MAICHAM AṬANGIN AW NI ANG!

Tunhnaiah kan Mizo nula pakhatin ‘Krawsa an khen beh kha Isua a ni lo’ tiin a hming ni âwm te a sawina a rawn viral a. Facebook lam leh whatsapp group hrang hrang a luah viau mai. Han ngaihtuah liam puat chuan, ‘Leh mai mai ṭhin a’ han tih liam mai tûr âwm chi nia a lan laiin, ngun deuhva ngaihtuahin thupui hlapuia lak tham, mutmawh hnarmawha neih tham niin a lang ve thei bawk a. A sawitu nula kha mi bright tak, eng eng maw pressure avânga thlamuantu mamawh ve tak, Pathian pawh zawng nasa ve ṭhin a ni mai âwm mang e, tih ngaihtuahnate a lo kal a. ‘Isua a ni lo, Arihabi (?) a nih kha’ tih a sawi laia a nui hmela inthiam lohna rûk awm te, beidawnna leh manganna thûk tak nei hmel lo langte khan rilru a hneh viau mai. Ani kha a chanchin dang erawh kei chuan ka hre lo.

Mi thiam leh mi ril pui pui awmkhawmna whatsapp group ‘Zoram Hmathlir’ ah an rawn dah a. A ṭhenin ‘A ho e mai delete ang’ an ti a, a ṭhenin ‘A pawimawh awm rawh se’ an ti bawk a. Nia, kan darthlalang, kan ram hi eng lam panin nge, khawi lam hawiin nge a kal tih enna ṭha tak a nihna chen a awm ve reng a ni. A thusawi hrim hrim erawh hnial enah kan en lutuk lo tlâng a, hnial chi pawh a ni lemin a lang lo. Hnial dâwn ila keini chuan Tirhkohte thiltih 2:22 &23 “Nangni Israel mite u heng thu hi hre rawh u: Nazaret Isua, Pathianin amah hmangin in zingah thil ropui te, thilmak tak te, chhinchhiahnate a tih khanin a hriat chiantir che u kha; nangni ngeiin chu'ng chu in hre si a. Kha mi kha Pathian rel tlat leh hriat lawk angin an mantir a, nangni’n mi sualte kutin Krawsah in khengbet a, in tihlum ta a,” tih thu leh thu dangte kan chhiar mai ang a. Ani’n Bible pâwn lam thu hmangin min hnial emaw a ni ang a. Sakhaw inang lo lehkhabu hran daih hmanga inhnial a ngaih dawn avangin, sawi fel a harin a rinawm deuh bawk.

Kan sawi kan sawi a, keimahni lam inenna lamah kan lût thûk zel a. Kan ṭhalaite dinhmun te, a mipui mimir Thlarau lam dinhmun kaihhnawihte kan sawi nual a. Pathian awm ring lo (Atheist) kan awm ve nual tâk thu te, kan khawtlang nun hrim hrim a dazât zawnga a kal nasat thu te, eng hi nge a kaikuang ber ni ang a, engtia siam ṭhat chi nge ni ang a, khawi lai aṭanga ṭan ṭûr nge ni ang? tihte chu zawhna lian tak a lo ni ta a ni. Damdawi hman sual lo hluar ta viau mai te leh HIV positivity rate lo sang zel te pawh, suangtuahnaah a lo lût zut zut mai bawk a. Kan lo heti zo ta mai hi eng vang nge ni ang a? Tu mawh nge ni ta ang? tih zawhna chu zawhna chhan hrehawm tak, kan chhân ngei ngei ngai si a lo ni ta a nih hi!

Keiin kha thu ka dawnsawn ve dan tur leh, ka react ve dan turah khan ka chiang khawp mai a. Kan maichâm lam hi ka suangtuahnaah a lo lut nghâl a ni. Petera-ten ‘Zankhuain kan deng a, engmah kan man lo’ an tih ang mai kha kan ni ta em ni ang le? Maichâma rawngbawlna kan ti nasain kan uar tual tual a, kan inkhawmna lah a pung tulh tulh mai bawk a. Tunah phei chuan inkhawm hun pangngai bâkah zing ṭawngṭai inkhawm pawh hi inkhawm tih tham fe a ni tawh. Mahse, Maicham rawngbawlna lamin hma a sâwn zel chuan a leido ‘Sualna’ chu tawm rawk rawk tur nia a lan laiin, a pahnihin a sâng kawp thei tlat mai hi a mak lai chu a ni ta a ni. Thupuan 11:1 ah, “Tho la, Pathian biak in, maicham nen a chhunga betute nen teh rawh,” a tih ang deuhin, nakina tehna hmachhawn tur kan nih avangin tûn aṭanga kan lo inteh ve ṭhin hi chu a ṭul dawn a nih hmel ta e.

Heti hian ka teh kual mai mai a: Office picnic nikhuaa tlai lam no kan dawmpuite tho khan Inrinni zan inkhawmah, pulpit aṭanga Thlarau lam thu min zirtir ṭhin vângtea lo heti ta hi kan ni thei mai ang em le? Office-a sum ziah bo thiam deuh upate kha kan maichama a phusa berte an nih leh mai ṭhin vangte a lo ni palh thei mai ang em aw? Ram hruaitu atânte pawh sum sawi bo thiam te, sawi chhuah thiamte chu kan mi zawn an nih tak mai vangte a ni thei ang em? Kan hmun thianghlimte hi kan lo tibawrhbang viau a ni ta mai awm mang e? tih te thlengin ngaihtuahna a vâk a vâk mai.

Pathian khawngaihna zarah rawngbawltu, Pulpit kai thei pawh kan tam narawh e. Mosia te, Jona te leh Pathian chhiahhlawh dang dangten Lalpa kohna an bihruksan chawn chawn laiin, keini lah hian kan zuam zak hlawm mai si a. Kohhrana nihna leh chanvo changte chu lawmpuina thu kan inthawn chum chum mai a nih hi!

Thupuan 19:8-a kan hmuh danin, Beram no nupui neihnaah chuan puan zai sin fai tak, vâr tak chauh sin an phal dawn a nih hmêl a. Keini ve hian kan lo phal zau lutukte hi a ni thei mai ang em? Kan maichâm rawngbawlnate hi inthei sem lutuk lo deuhin, Pastor-te hian hlawh tlem zawk deuh pawha Tualchhung Kohhran tinte hi ṭhutchilhin, maicham rawngbawlna hi chumi atâna inserh hrangte chauhin khawihte pawh ni ta se la, zing aṭanga zân thlengin tihtakmeuha thawkin, rawngbawl hnate hi urhsun lehzuala thawh a ngai ta tihnaah te pawh ngai thei ila, a ṭhain a rinawm ta tihnate pawh a ni thei ang.

Mi kan inchher dante pawh kan inen chian a ṭul hle awm e. Kohhran establishment atana mi kan zawn chuan a thawh tam thei thei, a thiam thiam, a langsar sar kan thlan mai loh nakah! Mahse, Pathian ram kan zawng a nih chuan a thang mawi apiang te, a dik leh rinawm apiangte kan zawng ve tûr a ni ang. ‘Heng zawng zawngah hian Kohhran hi a kaikuang, a mawhphurtu ber a ni,’ ka ti a ni hran lo va, hawh u, kan ram siam ṭhat hna hi, khua kan tlai lutuk hma hian; maichâm aṭangin i ṭan ang u hmiang, ka ti a ni deuh ber e!

- Rev. Jh. Za Hluna

(Paula Pû)