Model Village malsawmna nge anchhia?
Tun hma pawha kan la hriat ngai hauh loh, kan Prime Minister Pu Narendra Modi chuan MP thlan zawhah MP bial tinah Model Village pakhat siam turin a puang a. Hetiang chiah bawk hian MLA thlan zawh-ah MLA bial tinah Model Village pakhat zel puanga siam turin a puang leh a.
Tichuan, Mizoram-ah pawh Model Village 2+40 = 42 kan nei dawn tihna a nih chu. Kan va changkang deuh mai awm em a tih theih mai awm e!
Model Village han tih hian kan rilrua lo lang phatah chuan thingtlang khaw dangte aia changkang tur, an khaw entawn tur a nih duh hmel hle. Kawng engkimah a model ni awm tak a ni! Chutiang tur chuan kan PM pawh hian a mitthla turah ngai ila. Keini pawhin development lamah pawh changkang deuh bik leh khawdang mit fukna ni turah kan dah a ni. Mahse chu chu a ni ta hauh lo mai!
Duhsak a hnekin an development sum dawn ang angte pawh ni danga an hman ang thovin an kal a, model village an nih tak avangin a khaw mipuiten an thawh hnem deuh a ngai ta zawk a ang hle mai. Model village an nih tak avangin sanitation lamah pawh mitin an ṭan lehzual a ngai ta.
Kawng hrang hrangah tun hma aia an thawh nasat a ngai ni awm takin hotu lam aṭang chuan sawi a ni. A awmzia takah chuan mahni thawh rah liau liau a model village tur a ang deuh ber awm e.
Hetiang hi kan Prime Minister lo mitthla dan chu em ni dawn le? Nge kan PM hi a ṭawng duh ve a, a sawi liam ve mai mai ni ang le? Tuna a lan dan takah chuan Model Village hi ‘anchhia’ a ang zawmah awm asin!
Khaw ṭhenawm dangte aiin develop-ment pawisa dawn a tam chuang si lo, V/C-ten khawtlang thenfai hnatlang an ko sek mai bawk si. Heti hrep ai chuan model village a puan loh khua nih a chakawm mai dawn a lawm le!
Tunah tak hi chuan kan Zoram khawvela thingtlang khua tam berte hi chu NLUP leh MGNREGA avang hian a hminga thawk ve leu leuin pawisa kan dawng zel tawh mai si; model village kan kalpui dan hi mipuite tan hriatthiam a har duh fut mai. Hun lokal zel turah pawh kan model village puante hi heti mai maia enkawl a nih dawn chuan puan nih hi anchhia ah kan la inngaih sak mai ang tih a hlauhawm thei mai awm e!
Kan hruaitute pawhin ngaihtuah chiang ula, heti reng renga model village in nihtir hi a model lo em a, central lam thleng thleng pawhin thawm han neih ring deuh teh u a! A tira kan Zoram kan hlim a, Model Village kan ngaih ropui tehlul nen, tunah chuan anchhiaah kan ngai mai dawn a lawm le! Kan PM ber pawh hi thu feikibar deuh nen kan hruaitute hian han hlan teh u.
- Patrick Z, chhingchhip