POLITICS LEH DAWT SAWI

He ziaktu hi ka nu lama ka pi bula seilian ka ni a, ka pi chuan tiang hian min hrilh thin: “Dawt sawiah mi i puh chuan, ‘ruk i ru’ tihna a ni a; rukruah mi i puh chuan, ‘tual i that’ tihna a ni a; tual thahah mi i puh chuan, ‘mihring i ni lo, ransa i ni’ tihna a ni. Chuvangin tu mah dawt sawiah i puh tur a ni lo a, ruk ruah i puh tur a ni hek lo. Nang pawh dawt i sawi tur a ni lo a, ruk i ru tur a ni hek lo. Dawt chu a lo lang mai thin,” tihin. Hei hi ka pi, lehkha thiam lo, mahse mi fing leh hla phuah thiam philosophy leh zirtirna a ni a, a dik leh dik loh lam ai mahin, dawt sawi leh dawt sawiah inpuh a ṭhat lohzia leh nghawng a neih thuizia min zirtirna a ni.

Mizoramah chuan kan political partyte hi Kristian intite awmkhawmna partyte an ni hlawm a, nimahsela kan political party-te leh politician-te hian awlsam tak leh inphal takin dawt sawiah an inpuh tawn ve ve ṭhin a, an inpuh tawn mek a, an la inpuh tawn zel dawn niin a lang. Tu party nge dik ber a, tu politician nge dik ber tih pawh hriat a harsa tawh hle. Thu dik leh ṭha sawia an khingpuite an hneh theih dawn loha a lan chuan, dawt sawia inpuhna leh mimal nun insawichhiatna (character assassination) lamah an lut ṭhin. Hetianga kan kal zel a nih chuan, kan politician-te hian ram ropui min dinpui ahnekin, “Dâwt-land” min dinpui palh ang tih a hlauhawm hle. Hetiang level vel politics, politician leh mipuite ni tawh lovin, hei aia ṭha zawk tur leh puitling zawk tur kan ni tawh asin maw le!

He thu ziaktu hian dik si, mahse nuihzatthlak bawk si, fiamthu thawnthu pakhat an sawi ka hre ve a. Pa pakhat hian naupang inhnial buai lai a hmu a. “Eng vangin nge khatiang khan in inhnial buai?” tihin a zawt a. Naupang pakhat chuan “Ka pu, dawt sawi intihsiakna kan nei a, he uite hi dawt sawi thiam ber hnena pek tur a ni a, dawt sawi thiam ber nihna an hauh vek si a, chuvangin inhnial buaina a chhuak ta a ni,” tihin a chhang a. Chu pa chuan, “Eng vangin nge chutiang chuan dawt sawi chu in intihsiak ngawt le, dawt sawi chu a ṭha lo asin,” a ti a. Naupangte chuan, “Ka pu, nang dawt i sawi ngai lo em ni?” tihin an zawt a. Chu pa chuan, “Ka sawi ngai lo,” a ti a. Naupangte chuan, “Ka pu, dawt sawi thiam ber pakhatna lawmman dawng tlak chu nangmah ngei hi i lo ni. Uite hi nangin nei ang che,” tihin uite chu an pe ta a, tihin. Chu naupangte tan chuan, “Dawt ka sawi ngai lo” tih chu dawt ngialngan a ni. Kan ramah pawh hian dawt sawi thiam ber pakhatna lawmman uite dawng thei tur kan awm ṭeuh a rinawm.

Ni e, dawt sawi hi khaw lohnaa din leh suala piang mihring nunzia pakhat a ni ve tlat a (Sam 51.5), chuvangin Isua tih lohah chuan, hmeichhe hrin zingah chuan naupangte aṭanga dawt sawi ngai lo an awm a rin awm lo. An awm pawhin an tam lo ang. Chutih laiin, Kristiante erawh chu mihring nunziaa nung tawh lo va, Krista nunziaa nung tawh tur kan nih avangin kan danglam tur a ni a, kan danglam tur anga kan danglam theih lohna, a bikin party politics leh sum leh pai thilah dawt sawi pawi ti lotu Kristian kan la tam rihna hian, ngaituahna a tikal thui ṭhin chu a ni.

