DELHI AṬANGA AIZAWL

Lockdown hma March thla tir aṭanga Delhi zin kha 3rd Oct-ah Lengpui ka kir a, Conoravirus do dan leh invenna kawnga Mizoram State tihdan phung hi a mak hlein ka hria. 

Ka zin kal lamin Guwahati leh Delhi Airport an fimkhurin Social Distancing an vawng ṭha hle. Ka lo haw lam pawhin Delhi Airport chhung mihring tam lutukah pawh engkimah an lo fimkhur lehzual. Thlawhna chhung Seat pathum intlara Seat laia ṭhu tur chu Terminal chhung Waiting Gate pawnah PPE haktir nghal vek an ni a, mi dang fimkhur zual deuh tan pawh dil theih a ni. Airport danga tih ang bawkin - Face Mask, Face Shield, Sanitizer sem vek a ni. Thlawhna chhungah pawh Air-hostess te an fimkhur em em. 

Lengpui Airport kan lo ṭum a, mihring 100 bawr kan ni a, Mizo aiin Vai an tam zawk, a hmain Flight khat 80 bawr an thleng tawh a, ni khatah Lengpuiah mihring 200 tling lo lo lut ang a ni. In Report-na hmun hi Terminal chhung chung, Terminal Building dinglam sir Step zim tak aṭanga luh chhoh ngai a ni. Cinema Hall-a ticket la tur ang maiin Step luh ṭanna tualah kan awmkhawm a, Step-ah chuan insi deuhthawin kan ding chho khat bawk a. Airport Cute ber Lengpui Airport nge nge Social Distancing a ngai ve lo a ni ang e.

Office chhung pindan zim teah chuan Form pekchhuah, Thlalakna leh ILP an lo tikawp a, kan inhnawh hung mai a. "Aw Lalpa min venghim rawh, upa lam leh hrisel lo ka nih hi," ka ti nghal a. State hrang hrang aṭanga Vai Sipai Chhuti lo haw, Vai Civil ILP dil leh check nen duhthusama Hot Spot a ni. Hemi zawh hian Terminal chhung chung Waiting Room ah M-Pass Number leh Identification tur fill up, RAT & Rt PCR test, Home Quarantine leh Quarantine Centre-a lut tur chinfelna a lo awm leh a. Keini awmkhawm hungte chu hnathawktu pachang leh nuchangte'n awrawl tâwpin Information hrang hrang min han pe a. Kan inzawta nuihte a za a, India ram puma Airport chhung bengchheng ber kan ni mai thei, a nih loh pawhin, Social Distancing awm miah lohna, Airport No 1 kan nih ka ring. Test neite hi Result nghahtir lovin hawtir mai se, Vaiho ILP buaipui ngai hi a hranin Counter ṭhenhran ni se, thlalakna pawh hi hmun hranah buatsaih ni se. He Airport chhunga mihring awmkhawmtir vak hi Covid do dan mak tak a ni a, Central leh State SOP bawhchhiatna a ni.

Hlau leh si fimkhur em em ve thung - Airport chhung aṭangin mahni bungrua kan han nawr chhuak a. Pawnah Official duty te'n kal kalna tur Taxi an lo remruat a, Taxi Driver-te'n kan bungrua an khawih thiang ve ta hauh lo, bungrua a rih pawhin thapui chhuaha mahni hlân a ngai. Official emaw Taxi Driver lam tute mah Glove bun pawh an awm lem lo thung. Airport dangah chuan hnathawktute'n Glove an bun vek thung a. Taxi chhungah Driver leh Passenger inkarah Sarang emaw Silpouline an zar a, kan va fimkhur leh si em ve aw!

Keia lo haw tur khan Aizawl DC ka bia a, Kan Vengin Home Quarantine an la phal si lo a. Hotel emaw Tourist Lodge, Chaltlang emaw min pe turin ka dil a, "Chaltlang kan pe dawn che nia," a ti a. 2nd Oct zanah DC aṭangin Staff-in min rawn bia a. Home Quarantine tur nge, QC-ah a rawn ti a. Keiin, "Tourist Lodge, Chaltlang kha, mahni intum senso in phal tho a ni lawm ni," ka ti a. A niin, "Ni e, a nih chuan Airport aṭanga lo hawna tur Motor hi Private kan phal meuh lo a, Taxi phur tur bik kan ruahman a,"  a ti a. Keiin, "Taxi chu a ṭha e," ka ti a. QC Tourist Lodge leh Taxi vel chu tifel mai turah ngaiin M-Pass te neiin 3rd Oct Delhi - Aizawl via Guwahati ka lo haw ta a. Engkimah Mizoram sawrkar senso tur Rs. 1/- pawh awm lo turah ka inngai. Mahse, Tourist Lodge booking leh phalna vel kha an lo tifel hauh lo, Lengpui Duty Officer, DC lam chuan List an en a, ka lo tel hauh lo. Kalhmang ka hre lo pawh a ni ang. Minister-te thusawi aṭangin lo haw leh zin vak tlem tawhah Quarantine Centre-te pawh ruak titih tawh niin ka hria a. India ram pum Airlines Services a buai a, Flight Cancel a tam a, lo hawte dinhmunah Protocol rawn zawm fel loh a awm thei, Hotel, Lodge, QC luhna turah lo haw hmaa tihfel hmasak loh a awm thei. Helaia lo buaipuitute'n QC leh HQ dah turah a tlachawpa remruat rum rum ngai a awm bawk ang. Mihring tlem State-ah engmah thil harsa em em awm tawh turah ka ngai lem lo. 

