NGAIHSANAWM A THANGLURA

Pu A Thanglura kum 1959 mautam ṭam laia Assam MLA kha kan ram Politik kheltute zingah chuan a ngaihsanawm ber zawkin zu han hre thar leh ta tlat mai ia maw le! Mautam ṭam dotu pawl, Mizo National Famine Front ho khan kha Mautam Ṭampui mitthi kha dovin, ṭam a reh hnuin MNFF chu ṭhiatin MNF a piang ta a. Chutih lai chuan Pu A Thanglura chuan Congress a din ve mauh mai a. MNF-in Independence kan sawi mawi laiin, ani chuan Congress a sawi mawi tlat mai thung!

Mautam ṭam lai khan Mizoramin Assam-ah MLA 3 kan nei ve a, a paurau ber chu A Thanglura a ni. MLA dang 2-ten Assembly Hall-ah thu an sawi ve lo va, an ngawih laiin ani chuan kan ṭam thu a hlap piap piap mai a, “Fahrah enin min en em ni?” ti khawp hiala a thusawi avang chuan Chief Minister Chaliha meuh pawh mittui tla thei hial khawpin a chhuak a nih kha.

MZP-in Denam Hall-ah Public Meeting neiin, Pu Lura chu chhuahchhal hrep mai kan tum a, tah chuan Chairman chu Pu R Zamawia a ni. Pu Lura chuan thiamthu a sawi a, “Mautam tam laia Assembly Hall-a mittui tla ṭeuhva thu ka sawi lai a, Pu Chaliha pawh a mittui tlaa a chhuah tak kha in hria a ni lo'm ni? Tuna taka Congress ka zawm tak avanga Kross-a min khenbeh in tum tak mai hi, ngaihtuah chiang rawh u. Independence te zawng in lu in tauh keh in tauh keh mai ang. Pu Nehrua Prime Minister hian, Scotland ram inrelbawl dan (Scotish Patern) khu in ṭan chuan a ṭha ber ang, a tih hi ṭha ber turah ka ngai,” a ti ve hmiah mai a. Scotish Patern, Scotland ram awm dan anga min awmtir; Nehrua khan min duhsak a lo nih chu. Chu chu State aia ṭha ngial a ni.

Anmahni, Scotist- ho ngei pawh mipui duhthlanna an neihtir a, United Kingdom-a awm zui zel an thlang a ni. World Cup inchuhnaah pawh Scotland emaw Wales hmingin an chhuak thei a, State ringawt ai chuan a ṭha ngial a ni.

India Prime Minister hmasa ber rawtna kha Pu Lura chuan ṭha hlein a hria. Tharum thawh si lova mahnia awm theihna (Self-determination) neih theihna huang a lo nih chu. Keini ho khan a pawnga taka silai nena Independence kan lo puang ve ringawt mai kha a atthlakzia a lang. Tunah phei chuan UNO thupuan dungzuiin, Self-determination kan nei thei leh ta a, tihdan kan thiam phawt chuan chu chu kan chhuantawlawl ber a ni thei a nih chu.

“UNO Thupuan (UNDRIP) Article 46 (a) hian a dang tlat,” tia sawi tate hi chuan an man fuh lo a ni. India ram ṭhen darh kan phut lo. Govt of India Act 1935 dung zuiin, Tribal Area te kha chu India ram chhunga awm kan ni lo va, India leh Burma te ramri hrula awm kan ni zawk. Article No 3 leh 42 leh 46 (b) angin kan dikna chanvo kan sawi thei miau alawm UNO Permanent Forum Session 23-na April ni 15-26, 2024 thuchhuak ang chuan, kum 2030-ah thutlukna siam tum mek a ni a. Chu chu bawhzui nan July, 2024-ah pawh sawi zui a ni dawn a, ṭan lakna chang kan hre dawn lo'm ni?

Pu Lura Politik lamtluang kha lo zawh ta zawk ila chuan, ralthuam kan chelek vanga khawkhawmna rapthlak tak leh nunna tam tak channa kan pumpelh ang. Scotish Patern ang chuan self-determination (duhthlanna thianghlim) kan nei thei ang - UNO Thupuan 2007 tel lo pawhin. Politik kawng bosal tawh lovin, UNO Thupuan thar hi i bawhpelh lul lo ang u. A Politik lalram chu i zawng hmasa ang u, kan ti nawn awn awn a nih hi!

- Dr KEIHAWLA SAILO

Member, World Peace Institute of the UN