KAN RAMA BAWNG SA/VAWK SA LEH SA DANG LEI HI

Vanglaini, ni 10.5.2024 chhuak, Editorial hnuaia ‘Hnam dang bawng sa zuar’ tih kha ka lo chhiar ve a, ṭha ka ti hle mai a, kan rama mipuite hian abikin sa zuar hrim hrimte hian chhiar ve hlawm se ka ti ngei mai. Kha thu kha han belhchhah ve ka duh a, tawi tein ka’n ziak ve a ni.

Vawi khat chu, a rei tawh deuh, Aizawl Treasury Square-a sa dawrah vawk sa kg. khat lek lei ka tum a, a thithun lian ang reng tak, powa khat aiin a zang lo vang tih hriat reng reng hi mi pek tel a tum a, "A thithun kan ei ngai lo, kha chu telh suh," ka ti a, "Telh a ṭul tlat," a ti a, "A nih chuan ka lei lo mai ang," ka ti a, ani pawh chuan, "Lei lo mai rawh," a ti ve mai bawk a, kan indawr ta lo a ni.

Vawi khat dang chu Shillong-ah vawk sa ka lei ve a, a sa chhia ang chi han paih tur chuang hi a awm lo reng reng, sil faia chhum mai theih vek a ni. Kan ramah chuan vawk sate hi a leituin a ziah fai fe loh chuan han chhum mai chi a ni lo, a vun leh a hmul - tha seng fea ziah fai chawp ngai hi a tam em em mai zel a. Vanglainia sawi ang khan a thin lei ve pawh ni ila, a thin tak chu a hmingin a tel ve lek fang a ni zel. Mi ramah chuan, a thin lei chuan a thin, a ti lei chuan a ti, a hlap duan dar leh sa chhe dang tel ve a awm ngai lo hle niin a lang. Chuvangin vawk sa zuarte pawh hian a vun leh a hmulte hi lei tur chi tawh phawt chu fai takin ziat vek se la, ei tlak loh, paih ngai ang chi hi telh lui tawh ngai lo se a ṭha ngawt mai.

Mipuite pawh hian kan thikthu kan tih chhiat ngam a ṭul ve ta hlein ka hria. Chutiangin bawng sa zuar te, ar sa leh sa dang zuar reng rengten a leitu duh ang zelin pe thei ṭhin tawh se, hmasawnna duhawm tak a ni ngei ang.

- T. Vanlawma, Hunthar.