Mualpuiah chuan Taxi aṭangin Bungrua ka hlang thla a, Driver-in Rate a sawi angin Rs 1500/- ka pe a. Report-naah chuan ka hming, Pa hming leh phone Number an la a, "SAI Centre-ah i kal dawn nia, Motor kan ngaihtuah ang. Centre-ah Chaw a awm tawh dawn lo a, hetah i ei duh chuan Rs 150/-" an ti a, Ka riltam tawh nen ka ei a. Chaltlang Tourist Lodge pan tura inngai kha, SAI Centre, Mission Vengthlanga awm a ngai dawn ta phawt a, E hiau ka ti rilru a. Mahse kan naute'n Urgent ruahmanna an lo siam a, Tourist Lodge zawkah ka kal ta zawk a. Sumo min ngaihtuah sak a, fare Rs 1000/- dawhkanah min dahtir a. Mualpuia Report hi a pawimawh tlat si ni awm tak a ni, tunlaiah phone hmanga in-report theih mai awm tak chu a nia. Khu laiah khuan Inter State Sumo leh Taxi Service-te abikin an lo Services tir a, lo haw apiang Rate an lo siam zel a, lo haw tan hausak deuh erawh a ngaih hmel.

Tourist Lodge, Room No 313 min pe a, Khum 2, Dawhkan 2, Chair 5, Darthlalang, Bucket ah tui in tur, Bathroom ah Bucket 2 leh Sahbawn 1. Ka damdawi ei lai leh injection lam dahṭhatna tur Fridge a awm lo. Zing dar 7.00 ka'n harh a, zing Thingpui min pe dawn em tiin intercom kan hmang dawn a, a nung lo teh tlat. Kawngkhar hawngin Varanda ka chhuak a, mihring tumah an awm hnai lo. Ralkhat aṭangin hmeichhia pakhatin, "Ka Pu chhuak suh, Room pawn chhuah awih loh," min rawn ti a. Keiin, "Zing Thingpui min pe dawn em, intercom a hman theih loh," ka ti a, "Intercom chu kan rawn siam ṭha ang," a ti a. Mahse, kawngkhar pawn chhuaka Varanda ka chhuak kha Dan ka lo bawhchhe nghal a lo ni. Positive pawh ni ila tumah ka kai darh hmel loh viau. Intercom-ah chuan kan inbia a, ni tin riah leh ei man Rs 700/- ka chawi ang a, Zing Chaw, Chhunah Thingpui, Tlaiah chaw - chung chu ka daily ration dawn dan tur a ni. Ka ei tam loh leh ka rilṭam ang a, ka cher ang a, Rt-PCR test hunah Virus a lang chiang duhte pawh a ni mahna...

Mahse, ka natna Diabeties nen chuan eiin chhangkhât tur hi a inmil loh hmel viau. Mizoram mahni in leh Delhi, Guwahati, Kolkata vel ka zin pawha Thingpui lumna Current hmang lei nghal a, Protein, Coffee, Thingpui Room-a inlum chawp nghal ṭhin, Nuts leh Thei chi hrang hrang hmawm reng ka ni a. Helai QC Protocol ah chuan Current hmang thil dang hman phal loh a'n ni phawt a. Kan va fimkhur bik em aw. 

Lengpui Airport-ah erawh mihlim Zaikhawm tui lâm mup mup ang maiin kan inpawlh sawp a, pawn aṭangin kan han fimkhur leh em em a. Hripui kai miah lovin ka lo haw a, Delhi Airport, Guwahati Airport leh Thlawhna chhungah Face Mask, Face Shield, Sanitizer hmangin Distancing ka zàwm a, Virus ka lo kai haw a nih chuan Lengpui Airport Social Distancing awm lo kha a ni ang.