em em chu pekin kan awm ta!

Ramngaw, lui kam leh tlang rama thei leh thlai, kan enkawl vang pawh ni lova lo hring ve hliah hliah thing leh maute, chuktuah huan, organic huan tiamin, lei ṭha pekin an awm ta, a va hlu tak em. Pathian rorel dan hi a va mak em !

Chutichuan, tlangte hi nghing dur dur khawpin khawpui ri lo hnai se la, kawlkil tawn tawnah ṭek tla ziai ziaiin, ri thum dum dum ṭhin mah se la, malsawmna a lo nih chu maw le!

NB: Chemical hming ho khi a dik famkim lo mai thei a, ammonium nitrate to zia chu kan hria a, man lova min pe fotu sound and light hi i hlau over tawh lo vang u.

- Dr PC Lalramenga, MD