MIZORAM A EDUCATION DEPARTMENT-A THAWKTUTE HI EN FEL DEUH A ṬHA LO MAW?
Education Department hi Ram leh khawtlang hmasawnna hnukpui, a bul tumtu, ki pawimawh ber leh innghahna a nih miau avangin Education Department a thawktute pawh hi kan duh uluk a, kan duh fir hi a ngai tak meuh a, chutiang chuan a chhunga hmasawnna ṭha tak nei tur chuan a thawktu tur dik tak leh he hnaa tuichilh Ieh taima, mi thiam, training-na ṭha tak neia chherchhuahte tan ruahmana a bika siam ni thei se. Chuti lo va, puan ṭhui ngai lo leh training-na ṭha tak nei lo, suahdur leh bawngtithlawh nena ni tin feh chhuak ṭhin, puanṭhui khawl pawh la hmu ngai lovin kan thawmhnaw hak tur min han ṭhuisak mai se chuan, mawi taka inchei leh inthuam chu a har duh ngawt ang le. Hetiang ang deuh hian Mizorama kan Education Department-a kan thawk tute pawh hi, kan her kual vel mai mai a, thawh tur thawk lova thawh loh tur zawk thawk hi an insulpel sup sup mai hi chu aw! Her rem a van hun tawh tak em.
Directorate Office-ah te, District Education Office-ahte leh Sub-Education Office-ah te hian LDC-te leh hna ṭul dang thawk tur hian Zirtirtu thiam leh Senior fel tak takte Zirtirna hnaah Training-na ṭha tak tak neite zirtirna thawk lova a hlawp hlawp a, Office-a thawk tura an han ṭhu pir fer fur hi chu a van fuh hmel loh tak em! chu tih laiin Zirna Inah Zirtirtu indaih lo reng rengin an lo khawsa bawk nen.
Tin, thil intuha lo deuh leh pek chu, Zirtirtu Senior tak tak Hlawh pawh thla khata Nuai chuang fe la-te, Office-a LDC leh hna dang thla khata Sing hnih khata rawih tur fel tak tak leh thiam tak tak tam tak an awm lai a, Zirtirtu indaih lo chung chunga thawk lai, Office-a hna thawk tura an han seng lut ngawt zel hi chu, a chhuan mang rorel deuh lo maw aw! Zirtirtu Training-na ṭha tak nei a, lo tah hriam tawh, Experience ṭha tak nei leh hlawh pawh tam zawk lo la tawh leh nuai chuang lo hlawh tawhte, hna awm nem leh Training pawh ni hnih khat bak ngai lo thawk tura Zirtirtu ṭha hnem tak an an dah leh ngawt mai hi chu, hlawh tlem zawka rawih tur an tam teh reng vei nen, Mat vuaka Tuichang Dap ang choh kan nih reng mai hi enfel deuh a ṭha lo maw?
Education Department chuan hmasawnna tluantlinga hmasawn hi a har duh ngawt ang le. Kal phung thar, leh Sorkar tharah chuan thil hi a nih tur ang taka kal chhohpui turah hian kan Sorkar thar hi han beisei ve phawt mai teh ang u hmiang.
- HC. Thanchungnunga J