Aikal la lo chawl tawh ru le

Mizoram sorkar hnathawk zingah aikal la an la awm tam viau niin an sawi. Aikal lak ngei ngei ngai an awm laiin, aikal la laklawh tawh, an hna pawh thawk thiam tawh mang lo an awm fur a ni awm e. Heng ho hi chu zak loin lo châwl tawh u la, lo bâng tawh mai teh u; in zahpuiawm tawh riau mai.

A ruh langa sawi a chakawm ṭhin mang e. Officer liante'n an laina hnai sorkar hnaah an thun ruih ruih a, an mi thunte kha an hnaah an tui leh si lo a, an thiamna pawhin a pha bik lo a ni ang, aikal an la ta char char mai ṭhin a ni. An aia kalte chu hlawh an la pe tlem em em zui. Hei chu a dik mawlh lo.

Aikal la zingah zirtirtu an tam viau. Ka hriat pakhat phei chu sorkar hna thawk tura a luh danah chhungkaw induhsakna tâwp­khâwk a ni. A luh tirh aṭangin aikal a la a, ani chu an âwl daih. Tunah zirtirna han pe leh dawn se, a thiam pawh a thiam tawh kher lo ang tih tur a ni. Hetiang mi dik lo hi chu sorkar hian bân tawp ngam se, a aia kal ngar ngar kha dah nghet mai se tiin chhuanmang rorel takin ka lo rêl ve a nih chu.

An tia lawm, zirtirtu pakhat chuan aikal a la ve a, mahse, sorkarin aikal lak chungchangah khirh a tum tih a hriat khan a aikal lak chu kaltir zel tho khan amah pawh ni tin sikul a kal ve ziah nia maw le! A fair nge fair lo chu ka hre lo a, a hna a ngaihsak tih chu a hriat a, mahse, a zirtir peih vak tawh si lo khan aikal a la ta mai ni awm a ni. A ti tha angreng fu ka tia.

Chief Minister sawi tawh angin, aikal la lo thei lo eng emaw zat an awm ang. Chungte chu ngaihhnathiam an nih tur thu pawh a sawi lâwk tawh. Chumi piaha aikal la chu an lakah khawng taka kalpui tur a ni. Sawi tawh chu sawi tawh. An ti leh si lo a nih chuan a sorkar ang pawhin an mualpho thei. Mipui hian kan lo en ve kar a nia.

CM sawi angin mitthi tawh la service anga aikal la kaltir zel mi 9 an awm; a va fair lo tak. An hlawh leh hamṭhatna an lak tawh zawng zawng pawh lak kir leh vek tlak, pension pawh laktir loh hial chi a ni. A zahthlak em em lutuk. Chhungte thi tawh, la dam anga mi dang lo la chhawrte chu hremna pek ngei chi an ni.

Aikal la zingah dam ṭha tak, eizawnna dang neia hausa taka khawsa pawh sawi tur an tam mai. Heng aikal late hian sumdawnna dangte an nei a, an aikalte hlawh an pek tlem chu thu hran, an hlawh pawh an sumdawnna aṭanga teh chuan tlem tak a ni ang.

Aw le, sorkar hian a sawi tawh angin aikal late han chingfel se, bân ngai pawh bân mai rawh se. Lehkhathiam hna nei lo fel tak tak an kat nuk tawh hi. Aikal late pawh zak ve em em teh u. In thawh peih loh chuan bâng mai ngam bawk teh u. .

-Lalkhirhvela