Fiamthu thawnthu dang leh chu, Intihlimna Dawt Sawi Club (Amateur Liars Club) chuan, intihhlim nan dawt sawi intihsiakna a buatsaih a, politician-te erawh tel phal an ni ve lo. Hetiang hian politician-te tel ve an phal loh chhan chu tarlan a ni: “Politician-te chu professional liars (dawt sawi hi an eizawnna hnaa hmang) an ni a, chuvangin dawt sawi an thiam em em a, anni an tel ve chuan intihhlim nana dawt sawi ṭhinte tan hnehna chance a awm dawn lo. Chuvangin politician-te chu intihlimna dawt sawi intihsiaknaah chuan tel ve phalsak an ni lo,” tih a ni. Kan ramah pawh hian, intihlimna dawt sawi intisiaknaa tel pha lo tur politician-te kan lo kawl ṭeuh mai thei a ni.

He fiamthu thawnthu hi tlânglâwn (generalization) fiamthu thawnthu a ni a, dawt sawi duh loh leh sawi loh politician-te an awm ve ngei ang. Dawt tel lova politics khelh theih lohna tur leh kal theih lohna tur chhan a awm lo a, dawt tel lova politics khelh leh kalpui chu Kristian politician-te nihna tur leh politics khelh dan tur a ni. Kristian politician-te chu an danglam tur a ni a, chutih laiin Kristian politician ṭhenkhatten an danglam tur anga danglamna nei lo a, dawt sawi leh dawt sawiah politician dangte puh pawi tihna neih loh an ang mai ṭhin hian ngaihtuahna a tikal thui ṭhin hle a ni. Dawt sawiah inpuhna ṭhenkhat hi chu party politics chhe mi ni berin a lang a, ṭhenkhatah erawh chuan an inpuhna chu thudik a nihzia finfiahna a awm ṭhin awm e. Politician leh dawt kal duntirna thil ṭha lo a lo pianna chhan hi mipuiin a mawh kan phur lo, anmahni politician-te vang a ni, dawt sawiah an inpuh tawn ṭhin avangin.

Eng vangin nge miten dawt an sawi ṭhin? Naupangte chuan an duh zawng an neih theihna tur leh thil an tihsualin zilhhauna leh hremna an tawh lohna turin dawt an sawi ṭhin. Puitlingte erawh chuan; ringtute tiamin, dawt an sawi ṭhinna chhan leh vang chi hrang hrang a awm ang. Hun leh hmun tam takah chuan harsatna leh hlauhawmna karah an sahimna turin miten dawt an sawi ṭhin. “Pathian Ṭhian” tiha koh Abrahama (Jakoba 2.23) leh Pathian meuh pawh “Isaka Ṭiha” tiha koh Isaka (Gen 31.42) te pawhin, harsatna leh hlauhawm karah chuan dawt an sawi ve tlat a ni.

Abrahama khan a nupui Sari chu Aigupta lal Pharoah leh Philistia lal Abimeleka ten an laksak thei tih a hria a, chutia a nupui laksak theih tur chuan amah, a pasal chu an thah hmasak a ngai dawn a ni. Chuvangin a sahimna turin a nupui chu “Ka farnu a ni” tihin dawt a sawi a ni (Gen 12.10-20; 20.2-7). Khatih hun laia lalte kha an lal hle a, mi nupui an neihsak theihna turin an pasalte thah pawh pawi an tih loh hun lai a ni. Abrahama khan a nupui Sari kha, “Ka nupui a ni” a tih chuan, an laksak theihna turin amah kha an that thei a, “Ka farnu a ni” a tih erawh chuan, man leh mual pein a farnu chu an nei thei a ni. Lalte thu chu hnial theih rual a ni lo. Isaka pawh, a pa Abrahama angin a nupui Rebeki chu, “Ka farnu a ni” tihin Philistia lal Abimeleka hmaah dawt a sawi ve a ni (Gen 26.1-11). Heng thawnthu aṭangte hian khatih hun laia hmeichhiate dinhmun hniamzia kan hmu tel bawk. Abrahama leh Isaka te khan mahni sahimna turin, an nupui, hmeichhiate chu mi dang kuta hlan (sacrifice) an pawi ti lo a ni.

