DONALD TRUMP-A FATE

US President hrulah a fate an rawn lang ṭhin a, chuvangin tun ṭum chu Donald Trump-a fate chanchin tarlang ang.

Trump hian nupui 3 nei tawhin fa 5 a nei tawh a, tu 10 a nei bawk. A fa upa ber hian a kum 42-na a hman mek laiin a naupang ber erawhin  a kum 14-na a hmang mek. A upa lamin sumdawnna leh politics lamah an pa an puih theih tawh laiin a naupang ber erawhin zirna a la chhunzawm mek thung. An upat dan indawtin:- 

DONALD TRUMP JR : Ani hi Donald Trump-a fa upa ber niin model ni ṭhin Ivana nena an fa hmasa ber a ni, a kum 42-na a hmang mek; Don tia hriat a ni. Trump Organization-a Development & Acquisitions-a Executive Vice President ni lai a ni.

Trump-a sumdawnna chi hrang hrang, company 500 zet an telna, $3.6 billion hu hlutna neiah an rinrawl a ni. Trump hian politics a luhchilh avangin a chanvo hrang hrang a kalsan a, Don leh a unaupa Eric bakah chief financial officer Allen Weisselberg te chuan he sumdawnna hi an kalpui.

Donald Trump-a fate zingah chuan Donald Trump Jr hi miziaah pawh a pa chhun bera ngaih a ni. Kum 2005 khan a pa ang thovin nupui atan model Vanessa Haydon a nei a, University of Pennsylvania-ah kalin fa 5 tho a nei ve bawk! Czech nal takin a hmang thei; New York governor a la nih ngei an ring hlawm.

IVANKA TRUMP : Kum 38 mi Ivanka hi Donald Trump leh Ivana te fanu neihchhun a ni. A pa hnung zui zo ber tura ngaih a ni a, mipui hmaa ding tam ber a ni bawk. American sumdawng hlawhtling tia hriat niin a pasal Jared Kushner nen hian fa 3 an nei tawh. A pasal hi US President thurawn petu Senior Adviser a ni mek a, amah pawh hi President special assistant a ni bawk.

A pa hnung zuia US President ni thei tur khawpin theihna a nei a, mipui pawhin US hmeichhe president la ni turin a lakah beiseina sang tak an nei mek.

“Ivanka Trump,”  tiin a hming chawiin thawmhnaw lama sumdawnna a kalpui a, a company hian incheina kaihhnawih chi hrang hrang an siamchhuak. A sumdawnna hi lian hle mah se, White House lama a pa puih hna thawh a ngaih avangin an unauva an kalpui ṭhin Trump Organization leh a hmingchawia a din company-a a nihna te hi a kalsan rih.

Kum 2017 May 2 khan a lehkhabu ziah, 'Women Who Work: Rewriting the Rules for Success,' tih chu a tihchhuak a, mi dangte hnena thurawn lehkhabua tihchhuah ṭha zual New York Times-in an thlanchhuahah 4-na a hauh pha.

ERIC TRUMP : Kum 36 mi Eric Trump hi Ivana leh Donald Trump te fa 3-na niin an fa naupang ber a ni bawk. Trump Organization-ah a u Don nen a hotu an ni a, a pa nen an inngaina fal hle. 

Kum 2006-2016 chhung khan St. Jude’s Children’s Hospital-a cancer natna tuar naupangte tan a hming chawiin Eric Trump Foundation dinin sum a tuaksak ṭhin. Wine ngaina tak niin kum 2011 khan wine siamchhuahna Trump Winery a din. Virginia winery leh vineyard-ah President a ni mek a, kum 2013 khan Wine Enthusiast magazine chuan ‘Rising Star’ atan a lo thlang tawh nghe nghe.

Ram vah peih tak niin kum 2012 khan a u Don nena an sa kah - Keite, Sai leh Awle ruang bula an thlalak chu a darh chiam a, ramsa humhalhtu pawl PETA nen boruak an lo nei hat tawh.

Kum 2014 khan Lara Yunaska nen an innei a, kum 2014 September thlaah an fapa hmasa ber Eric Luke Trump chu piangin Luke hi Donald Trump-a tu 9-na a ni.

TIFFANY TRUMP : Kum 26 mi hi Donald Trump-a fate zinga a pharvar ber niin a nupui pahnihna, lemchan thiam Marla Maples nena an fa neihchhun a ni. 

A pa leh a ute pahnih Don leh Ivanka te ang thovin University of Pennsylvania chhuak a ni a, kum 2016 khan Urban Studies leh Sociology-ah a graduate. Kum 2017 khan a u Eric-a zirchhuahna Georgetown University law school-ah a zirna a chhunzawm leh nghal a, kumin May thla khan a zirchhuak.

Instagram lamah hriat a hlawh a, followers mi Maktaduai 1 leh Nuai 2 a nei tawh. A tawih Nigerian-American billionaire Michael Boulos hi ro a khawm avanga hausa, Boulos Enterprises leh SCOA Nigeria neitu a ni.

BARRON TRUMP : Donald Trump-a fate zinga a naupang ber leh zirlai awmchhun, Melania Trump nena an fa neihchhun a ni.

Kumin March 20 khan kum 14 a tling ve chauh nain media-te vehrawn a ni der tawh a, feet 6 leh inches 3 zeta sang ni tawhin, naupang ṭhan dan zir mite chuan feet 6 leh inches 7 zeta sang a ni thei dawnin an sawi. Trump chhungkuaah a sang ber.

A unau dangte ang lo takin thlalakah a lang tam lo thung va, a lan chhunah pawh a nu leh pate bula a awm lai a ni deuh zel. Kum 2006 May thla khan Episcopal Church of Bethesda, Palm Beach, Florida-ah baptisma a chang a, English bakah a nute ṭawng Slovene a thiam nal hle. 

US President fa naupang lamte khan Sidwell Friends-a school an kal ṭhin laiin ani erawh Andrew's Episcopal School a kal teh tlat a, US President fate zinga he school-a lut hmasa ber a nih bakah, kum 35 chhunga president fa dangte ang lo taka Sidwell Friends-a kal lo awmchhun a ni bawk.

American naupang dangte ang lo takin Barron hian football a atchilh tlat. Kum 2017-2018 chhung khan DC United Development Academy, U-12 team a zawm a, February 2019 aṭang khan Arlington Soccer Association tan a khel ṭan.

John F. Kenedy fapa Kenedy Jr hnu lama White House-a mipa naupang awm leh hmasa ber a ni. US President hnuhnung 3 Obama, Bush leh Clinton te khan fapa an nei lova, chuvangin Kenedy te hnu lama US President chennaa mipa naupang cheng leh hmasa ber a ni.

Social Media hrim hrim a khawih lova, account a nei lo bawk. US President atana a pa lakluh a nih ṭum khan NBC hnuaia Saturday Night Live writer Katie Rich chuan Twitter-ah fiamthu thawh na’n a hmang a, US mipuiin fiamthu thawh na’na naupang hman chu an helh tlang hle. Katie hi NBC chuan a hna aṭangin an chawlhtir.