Chin Baptist In CM Khawhar An Hnem
April 25 Vanglaini ah khan Chin Baptist Church, USA ten CM Relief Fund atan Rs 3,00,000 (Nuaithum) an hlan thu kan lo chhiar a, an ti lawmawm hle. Chief Minister Relief Fund hi February thla khan ZPM Unit/Zonu leh Sawrkar hnathawk pawl ṭhenkhatte aṭangin Rs 4,58,750 a lut a, March thla chhungin lut a awm lo va, April thla tawp dawn ni 24-ah a lut leh ta chauh va, Chin Baptist ho pek bak hi chu April thlaah CM Relief fund lut a awm lo.
Covid lai khan mimal, kohhran leh pawlho ṭhahnem tak aṭangin Covid pual CM Relief fund lut kha a ṭhahnem hle a, 23 June, 2020 Vanglaini ah khan Covid dona atan CM Relief fund-ah cheng nuai 1721 a luh tawh thu kan hmu a ni. Covid khan Mizo nun ropui tak a sawr chhuak kan ti thei awm e, a ropui hle.
Covid a lo awm ta lo va, chutih laiin kan ramah chhiatna hrang hrang thleng erawh a tam hle a, a la thleng leh zel dawn pawh a ni mahna. CM Relief fund hi engtik lai pawha pek theih reng a ni a, kan pe ṭhin bawk a. Chhiatna thleng thut leh a ṭul anga CM Office aṭanga pek chhuah ṭhin a ni ber awm e.
Tlem lai deuh khan Chief Minister in MLA zawng zawng an nupuite nen chawhlui a kilpui a, YouTube aṭangin kan lo thlir kha. Assembly hall chhunga inmelh rum ṭhin ni awm takte pawh kha an hlim tlang hle tih kan lo hmu a nih kha. Khami ṭum khan CM Pu Duha kha a han chevel a, thu har chhiar dik tur kha MLA ho a chhiartir a, chhiar dik lo apiangin CM Relief Fund atan Rs. 500 zel chawi tur a ti ni tain ka hria. MLA hote chaw a eipui ṭum khan amah CM meuh khan Relief Fund raising kha a bei a, eng zat nge a hmuh chu hriat a ni lo.
Tun kan Sawrkar tharah hian CM Relief Fund hi a lut ṭha rih lem lo niin a lang, kan CM pawh hi a khawhar hman deuh ang em aw? tih laia Chin Baptist ho, US-a mite an rawn che ta daih hi an ti ṭha hle mai. Zofa thil phal tak tak, sem sem dam dam ti ṭhin hnamte ṭan la thar ila, CM Relief fund atan te, mahni veng leh khuaah mi harsa zawk te leh chhiat tawkte tan nasa zawka luan chhuah zel tum ṭheuh teh ang u.
Kristian kan ni a, kan Pathian thuin min zirtir pawimawh tak pakhat chu, mi harsa leh mamawhtute hnena inphal hi a ni.
"Sem darh chu pun lehzualna a ni a ...
Mi thilphal nunna chu tih thauvin a awm.."
Thufingte 11: 24-35
- Rev Biaka Chinzah.