Harsatna leh hlauhawmna tawk loh pawhin hlawkna leh hamṭhatna (sum, hna, etc) hmuh duh vang te, mualpho leh zak hlauh avang te, hmelmate beih nan leh eltute hneh theihna atan miten dawt an sawi ṭhin. Thlan tlin a nih theihna tura political party leh politician-ten an tihhlawhtlin theih loh tur thil an tiam ṭhin te pawh hi dawt a nihna lai a awm ve. Society-in dawt sawi a lak serious lo a, dawt sawitute an phu tawka hrem an nih ṭhin loh avangte pawhin miten dawt sawi leh ziak an hlau lo a, an zak lo bawk. Kristian inti sia dawt sawi ṭhin a nih chuan, Thlarau Thianghlim inkaihhruaitir ringtu chak a nih loh vang a ni ang.

Dawt leh dawt inbeih changte a awm a, dawt mah ni se sawi nawn reng a nih chuan thudik anga ngaih hunte pawh a awm ṭhin. A sawrkar berin sum hmanna Utilization Certificate (UC) siam hunah dawta phuahchawp UC siam pawi a tih loh phei chuan, mipuite dawt sawi loh tura han phut leh beisei chu awmze nei lo a ni. Media-te (print leh electronic mediate) pawh political party leh politician ṭan zawk an neih vang emaw, an inhralh theihna turin emaw, dawt pawlh thudik chanve thehdarhtu an ni thei bawk. "Thudik chanve chu dawt muhlum ai pawhin a hlauhawm zawk e," tih thufingte pawh a awm kha maw.

Dawt var (dawt thiang leh ṭha) a awm em? Abrahama leh Isaka te pawhin an sahimna turin dawt an sawi tho a, chuvangin keini Kristiante pawh kan himna tur leh ṭhatna tur a nih chuan dawt var sawi chu a pawi lutuk dawn em ni? tih ngaihdan leh sawite a awm ṭhin. Thuthlung Hluia narrative (thawnthu) te hi Thuthlung Hlui Dan (Law) leh, Thuthlung Thara Lal Isua zirtirnate aṭanga belh chian tur a ni a. Abrahama leh Isaka te dawt sawi kha Pathianin a pawmpuina thu Bible-ah a awm lo. Lal Isua'n, “In thu sawi chu ‘ni,’ emaw, ‘ni lo,’ emaw ni ngawt rawh se, chûng aliam chu sual laka chhuak a ni,” a ti a (Mat 5.37), Jakoba pawhin, “Ka unaute u, engpawh ti mah ula, chhia chham suh u; vân chhâlin emaw, lei chhâlin emaw, thil dang rêng rêng chhâlin emaw chhia chham suh u; ‘Ni’ in tih chu ‘Ni’ ni se la, ‘Ni lo’ in tih chu ‘Ni lo’ ni rawh se; chutih loh chuan, thiam loh changin in awm ang,” a tih a ni (Jakoba 5.12). Dawt lian leh dawt te a awm lo a, dawt serious deuh leh serious loh deuh pawh a awm lo. Dawt chu dawt a ni vek. Period! Dawt sawi chu sual a nih avangin, ringtute chu dawt sawi lo tura thupek dawng kan ni (Exod 20.16; Lev 19.11; Sam 119.163; Thufingte 4.24; 12.22; 13.5; 14.5; 17.7; 26.28; Zhn 8.44; Tirhkoh 5.3; Eph 4.25,29; Kol 3.9; 1 Tim 4.2; Jakoba 3.1; 1 Zhn 1.19; 2.21; Thupuan 22.15; etc). Chuvangin dawt var, dawt thiang leh dawt ṭha a awm lo.

