'Han thlir teh u romei zam karah’ tih hla hi

Mizoten khawhar in/mitthiina lengkhawm hla kan sak tam zinga mi leh hla lungkuai tak sak nuam em em, hla lar tak ni bawk chu HAN THLIR TEH U ROMEI ZAM KARAH tih hla a ni. He hla lo pian chhuah dan hi tun ṭum chu thai lang teh ang.

He hla lo pian chhuah chhan ber leh a changtu pa ber ni bawk chu Chhunthanga a ni a. Leng khuaa an awm laiin tleirawl té niin nupui atan Lawngthluaii a nei a. Tleirawl inngaihzawn laia innei an ni bawk a, an induh tawnin an inngai em em a ni. An inhmangaihna tizual turin Lawngthluaii chuan nau paiin, an inneih aṭanga thla kuaah Lawnthluaii chuan thla ruk mi nau pai chungin a thi a ni.

Chhunthanga chuan chutianga a nupuiin a thihsan chu tuar thiam har a ti em em a, a lung leng lutuk chu awm ngaihna a hre lo a ni ber mai. A nupuiin a thihsan a tawrh nat em avangin khawhar in riak an ṭin vek tawh hnuah pawh a ṭhian Lalruala chuan a la riahpui ṭhin a. Zan khat chu mumang mak tak mai a nei a, chu a mumangah chuan Chhunthanga chuan a nupui chu Aizawla Bazar mipui zi nuai nuai karah hmu nawlh hian a inhre tlat a, a zawng ta vak vak mai a, zawng hmu zo lova beidawng taka Rahsi veng lama a kir lai chuan van lam a thlir chho ta a, chu tlang chu thengthaw nuam em em leh mawi em em mai hi a han hmu ta a, chu tlang chung zawl pan theihna tur chuan lung kailawn nalh em em mai hi a han hmu bawk a ni.

Chhunthanga chuan chu lung kailawn awm zui mai chu a zawh chho ta a, a han thlen chhoh chuan tlang chung zawl, phul rai dup leh nawm hmel em em mai hi a han hmu ta a ni. Chumi hmunah chuan a nupui chu a awm ngei ringin a hawi kual vel ruai a, chutia a hawi kual vel lai chuan mihring; a vár veka inthuam mi pariat vel hi hlim hmel leh nuam ti em em hmel hian Cinema-a Slow Motion ang deuh hian an rawn pen rual a, hlim taka zaiin an zinga pakhat chu Chhunthanga chuan a nupui duh tak leh a ngaih em em, mumang thleng pawha a lo zawn ṭhin Lawngthluaii ngei mai chu a ni tih hriain a hmu ta a.

Gate pawn lam aṭang chuan a au vak vak a, Chhunthanga chuan, "Hetah hian maw i lo awm reng, eng ngati nge min hrilh loh, ka zawng ka zawng che a, daileng pawhin ka kalsan ngam lo che a, ka nghak reng che asin," tiin a au ta vak mai a ni. Chutia a nupui a va au zawh chuan anniho chu an inher siau va, an bante vaiin KAN LENG DIAL DIAL LUNGRUAL KIMIN, tih hla hi sa chungin an kalsan leh ta a ni.

Chutia an kal liam ta mai chu Chhunthanga chuan a tuar thiam lo hle mai a, a lung a leng lutuk chu a tlu tawp mai a, lung chhe vankaiin a ṭap ta hawm hawm a, chutia a ṭap chu a ṭhianpa amah riahpuitu Lalruala chuan a lo hria a, "Chhunthang tho rawh, i zahpuiawm em mai. Eng nge i ṭah thlawrh thlawrh," tiin a hau a. A harh chhuah hnu pawh chuan a nupuite hla sak chu a bengah a la cham reng a, tichuan khawvar velah an khuaa hla phuah thiam Saihnuna leh zai thiam, Liantawna te punin a thu leh a hla thluk an siam rem ta a ni. He hla phuahtu chungchangah hian sawi dan hrang hrang awm bawk mah se mimal phuah ni lovin Chhunthanga, Saihnuna, leh Liantawna te phuah a ni.

- George L. Ralte, Vaivakawn