NUTE NI (Mothers’ Day) 12 May 2024
Thufingte 12:4
“ Hmeichhe (nupui) khawsak ṭha chu a pasal tan lallukhum a ni”.
May thla Sunday vawi hnihna hi Khawvel pumah kum tinin Nute Ni atan hman a ni ṭhin a. Kumin 2024-ah hian 12 May hi Nute Ni a lo ni leh ta.
Nute Ni awmzia tak leh a tobul chu Nute hriatrengna leh chawimawina Ni tur atana buatsaih a ni. Kum 1872 khan USA-a awm nula Julia Ward Howe-i chuan Nute Ni bik siam a, hman a lo rawt chhuak a. A hnuah nula Mary Towless Saseen-I Kentuckey bial a mi chuan rawn puibawmin kum khat chhunga ni khat tal chu Nute pual ni hman a rawn rawt ve leh a. Mite rilruah a tla na viau a, chu rawtna ṭha tak mai chu USA-a Grafton khaw nula, a nuin a thihsan hnua khawhar taka awm Miss Anna Jarvis-i chuan May Sunday vawi hnihna chu Nute Ni atana hman ni se, tiin Campaign a bei ta a, a hlawhtling ta viau mai a. USA-a Andrew Methodist Episcopal Church te tuipuina avang chuan 10 May, 1908-ah chuan Grafton leh Philadelphia khuaah te chuan Nute Ni chu an hmang ta a. Chuta kal khawm te chuan an kawr awmah an nute hriatreng nan leh chawimawi nan pangpar an tar ṭheuh a, chu chuan mi thinlungah thu a sawi nasat tak em avangin USA President Mr Woodrow Wilson chuan Sawrkar thu tih tluk chu puangin, Ni 8 May 1914 chu Nute Ni atan a ram pumpuia hman tur leh Sawrkar Building-ah te an ram Flag chu zar turin thupek a lo chhuah ta a. May Ni 8 alo thlen chuan American mipui chhung tin te chuan chu Nute Ni chu an hmangin an hlimpui hle mai a, kum tina hman zui zel ni se, ti a rawtna chu ngai pawimawhin, kum tin May thla Sunday vawi hnihna (May 2nd Sunday) chu Nute Ni atan an lo nemnghet ta a ni.
He Nute Ni hlimawm leh hlu tak mai hian British ram pawh a kangkai nghal thuai a, sawrkar pawhin May thla Sunday vawi hnihna chu Nute Ni atan alo hmang ve leh ta a.
Kum 1920 khan Salvation Army rorelna sang International Management Council chuan an Kohhran tan Nute Ni chu High Day-ah puangin kum tina hman turin Order a tichhuak ta a. Chu chuan he ni pawimawh leh hlu tak mai hi a ti lar zual ta hle a, India ramah pawh 1920 khan hman tan a lo ni ve ta.
Mizoram bikah chuan Nute Ni hi Sialhawk khuaah Captain Khuanghnuna hovin kum 1932 khan hman ṭan niin, hei hi Kum tin hman zel a ni. Kumin 2024 hi Mizorama Chhandamna Sipai Pawlte’n Nute Ni an hman kum 92-na a lo ni ta.
Nute Ni hi Nu nei tawh lo te tan an nute hriatrengna hun a niin, an nute la dampuitute chawimawina hun ṭha leh hlu tak mai a ni.
Kumin 12 May, 2024 hian Mizorama Chhandamna Sipai Pawl Biak in tinah zing dar 10 aṭangin Nute Ni (Mother’s Day) hi hman a ni anga, han chhim ve ta che. Naupang leh Puitling ten hla sa chungin Nute pangpar bawr an hlan ang a, Naupangten (SA Hlabu No.492) sain,
Ch.3 “Ka nu, ka nu duh tak,
Min dampui reng ang che;
Ka tha leh tui ka thawh rahte,
Damten ring ve ang che.
Ch.4 Relthang ka dawn zo lo,
Lenrual laiah hianin;
Ka silh leh fen ka nunna ber,
Lawman parmawi chawi rawh”.
tia pangpar an hlan mek laiin, nuho te chuan (SA Hlabu No.493)
Ch.2 “Duh thu sam luat awm lo,
Awmlai beng ngawng sela;
Finna tinreng chhiarin zir la,
Bawihte, sang tual tual rawh.
Ch.4 Finna thatna bul chu,
Pathian zah hi a ni;
I kawng zawng zawngte a hmaah,
Malsawm dil thin ang che”.
tiin an lo chhawn ve anga, ilo thlir anga I thinlung a hneh hle ngei ang.
Nute Ni chibai vek ule.
- Lt. Col. Lalramhluna