Mizo Dist Council Tu Nge Tibo?

April 24 Vanglaini Issue ah khan Mahmuaka Chhakchhuak khan, "Mizo District Council hriat reng Nan," tih kha a rawn ziak a, a bengvarthlak hle. Kei aia hria an awm nual ang tih ring mah ila, thlemna ka tawk ta tlat mai a, do zo lovin a chunga ka thupui hi ka han ziak ta mai a ni e, kan hotu hlui tute emaw huatthu kan sawi palh em lo ang chu maw.

Kan hriat ang khan kum sawmhnih chhung (1952-1972) Assam hnuaiah Dist Council neiin kan awm a, khatih lai khan kum 1953 aṭangin Assam hnuaiah bawk, Mizoram chhimtawp lamah Pawi-Lakher Regional Council (PL Regional Council) a lo awm ve bawk a. Mizo Dist Council leh PL Regional Council Sawrkar lu ber chu CEM an ni.

India Parliament-in Hmarchhak rama hnam hrang hrangte dinhmun singsak tharna dan a han pass (North Eastern Area Reorganization Act) khan, Mizo Dist Council chu Assam aṭanga la chhuakin UT-ah a dah ta.

Khatianga India hmarchhak ramte singsak a lo nih dawn khan PL Region lam hotute kha an che vat vat a, Delhi-ah chhukin an hmakhua tur an zu sawi a, Pawi leh Lakher aṭanga hotu Member of Regional Council ṭhenkhat te bakah, PL Region a Chakma MRC pakhat a tel ve tlat a ni. A tira an kal chhan kha Mizo Dist Council UT ah hlankai a nih dawn chuan, P L Region hi eng dinhmunah nge kan awm ve dawn? tih sawi turin a ni.

Amaherawhchu, PL Region hotute kha Delhi an thlen khan an phir ta nuaih a nih tak hmel. Lakher ramah Mara Freedom Party a piang a, PL Region hi chu Pawi hoin min awp zel a ni deuh mai, tihna rilru awm reng nen khan Pawi leh Lakher hi hnam hrang daih kan ni, an ti deuh ni awm tak a ni. Chutih laiin Chakma Member pakhat awm chhun khan keini hi hnam hrang ber kan ni, a lo ti ve bawk a. Tichuan PL Region aṭang chuan tuna LADC, MADC leh CADC te hi a lo chhuak ta a ni.

Heta thil mak ang reng tak chu khatih laia kan Mizoram (Azl-a mi ti bik ang) hotute khan chhimlam mite thil ngaihven kha engah mah an ngai lo va, a bik takin, (Chakma Unau ten min lo hrethiam se la) CADC lo piang tel ve ngawt tur kha object-tu an awm lo a ni. Tichuan, Mizoramah CADC a lo pian tak chuan a maka makin an lo pung ti ila, a sual awm lo ve.

Khatia, Mizoramin UT a lo hmuh khan UT ṭhami tih a nih kha! Kan Mizo Politician te khan UT kha an duhtawk mai a, Mizo District Council kha an thlauh ta a ni ber. Khasi & Jaintia Hills ah chuan State puitling Meghalaya tih hming thar hlak a lo pian khan, an Dist Council tihbo a ni lo va, vawiin thlengin Meghalaya chuan ADC an la nei a, Mizo Dist Council erawh chu a bo ta a ni. Tu mawh nge ni ta ber le?

Chakma Automous Dist Council kha, a hun laia kan Mizo Politician-ten an ngaihthah a, thu leh hla an neih hauh loh lai khan Politician ni lo, mak tia ngaihventu pahnih kan nei. Chu'ng mite chu Dr. F. Lianchhinga (L) tuna Baptist Higher Secondary School, Serkawna Teacher leh Pu Tawnluaia (L) Shillong-a Mizo Police Officer Rtd te kha an ni. Ani khan India Dan Thar te tih lehkhabu a ziak a, CADC lo piang ta ngawt a hriat thiam lohzia a ziak a, Dr F. Lianchhinga hian "Pheichham man Chakma te," tih lehkhabu a siam phah bawk a ni.

Aw le, Mizo Dist Council kha History a lo ni ta reng mai, thil bo a awm chuan a tibotu chu tu dang ni lovin, a neitu tih bo a ni ṭhin.

- Rev Biaka Chinzah.