Ka Duhthusam

Sawrkar thar kan nei ta bawk a, duhthute pawh han sam ve dawn chhin ila a ṭha awm e. Mahse, duhthusam hi chu a tlangpui thuin kan duh ber, awh ber, kan han sawina mai mai ṭhin kha a nia. Tunlai khawvel thiamna sang takah erawh chuan thil awm thei lo, ni thei lo tak tak pawh hi a awm thei tawh meuh lo ve. Bazar chungchangah ringawt pawh hian tunah chuan sitting room aṭangin kan han hmet zeuh zeuh a, a tuk tuk leh lawk velah kawtkaiah, "Hei, I bungrua a lo thleng," an rawn ti nghal zel mai tawh a ni. Hetiang khawvel kan nih tawh avang hian ṭhenkhat tan chuan kan duhthusam kha thil ho mai mai a lo ni ve reng thei tawh a ni. Nia, a mihring azirin kan duhthusam chu a inang lo hlawm thei khawp ang le. Kan ram chu ram changkang lo, rethei kan ni a, duhthusam pawh awlai te te, ho te te pawh lo ni se, kan la inhmeh tawk viau zel theiin ka ring. Aw le, duhthusam chu sawi tawh angin thil ni thei tak tak tur lo, ngaihruatnaa kan sawi mai mai a ni a, mahse, vawiinah chuan sam thiam viau kan tum thung dawn a ni.

Ei Leh Bar – Khaw lai han chhuah chuan lirthei changkang tak tak, chhuak thar ber, kea kalte pawh an sawi tawh ṭhin angin, London khawlai pawha zahpuiawm lo tur tak tak kan ni hlawm. A tlangpui thuin ni tin chaw vawihnih, chhun thingpui, chawhnu, a ṭhenin zan lamah te pawh kan in bawk a. Henga kan ni tin ei leh in tam zawk hi chu state dang aṭanga kan lakluh a ni, a lakluhna tur pawisa pawh chu kan thawhchhuah em em a la ni lo, a ṭhen chu central lam aṭanga kan dawn a la ni. Lehkhathiamte pawh an pung nasa, a lawmawm hle mai, Ph.D, tih vel pawh an awm fer fur tawh mai a nih hi. Kan titi te pawh a sang, kan khaw hawi pawh a zau hle, thil engkim kan hria emaw tih mai tur a ni. Kan hriat ṭheuh angin India ramah pawh kan sang viau mai, mahse, hetih laia lungchhiatthlak deuh thil pakhat awm chu, Silchar kawng a pin hlek chuan kan buai, chuti hlauh chu kan ni zel mai si hi a ni. Ni tin eitur kan mamawh, a tel lovin a awm theih loh, engtin nge ni ang le? Loneih kan peih tawh mang bawk si lo, eng ngati nge kan peih loh, han ti leh ta zel ila, a hlawk lo, an awhawm loh, mi rethei tihna a ni deuh ber mai. Loneitute dinhmun hi a hniam berah middle class-te tal ni thei se chuan kan intih hmuh sup sup ngei ka ring tlat, tichuan, reiloteah Silchar kawng pawh chu lo ping sawmsarih mah se la, eng he huah kan ngai tawh kher lo vang.

Zokhaw Lam – Chanchinbu, Radio, TV, ah te kan hre hlawm ṭhinin ka ring, khaw fai ber, India ram pawha lang pha an awm leh zauh ṭhin. Khaw tam takah hi chuan faina leh thianghlimna an ngai pawimawh thei hle, khawpui lam aiin an invawng fai daih zawk a ni. Kei hi thingtlang lama kal ngai mang lo, Aizawl mi pawh ni chiah lo, mahse, Aizawla seilian chu ka ni. Hetia ralkhat aṭanga ka lo thlir ve vang vang hian zokhaw lam mite hi hriselnaa inenkawlna lamah hian an va khawngaihthlak ve aw, ka lo ti ve mai mai. Khawpuia mite ang bawka natna kai ve ṭhin, inenkawl ngai, Doctor pan ngai an ni. Khawpuiah chuan Doctor-te pawh specialist, chu'ng zingah pawh duh kan la thlang ṭhin a ni. Damdawi leh thil dangte pawh harsa lem lovin a tih zung zung theih, a panna kawng pawh minute reilote chauh a ni. Hetih lai hian thingtlang lamah Doctor chu sawi loh nurse tak ngial pawh ràwn tur an awm lo ṭhin, lo awm pawh ni se, a damdawi lam hmuh a harsa mai thei a ni. Nia, kan hre ṭhin ang a, thingtlang lam aṭangin damlo chu nileng zankhuaten an rawn kalpui ṭhin a ni. An tan chuan a va hautak lua em aw, a harsa zawk zawk an la ni bawk si, Doctor-ho lah hi an awm ṭha duh mang der lo, hei hi chu India ram hmun dangah pawh a ni tho mai. He an dinhmun harsa leh buaithlak tak mai hi bengsika ngaihtuah ngai a va ni em ve aw.

