NUIH A ZA ṬHIN

Nihna baka lan nuam ti tlat, ropui lo nih hlau, lar leh lan tam khel hruaitu hi pawl hrang hrang kan tam ang bawk hian kan kat nuk ta awm asin. Chutiang mi chuan an hriat lohin mi nuihbawm an hawlh keh sak fo.

Ṭhenkhat thung chu lar aia a kila lung ṭangkai nih tum ve tlat an awm bawk. Chung mite chuan mipui hriat hlawh nih tum loin a thawhin an thawk a, a hre chiang apiangin an fak rawn thung.

Ṭhenkhat chuan ropui nih tumin lar kan khel a, zo lo ta fe fe kan awm phah. Kan ram hruaitute aṭanga khawtlang hruaitu, kohhran thleng pawhin he thil hian zung a kaih tawh.

Kan ramah hian pawl hrang hrang a awm a, kan inpawlh-sawp viau bawk. Hengah te hian a ṭul leh ṭha kan tih angin hruaitu kan thlang ṭhin a, kan thlan chhuah
ṭhenkhat chuan hruaitu an nihna an hre lo leh ta tlat ṭhin a. Hotu awma awm kan kat nuk a, nuih an ti za pha hial!

Kan ram roreltute pawhin thawh tama kan ram enkawl leh an bial hmasawnna lam ngaihtuah aiin secretary, officer rual zuitu neih tam nuam an tih zawk tlat ṭhinna hmun kan nih chhung hi chuan ‘change’ hi sawi ve sawi ve ngam tur pawh kan ni lo.

Hruaitu dinhmun hre lo, rawngbawl chhan pawh hre lo hi kan tam ta viau awm e. Mahni theih dan leh duh dan ang angin sawrkar bungrua, pawl bungrua, sakhaw kaihhnawih thil hrang hrang hi kan khawih nawmnah niin a lang.

Ram changkangte hmasawn chakzia leh an hruaitute ropuizia te kan sawi fo mai. A entawn tlakzia kan sawi chamchi a, a sawitute ber hian amah entawn a, hmahruaitu nih kan tum leh chuang lem hlei lo a. Mi chet chhiatna sawi nuam kan ti em em a, an tih dik loh ṭha taka hrilh aiin vuak let erh nuam ti zawk hi hmun tinah kan kat nuk bawk.

Ṭhuthmunah kan lal kan hrawt a, hmahruaitu nih aiin kawkkualtu nih nuam kan ti tawh a. Kan hruai mipuite tuihal tur pek aiin mahni inhai vurna tur ringawt kan ngaihtuah a, hmasawnna tluantling chu kan la hlat deuh.

- Lalvansanga Pautu