ZPM CM Candidate kha 'A ZPM lutuk' tiin an hek!

Tunlaia Mizorama politics thu khel ber chu kan sorkarin ram hmasawnna tur a ngaihtuah dan lam a ni lova, kan ram kal zel dan tura ngaihdan inang lo (debate) tih lam pawh a ni lo; ZPM Chief Ministerial candidate Pu Lalduhoma, 'A ZPM lutuk a chet dan hi,' tia an hekna lam a ni. He kan Mizoramah hian khua a var mawlh lo chu a nih hi mawle.

MNF MLA 12 te hian an thil tih hi an duh vang renga an tih a nih leh nih loh lam hi inhnialna turah ka ngai ve lova, an duh lo chung tih tir theiha an awm a nih ngai chuan ram roreltu ni lovin tute emaw 'sal' ang chauh an ni dawn tiin a thlir theih a, anmahni duh thua an tih a nih hi pawm thlap tur a ni. 

A chhan chu patling satliah pawh ni lo, Assembly Bial khat enkawltu MLA meuhvin anmahni hming ṭheuh ziakin, "Pu Speaker, Pu Lalduhoma chet dan hi a ZPM lutuk a, ZPM party thil tihah a inlan a, hei hian dan a bawhchhiat avangin MLA aṭangin ban rawh," tiin an hek a ni. Thu khuh ṭit ṭet pawh a ngai tawh lova, Chief Minister leh MNF President lam tih tir anga ngaih ṭalh pawh a ṭul lo; an hming ziak meuhin anni aia thiamna, experience leh MLA seniority pawha sang zawk chu MLA aṭanga ban turin an han ti tawp mai a ni a. He khawvel hi a la awm zel a nih chuan Mizo hmuha thil tih awm lo tak an ni tih hi chhinchhiah hlen a ni tawh dawn a ni.

Congress President Pu Lalthanhawla hi Pu Lalduhoma'n a paih thlak a ni a, Serchhip biala tuma hneh theih loh Pu Hawla chu Pu Duhoma hian hnehin tunah chuan MLA pawh ni lovin Pu Hawla hi a awm mek a ni. 

Pu Hawla hian Pu Duhoma disqualify tur hi thlawp ber tura a lan laiin, "Kristiante hmingchhiatna a tling," tiin MLA 12-in Pu Duhoma an hek chu mak a tih thu a sawi a, a thlang tlingtu Serchhip bial mipui zahlohna a nih thu pawh a sawi a ni. 

Kan pute hian ngaih­tuah ve leh se ka tih mai mai chu Pu Duhoma hian MLA candidate a nih dawn khan Independent-in inziak lut mah se a symbol-ah ZPM symbol, flag pawh ZPM, campaign ban­ner leh poster ah pawh ZPM vek a nih mai bakah ZPM chuan an Chief Ministe­rial Candidate atan an hmang a ni. 

Chu pa chu ZPM party office lama a kal avanga, "MLA aṭangin bang rawh se," tih hi chu thil mak a ni. Pu Duhoma hian MLA Fund lo eiruin, dawt sawiin MLA a niha a tih loh tur lo ti se chu ban tir hi a pawm theih a, amaherawhchu ZPM CM Candidate ve meuh, "Independent candidate a ni si a, a chet dan hi a ZPM lutuk," tih avang ringawta MLA aṭanga mahni MLA pui bantir tuma hek duhna thinlung hi ṭhangtharte chuan mak an la ti dawn chauh a ni.