Khawpui Lam – Khawpui lamah hi chuan engkim mai deuh thaw hi a awlsam a ni, kan vannei e, i ti mai ang. Tun hma deuh kha chuan kawng diak, han kal chhuaha diak kai lei luaia haw ngai kha a ni ṭhin a, mahse, tun hnu hi chuan kha kha a lo awm ta miah lo, a tih theih a ni. Kan pheikhawk, slipper bunte pawh a ngai ngaiin kan hawpui leh ṭhin a ni, a lawmawm ang reng hle mai, kan lo changkang ve ta deuh a ni deuh ber mai. Tun hnua buaithlak leh tlat ka tih chu tuihawkluankawr ni lo, kawng leh step vela ruahtui luang nasa lutuk ṭhin hi a ni. Eng ngati nge kawng velah chuan a luan chiam zel mai le aw, a luanna tur chu siam a ni ve ngei a, mahse, a ṭangkai vak miah lo, a buaithlak hle mai. Kawngpui dungah emaw kein han kal han kal ve mah teh, bawlhhlawh nawi eng eng emaw hi hmuh tur a tam thei hle mai, a bawmte pawh siam a ni a, mahse, a sawt vak lo emaw ni le? a tih theih. Tun hma khan vantlang zunina ek awm nasa ṭhin kha kan buaipui a, kan sawi sup sup ṭhin, a ṭawp hle reng a ni. Mahse, vawiinah chuan kha buaina kha kan nei tawh miah lo, a tih theih a ni, chinfel a ni deuh tlat mai. Hetiang ang bawk hian kan sawi tak, tuihawk luang nasa, bawlhhlawh chungchangte pawh hi a chinfel dan a awm ngei ang, i vei tlang teh ang u.

Duhthusam ka han ti ngawt a, ngaihmawh zawngte pawh a ni mah awm e. Ka ngaihmawh leh deuh pakhat chu kan mi thiamte biangbiakna/sawihonaa sap ṭawng tel tam lutuk ṭhin hi a ni. A buatsaihtute hian chawpchilh lutuk chuan an sawm/hrilh, ka ring chiah lo va, inbuatsaihna hun chu ni 3/4, vel tal chu an neih ngei ka ring. Nia, technical lam thil hi chu a Mizo ṭawng chuan buaithlakna chin a tam, an tih hi chu ka hria a, mahse, hei pawh hi... ka ti deuh mai mai. Heti tak maia sap ṭawng kan han ngaisang, uar ta lutuk hi chu, inngaihtuah a ngai chu ka ti ve deuh. Pu Modi (PM) pawh hian UNO-a thu a sawi khan hindi-in a ni a sawi ni. German Chancellor ni lai mek pawh hian a tlangpui thuin anmahni ṭawng deuh ngat a ni, a hman ṭhin ni. Sawi ta zel ila vai, kan tih hote pawh hi an ṭawng ṭha duh lo reng reng, anmahni ṭawng an ngaisang/duh zawk tlat. Changkang kan intih ve tawh viau lai hian mahni ṭawng kan ngaisang mang tlat lo hi chu kan inngaihtuah chian a ngai, lemchang mai kan nihzia tilangtu mai mai a ni. Aw le, sawrkar tharah beisei takin duhthu kan han sam ve mai mai a ni a, i lo ngaihtuah ve ngai emaw ka hre lo a, ka sawi chin bak hi hunawl i neih chuan i lo chhunzawm ve dawn nia.

- Lalchhandama Colney

Ph - 9862982321