RUIHHLO NGAITE TAN “HALFWAY HOUSE”
(Mizo zingah hian Halfway House hmelhriat tawh hi kan tam lo maithei a. Hnam pui hovin ruihhlo bawiha tang tam tak an chhanchhuahna hmanrua a ni)
HALFWAY HOUSE LO CHHUAH DAN
‘Halfway Home’ tih te paw'n an sawi ṭhin a. Kum zabi 20-na daih tawha an hmuhchhuah niin ruihhlo bawiha tang tawh te, lungin tang chhuak hlimte leh rilrua rualbanlo (vohbik) dah nante an hmang ṭhin a. Tunah erawh chuan ruihhlo bawiha tangho tana duan ‘Halfway House’ hi han thlurbing ta ila.
A ṬANGKAINA
Home (Rehabilitation Centre) leh in chhungkhur boruak inthlau lutuk tur venna hmanrua a ni ber a. Ruihhlo ngai kan tih tam ber te hi chu lo nghei tawh ṭhin emaw, home (rehab) velah pawh lo awm tawh ṭhin an ni fur. Home vela an awm lai chuan chhun zan zawmin vil deuh chawt an ni ṭhin a, pawn lam mi hmu tam lovin Pathian thu nena enkawl pawh an ni fo mai. Amaherawhchu, home an chhuahsan hnu lawkah boruak ngai an hip a, an ṭhian hluite pawl lehin an nun ṭha loah bawk an let leh mai ṭhin.
A KALPHUNG
Daifemah in lian vak lo sain ruihhlo bawiha tang tawh, home aṭanga chhuak hlimho dah nan an hmang a. Sorkar hian a theihna chinah hma a la ṭhin a. Khawtlang, ṭangrual pawl leh mimal angte paw'n sum leh bungrua te an thawhkhawm fo bawk. Halfway House-a an awm chhung hian ruihhlo khawih phal a ni lo va. Tlawhtu pawh bituk chin an nei ṭhin.
Mi thiam bik (Social Worker, Case Worker, Psychiatrist, Counsellor, Psychologist) te an ruai a, an hriselna dinhmun en diksak reng an ni. An mamawh dan azirin taksa enkawlna leh counselling thlengin an dawng bawk. Zan lama chhuah theih chin bituksak an ni a, hnathawh pawh phalsak vek an ni ṭhin. Tin, an mizia leh an hmasawn dante en dik vek niin, hei hian Halfway House-a an awm chin tur a hril fo ṭhin.
MIZORAMAH HIAN HMANG VE TA ILA
Kan ramah hian Halfway House tiha sawi tur hi a la awm mang lo va. Ram changkang zawkte tih dan entawnin, sorkar, pawl emaw mimal angte hian hma han la ila. Halfway House-a awmte pawisa chawi hmangin ‘House’ hi a enkawl theih dawn a, ei zawn nan pawh a hman theih hial awm e. Tin, kan ram dinhmun azirin a kalphung leh enkawl dante pawh a siam rem theih ang.
State danga pawl (Sorkar emaw NGO) te nen pawh inthlunzawmin, mumal leh awmze nei zawkin a kalpui theih ngei dawn a. Hetiang lampanga zirna kalpui mek tan pawh internship tih nan emaw, volunteer leh work certificate dawn nan pawh a hman theih ang. A pawimawh berah chuan ruihhlo kan dona hmanrua ṭha tak a ni dawn a. Kan ramah hian kan chhunzawm zel duh lo a nih pawhin, enchhin atan chuan a iaiawm loh viau ngei ang le.
- Daniel Lalrinfela, Assistant Professor, Department of Social Work, ICFAI University Mizoram