Ngaihthlâk tùrin lehkha ka ziak lo!

Kei hi ka chapo a, ka uang fo bawk. Sim harsa ka tih ber pawh a ni. Mi chuan an chanchin ngaihnawm an sawi cháng hian, “Kei chu…” tih te leh, “Ka/kan…” tihte hi an hma chhuan fo lo. Kei chu … ka thei ve lo fo!

Ṭum khat chu — dàwr kan siam ve laiin — kan dàwr bang chei nán tiin mi làrho thu sawi leh thu fing an chhâk chhuah hi bang bel (wallpaper) atán ka print-tír a. Chuta ka tàr tum, thusawi pakhat leh a sawitu chuan ka rilru hi an hneh reng mai. Amah chu British zai thiam, ka nau rual fé Adele a ni.

A thu sawia chu, a Zo ṭawngin han dah ve dáwn khanglang ila: “Kei chuan rimawi hi en tùrin ka siam lo a, ngaihthlâk atán ka siam ṭhìn,” tih a ni ber ang chu. (I don’t make music for eyes. I make music for ears”)

Ani chu ka tluk lul lo a — tluk lul lo râpthlâk lutuk khat tawp ta! Ani Adele-i zawng, kum 21 mi a niha khawvêl déng chuak thei, album siama a aw leh a rimawi hmanga khawvêl rún thei kha a ni tawh a. A enga pawh chu ni se, ka nau rual daih mah ni se, entawnna lai erawh ka neih ṭûl vein ka inhria a — a zawh lamtluanga a chian tlatna hi!

Adele ka ngaihsàn chhanna chu a zai thiam piah lamah, a zai chhana a chiannaah hian a ni tlat a. Music video hmanga intih làr chawp leh inpho mawi leh nalh leh inlâk miss khal khat tawp lam a àwn ve lo a! A pian paw’n chutiang lam chu a support lo! Chutiang lam chu a tum lêm lo law law ngam. Stage-a dancer leh light system ropui ber ber nèna 'pár vul chhei chhuai' lam pawh a dáwn ve lo. Mahse, a zai chhan chu, hriatna beng neitu ngaihnawm tih tùr leh, rilru ná leh rilru hlim nei ṭhìn mihringte hriat tùra 'zùn neia zai' a ni mai … chu chu a ni ringawt mai — a tum hlang tak mai chu! A dang, MV viewer neih tam avànga làr leh follower neih tam … tih lam lam a 'aim' ve lo. Mi tam tak chuan ã pawh an ti ang. Ti ve lotu rawn zawng ta se, kei hian ring zetin, “Heta hi ka awm e!” ka ti ang!

Adele-i ang ni pha hauh lo mah ila, a zia hi entawn ka tum ve tlat a. “Eng nge lehkha ka ziah chhan? Ka chhìar sa record-a mite ngaihthlâk atán maw? A teuh lo mai! Ka phal teuh lo! Tisual ngai lo ni lo mah ila, theih tâwpa uluka ka lo beih ve, spelling mistake awm lo tùr leh, ziah zawm tùr leh zawm loh tùr ka lo thliar ve te, uluk taka thlûkna satliah piah lama thlûk àwn leh, thlûk sàn dàn, a sâp ṭawng taka “diacritics” an tih ka lo vawn ve hrãm hrãmna te hi, hmu eih loa YouTube vêla miten an lo ngaithlâk vêl “mai mai” tùr atán zawng, keia kut chhuak, ropui lo lulai lutuk ve tak pawh hi, ka kut chhuak an nih chhúng chuan ka phal hlek lo ang! Leiah pawh min díl se, ka phal chuang lo ang!

Ti an lo awm a nih chuan, ka va rèl phar phâk an ni lul lo e. Sèl chiama va demtu pawh ka ni lo ang — ka ni ngai lo ang! Ka fak lo a, ka sël hek lo. An thil tihah ka inrawlh a ṭûl lo! An chhiar sa lehkhabua an chantír, lehkhabu chhuak ṭha bera an lo thlang a nih paw’n, “Ka tluk loh lehkha ziah thiam an lo chhuak leh ta! A va lawmawm êm,” tia “Halleluiah!” lo pêk mai kha, ka tih tùr ka ni ang.

Mahse, ka sawi leh sawi hnu, mi dang sawi kêp loa ka sawia chu — kei chuan, ka lehkha ziah ve chhun chhunte hi chu, benga ngaihthlâk tùr ni loin, mita chhiar tùrin ka ziak a, ka ziak zêl dáwn. Awlsam taka ka ziah ni lo hi, awlsam taka an lo ngaihthlâk ka phal ve ngai miah lo ang — thu fing leh thu ropui pai lêm lo mah se — ka kut chhuak an ni miau a!

– Zirsangkima