FOOTBALL INKHEL EN FIMKHUR A NGAI

Tun hnai kum 3 chhung hian infiamna lamah hma kan sawn viau a, sports lam changtu Pu Zodintluanga hian hma pawh a la chak hle a. Phul lem phah a han nih takah hian hma kan sawn a, thuziaktu lamin kum 20 chuang an lo ziah tawh hian ṭhalai rilru a kai harh nasa bawk.

Mimalah chuan AFC President, Robert Romawia Royte hian Mizo ṭhalai tan a thawh hlawk ber hial ang. Mumang pawha kan hmuh phak ngai loh Japan tlangvalte foreigner Player te Aizawl-ah an inkhel kan hmu ta maite hi a ropui a ni. India ram khawpui liana tlangval inkhel thiam, palian pui pui te Aizawl-ah kan lo hneh thei ta.

Bengaluru leh AFC inkhel kha RG Stadium-ah Miriami seat-ah ka va en ve a. Vanneihthlak takin AFC an chak. Off-side vaitu-in Bengaluru goal off side niawm taka lang, a vai lo leh AFC pet luh pakhat off-side a vai leh hnuhnawh khan inkhel entu, mahni ṭan lam au pawr chi ho kha an rawn inlar deuh zuau zuau a, kawr phelh mai tawk pawh an awm hman.

Kan ram khelmual a ni a, a entu lam chet dan a fel loh chuan a pawi thei. AFC pawhin Rs. 50,000/- lai an chawi phah hial tawh a ni lawm ni? AFC President-in sum tura mike meuha a au chung pawhin bottle vawm lut tawk te awmin an chawi ta tho a nih kha.

Vanneihthlak takin AFC chuan Bengaluru chu anmahni mualah 3-2-in an zu hneh leh ta tlat mai. Aizawl-ah inkhel kan hmuh leh theih phah dawn a, a lawmawm hle a ni. Eng hunah pawh inkhel en hi kan ṭhalaite hian kan fimkhur telh telh a, kan insum hram hram zel a la ṭul dawn chauh a ni.

Hmanni khan ka bulah Pu Dawnga leh Pu Chhuana, Officer Rtd. Referee Qualified te an ṭhu a. Pu Dawnga chuan “Referee kan train laiin, ‘pawn lama mipui au hi pawr hle mah se engah mah ngaih loh tur, thutlukna kan siam tawh chuan nghet taka din tur’ an ti e,” a ti.

Mi ṭhenkhat chuan kan au vel vak hian, ‘Referee te hian kan lam ṭan ta deuh tur leh min veng thawng deuh turin kan ngai a ni mai thei, kan
ṭan lam kan lo au phur hi a
ṭha mai ni loin a ṭangkai a, a au pawr thei deuhte hi boruak siamtu, inkhel tipuitu an ni a, an fakawm hle lawi si a.

Dan leh kalphung pang-ngaiin a remtih bak erawh chu kan tih loh fo a ngai a ni. Kan ṭan lam an chak thei a, an chak lo thei bawk. Chu chu inkhel awmdan a ni fo. Tunlai ṭawng takin manner kan hriat a ngai a ni.

I League kan han khel pha ta te, India Football inelna sang ber Aizawl-a kan han hmu thei ta mai te hi mi tam tak rilru leh mit tlaina a ni.

Kan ram hruaitu ṭhenkhatin mahni kea ding thei lo zawngin Delhi-a intlansiak min zirtir ṭhin hun kha kan pel tawh a, Delhi chawmhlawm kan ni tih reng maite kha a chi tawh lo.

Mi kan tluk a ni, mi tih ang kan ti thei a ni tih hi kan rilru put hmang tur a ni. Kan mualah inkhel hmuhnawm kan en leh thei dawn a, entu mipuiten mawi tak si, phur tak siin inkhel i en ang u. Inkhelhna tlak loh khawp boruak chhia kan siam palh hlauh ang e.

- Rualkhuma Hmar