Exercise laiin Mask vuah a him em?

Covid-19 vangin nun­phung a buai a, mahse hriselna ngaih pawimawh a ngai si. Kan taksaa natna dotu immunity tih chak nan insawi zawi kan mamawh tih WHO chuan Guidelines zingah a telh ta hial a ni. 

World Health Orga­nisation (WHO) in June 2020 a khan Mask vuah chunga exercise lak loh tur, thawkna a tibuai thei tiin thu a chhuah a. Exercise lak laia mask kan vuah a, kan thlan chhuak leh far khan mit lawnga hmuh theih loh hrik (microorganisms) a siam thei a, a hrisel tawk lo tiin awareness a chhuah bawk a ni. 

He hri len chhung zawng hi chuan mask vuah a ṭul si a, hei vang hian kan in sawizawi laiin Mask vuah hi a him tawk em tih chu zawhna lian tak a ni ta. 

Mask vuah chunga exercise kan lak hian kan taksa in a mamawh oxygen chuapah a tlem a, kan thisen (bloodstream) ah oxygen  supply kan hip luh leh chhuah kha a tih  tlem phah a ni. Chu chuan kan chuap function pangngai aia nasa in hna a thawh tir a ngai ta ṭhin a ni. 

Kan tihrawl (muscles) chet theihna atana hna­thawktu a nih avangin, kan energy pawh kha a muang ve sawt dawn a, exercise lak laia Heart rate sang sa thlengin a tibuai thei a ni. 

Fitness level beginner (Exercise la an tur te) tan leh natna benvawn nei sate tan chuan exercise laia mask vuah hi loh theih loh a nih loh chuan pumpelh a ṭha. Mask kan vuah pawhin breathable mask vuah a ṭha. Exercise paha mask kan vuah a nih chuan kan Exercise lak dan ṭhin aia intensity tlem aṭangin ṭan phawt a, kan taksa in siam rem (adapt) hnuah kan exercise intensity level chu tihsan chauh tur a ni. 

Elite level leh Pro­fessional Training te chuan mask vuah chunga exercise lak hi a danglam na an hre lo mai thei; Oxygen Deprivation Mask ngei pawh Respiratory Fitness Level atan hman ṭhin a ni. 

Loh theih lohna avanga mask vuah a ngai a nih chuan i taksa in a dawnsawn (response) dan kha ngaichang la. Heng symptoms - thaw hah, vai ruai leh luhai, taksa mur chuai chuai te exercise lak laia i neih chuan exercise lak kha ti tawp la, midang awm lohna (6 feet a hlaah, guidelines angin) kalin i mask phelh la. Hahchawl la, ṭhu hahdam la, i hnarin thaw la la, ti chuan i ka in i thaw chhuak leh ang. Chutiang chuan vawi 10 cycle tal i ti dawn nia.

 

Kan sawi takte khian exercise eng pawh cardio, strength, endurance etc. training  a huam vek a ni.