A sawina hmun tur a awm

Tun hnaiah Kohhran thil leh Kohhran chungchang chanchinbu lamah an ziak kan chhuar nasa hle mai a, heng zinga a ziaktu tam zawk hi chuan Kohhran sawiselna lam hi an ziak ṭhin. A sawiseltu zingah hian mi pangngai kan tihte bakah pastor meuh pawh an awm ve tho a, ka ngaihdan chuan sawiselna tur hun leh hmun hi a awmin ka hria.

Chanchinbua sawiseltu tam zawk hi chuan siamṭhat an tumin ka hre lo. Keia ngaihdanah chuan Kohhran hi kan vei a, siam ṭhat kan duh a nih chuan a chhungah kan luhchilhin kan bei tur a ni. Kohhran Committee a awm a, a chungah Bial, chutiangin Synod thlengin a awm a, heng chhunga mite hnenah hian kan ngaihdan hi kan hrilh mai tur a ni. Ka ngaihdan kal zelah chuan Tualchhung Kohhran phei chu kan duh phawt chuan Kohhran Committee-ah ziakin ngaihdan kan pe lut thei a, chanchinbua ziak kher hi chu intih mualpho tumna bak a niin ka hre lo.

Bial Inkhawmpuiah chuan chhang an lo sem tam deuh a, pawisa a luangral hnem a nih pawhin kohhran committee hnenah lehkha thawnin, "Heng kan sum sente hi kohhran mipui thawh khawm a ni si a, inrenchem deuhin i kal teh ang u. Kan intuituah ta mah mah a ni e," tiin lehkha thehlut mai se a tawk a ni. Chumi ti duh mang si lova, "Palaiah min ruata kan ei reng mai kha a tuiin a tam si, a man a to awm si," tia patling ṭhankin ram pum hriata chanchinbu lama au au mai hi chu keia ngaihdan a ni lo.

Kohhran hi khawvel thila pawl dangte nen a inang lo. Political party leh pawl dang hi chu an kal danah kan lungawi lo a nih pawhin sawisel mai hi a pawi ka ti lo. Chanchinbuah pawh kan ngaihdana an kal loh chuan kan khak ngam tur a ni. YMA a ni emaw, MZP a ni emaw kan khak ngam tur a ni.

Central YMA inthlan dan leh an campaign dan te, zirlai pawlin sum lakluhna sawi tur awm mang si lova sum an neih dante hi kan ngaimawh tlang a, kan sawi chhuak zeuh zeuh a, hengte hi a sawina tur dik nia ka ngaih chu chanchinbute hi a ni. Kohhran kal dana kan duh loh zawng hi chanchinbua sawi chhuah vak vak chi a ni ve lova, Kohhran hi chu thlarau lam thil a ni a, khawvela pawlte nen inang khata en tur a ni lo vamg. Tun hnaiah Kohhran hlutna hre lo kan pung a, Bial Inkhawmpui Palai zingah ngei pawh Kohhran sawiselna ziak hreh lo, a palai nihna inkhawmpuia an chhang sem mante mahni thu thua lo chhut a, "Kohhran inkhawmpui palaite hi kan intuituah," tia au au ṭhin kan nei ta hi a vanduaithlak khawp mai.

Pawl kal dan kan duh lohte hi chu tun hmaa 'direct hit' tih ang khan sawisel pawp mai a pawi ka ti lo. Heng pawlte hi chu keimahni avanga awm mai mai a ni a, mihringte din a ni. Kohhran hi chu mihring din a ni ve lo. Khawvel pawl dang anga sawisel chiam chiam turah ka ruat lo. Kohhran nihna hre chiang chuan sawiselna tur an hriat pawhin an au chhuahpui kher lo a, a thlenna tur dikah mi hriat lohin an thlen mai a ni.

Kohhran hi sawisel thiang lo a ni lova, sawiselna tur hmun bik a awmin kei chuan ka hria. Chuvangin insum deuh ila, kan ngaihdan a nih loh pawhin chanchinbu lama Synod Inkhawmpui thingpui hmeh leh ruaia an ei tuizia leh an insen tamzia lam hi chu i sawi i sawi tawh lo ang u. A sawina tur hun leh hmun kan hriat a ngai a, chu chu mi puitling tehna a ni ngai e.

- Lalremmawia Chhangte