Rangkachak an zawng hmu tur a ni
Nikum kum tawp lam khan rangkachak cheng vaibelchhe 14 man zet, quintal chanve lai mai chu Aizawl daiah motor-a phurh lo lambun a ni a; thla eng emawzat a liam hnuah police hnenah FIR thehluh a ni. Hun rei tak police ten an chhui hnuah sipai officer leh a naute bakah civil mi pahnih an man ta a. He rangkachak hi a awmna hriat a la ni lo a, an zawng hmu ngei tur a ni.
Mizoram hi Myan-mar nen kan inri a, khawchhak lam aṭangin thil ṭha tam tak lakluh a nih laiin thil ṭha lo tam tak lakluh a ni bawk. Mizoram aṭang pawhin thil
ṭha engemawzat thawn chhuah a nih laiin ruihhlo siamna damdawi tawlhrukna kalkawng ber a ni.
Ruihhlo mai ni lo, ralthuam kalkawngah Mizoram hi eng ang takin nge smuggler-te hian an hman tih chu hriat a ni lo a, tun hnaia rangkachak quintal chanve lai a bo takah chuan engzat takin Mizoram hi paltlang ang maw?
Dan loa rangka-chaka sumdawnna hi mi tam tak chuan ruihhlo a ni lo e tiin an ngaizam thei a ni mai thei. Nimahsela smuggling a nih miau avangin hei hian a ken tel tlat chu ruihhlo hlauhawm tak tak te, ralthuam hlauhawm tak takte a ni. Rangkachak a nih avangin ngaihzam mai chi a ni lo a, kan police-te hian an chhui chhuak ngei turah ngai ila.
Eng mi pawh nise heng rangkachak zo zai tawlhruk chung changa a neitu te, a phurtute leh lo lam-buna lo rubotute hi a zung nen phawi fai vek a ṭul tak zet a ni.
Mizoramah an lakluh phu lo lutuka in leh lo leh bungrua nei an tam em em. Sorkar hnathawk pawh ni lo, sumdawnna hriat chian pawh ni lo, contractor hna lian pui pui pawh thawk si loa hausa an pung thur thur mai. Hei hian khehpuam leh smuggling lama an tlan nasatzia a tilang chiang hle.
Hengho hi mi pangngai tan chuan an thikawm lek lek laiin an hmuhsitawm tawp khawk a, zah ahnekin in hmun ṭha tak tak leiin Veng hrang hrangah building ropui tak tak an sa a, khawlaiah lah nei ber thawkin an thaw ham ham mai han hmuh hian an hmuhsitawm viau a ni.
Tuna rangkachak rukbo pawh hi kan police-te'n chhui chhuak ngei se a duhawm khawp mai. An chhuichhuah theih nan pawh ṭanpui thei an awm chuan kan theihna zawn apiangah tanpui ṭheuh ang u. Chuti lo chuan Mizoram hi dik lo taka sum lakluh ramah a chang thuai ang a, ralthuam hlauhawm leh ruihhlo tamna ramah kan siam zel ang tih a hlauhawm hle a ni.
- Lal Rinmawia