Dawt sawi chu sual a nih chuan, chu sualna chu Pathianin a ngaidam thei ang em? Ngaidam thei e. Nimahsela, Lal Isuan thil sual titu a ngaihdam hnenah khan, “Tûn chinah chuan sual leh tawh suh ang che,” tiha thu a pek ang khan (Zhn 5.14; 8.11), dawt sawi sual ata Lal Isua ngaihdamna chang tawhte chuan dawt sawi sual chu sim tawh tur a ni a, chu sualah chuan kir leh tawh lo turin fimkhur hle a ṭul a ni. Dawt sawi sim thei lo a, dawt kan sawi reng a nih chuan, Kristian kan nihna kan inbihchian a pawimawh hle. Kristianna leh dawt sawi chu an kal dun thei lo.

Kan society hian dawt sawi leh dawta inpuh te hi kan lak serious hle a pawimawh bawk. USA President 37-na Pu Richard M Nixon kha Watergate Case an tih, dawt sawi avanga inresign ta President a nihzia kan hria a. Pu Nixon kha Republican Party ticket-a President thlan tlin a ni a, inthlan lo awm leh tur atana a inphuahchahna kal zelah Republican Party lam mi pangaten June 17, 1972 zanah Watergate-a Democratic National Convention office luhchilhin, document-te an ruksak thu hriat chhuah a ni ta a. A tirah chuan President chuan chu mite thiltih chu a hriatpui loh thu a sawi a, mahse a hriatpui thu fiah a ni leh si a, dawt a sawi tih a lo lang ta a ni. Chuvangin House of Representatives leh Senate-in an ban (impeach) hmain a in-resign ta a ni.

Dawt pakhat sawi avanga President meuh in-resign kher chu a va ṭul lo em, titu khawvel dangah an awm nual a rinawm. Dawt sawitu politician-te leh roreltute chu an in-resign vek tur a ni tih ni ta se, in-resign tur roreltu khawvel ram hrang hrangah an awm ṭeuh ngei ang. A ni, ram ṭhenkhat leh mi ṭhenkhatten dawt sawi an lak serious hle laiin, la serious vak loh ram leh mite an awm ve nual awm e. Kristian tamna Mizoram pawh hi dawt sawi leh dawta inpuhna la serious loh zingah kan tel ve ṭan niin a lang a, a pawi hle.

Thil hriat sual vanga thu sawi palhte chu a awm ṭhin ngei mai. Rokhawlna avanga thutiam tihlawhtlin theih lohte pawh a awm ve ang. Hei hi chu dawt a ni lo. Dawt a nihzia hre si a, thu dik anga sawi leh phuahchawp thute hi dawt chu a ni. Dawta mite puh leh dawt bawka mite dawt sawiah puh pawh dawt a ni ve. Kan thusawi chu dawt a ni leh ni lo miten hre lo mah se, a hretu pahnih an awm – Pathian leh dawt sawitu - keimahni. Chuvangin dawt chu thup theih a ni lo. Sawi tawh angin, dawt chu a lo lang leh ṭhin. A lo lan hunah chuan, dawt sawitu chu miten an ring thei tawh ṭhin lo.

Dawt chu a lan chhuah lohna turin dawt dangin khuh zel emaw, dawt bawkin sawi mam zel emaw a ngai dawn a, dawt sawi zel a ngai dawn ta a ni. Dawta chhungkua leh ram din chu a tlo lo ang. Chuvangin dawt sawi i bansan tawh ang u. Kan inchhir lo ang. Chutichuan, kan mimal, chhungkua, khua leh ram leh kohhran te dawt sawi avanga sual sala tanna ata kan zalen ang a, thlamuang takin Pathian chawimawin a rawng kan bawl thei ang. Kan ram politics pawh thianghlimin a duhawm ang a, Pathian malsawm kan dawnna tur a ni bawk ang. Dawt tel lo leh dawt sawiah inpuh tawn lo politics ṭha neih hi thil theih a ni tih hria a, Mizoram hi dawt tel lo politics ṭha leh tlo tual lenna ramah i siam ang u. Kan tan a ṭha ang.

- Laiu Fachhai