Zu zuartute leh a dawrtute

Kum khat lai Mizoramah dan anga zu zawrh a ni ta a, sorkar sum lakluh pawh a pung viau bawk. Veng tam takin zu zawrh an duh loh laiin zu zuar ṭhenkhat chu an lo inchhuang ve khanglang niin an sawi. Cheng nga kir tur nei loa insawiin an kir duh ngai lo a, 'lei lo ula a ni mai lawm' tih chu consumer-te chhanna dawn a ni fo. Enfiah a ṭha khawp mai.

Zu hi thil ṭha chu a ni lo a, mahse Mizo-ramah kum 1985 chho khan kum hnih dawn zawrh a lo ni tawh a, Krismas vawi hnih a liam hnuah tihtawp a ni. Zu zawrh aṭanga Krismas vawi khat kan paltlang khan khawlai a ṭawpin zurui an tam a, zu um ruak lah khawlai
tiṭawptu a ni. Mahse Krismas vawihnihna kan hman meuh chuan a kum hmasa ai khan kan changkang a, khawlaiah mawi lo khawpa zuirui an tlem a, um ruak a vang ta pharh a nih kha.

Nikum March ni 16 aṭang khan kum 30 lai khap a nih hnuah zu zawrh a ni leh ta a, hmana zawrh a nih ang em em kha chuan kan buai ta lo. Hei hi Mizote kan changkan tawh vang te, zu-in mite'n zu zawrh tihtawp leh mai an hlauh vangin insumna nen an awm vangte a ni pakhat ang. Tuna kan kal mek dan hi tihtawp leh mai duh tam tak an awm laiin tihtawp leh mai chu uihawm tawh tak a ni.

Mizoramah zu khap a nih lai khan zu a vang chuang lo a, zu lei nan sum a hek em em thung. Zu mana Mizoram sum luanral hnemzia kha rapthlak tak a ni. State ṭhenawm Cachar leh Tripura aṭangin zu lakluh a ni a, Myanmar leh Bangladesh aṭang engemawzat lakluh ṭhin a ni bawk.

Kha zu lak luh aṭang khan sorkarin engtikawng mahin chhiah (tax) a la thei si lo a, kan state sum luanral nasat dan kha chhut ngam pawh a ni lo. Kohhran leh pawl hrang hrang te, political party hrang hrangte dona karah Congress sorkarin huaisen takin an zuar ta a, titawp mai tawh suh se.

Eptu party lian ber MNF chuan an sorkar chuan zu zawrh hi tihtawp an tum thu an puang fo mai. State sum dinhmun uluk taka thlirin sum lakluhna kan nei mumal lo a, kan pachhiat em em laiin state pawna luangral mai mai ṭhin zu aṭanga chhiah kan lalut ta hem hem a, hei hian hmasawnna tam tak a keng tel ngei ang. Kohhran mi vek kan ni a, kan kohhran hruaitu tlemte te'n zu zawrh do a, ṭawngṭai rual an huaihawt laite kha a ngaihawm lo ngawt mai.

- Lalkhirhvela