NLUP thlaktu tur 'NEDP' ka zir ve a

“Economist” ka ni lova, “Planner” leh “Policy Maker” pawh ka ni hek lo. Ka phak ang tawk tawka hun engemaw chen thil chi hrang hrang ka tawnhriat leh zir chhuah ve aṭangin Mizoram sorkarin policy puitham tak a duan chhuah “New Economic Development Policy (NEDP)” an tih mai, ṭhenkhatin “NLUP thlaktu tur policy” an tih bawk chu ka lo zir ve a. Sorkar kal dan turah hian a tam thei ang ber mipui teltir ve (people’s participation) hi tunlai khawvel duhdan a ni ta bawk a, he thu hi ka han ziak ve hrawih a ni.

NEDP hi Mizoram State Planning Board, Planning & Programme Implementation Department ruahman niin 1/8 demy book size, phek 42 a sei niin Chief Minister Pu Lal Thanhawla’n introductory message a ziak. “New Economic Development Policy (Comprehensive Growth Strategy for Mizoram)” tih hi a Mizo ṭawng chuan dah dawn ta ila - “Eibar zawnna policy thar (Mizoram hmasawnna tura huam zau taka ruahmanna)” kan ti thei ang. Ram kalphung ngaihven leh zir peihte tan chuan thu rilru la tak, zirchian chakawm tak a ni.

Thu lawmawm tak a ni

Mizoram dinhmun sawihawnnain bul a inṭan a, he policy-in a tum te, hmalakna tura thlan chhuah bik sector - Agriculture & Allied Sector, Industry – Manufacturing Sector, Infrastructure Development, Service Sector te a nih thu kan hre leh a. Agriculture lam tinung thar tura ruahmanna point 8 lai te, Industry (Manufacturing sector) lama hmalakna tur ruahmanna te, Infrastructure development leh Service sector lam atana hma lak dan tur ruahmanna engemawzat kan hmu bawk. Mizoram sorkar sumpai vawn dan siam ṭhat (reforms in public financial management) te, Skill development lam te, Climate Change bakah sorkar kalphung siamṭhat (administrative reforms) thute kan hmu a ni.

He policy thar hi thil tak tak a ni ta-in ka hria. “Comprehensive growth strategy” a nih angin a khawih tel chin tur leh a nghawng theih tur thil hrang hrang an hmu chiang hle mai. A ngaihtuahtu thluak bur (think tank) te hi a mimal tak pawha hriat chakawm tak an ni. Eibar zawnna leh sum leh pai lama hmasawn tak tak tur chuan sorkar kalphung siam fel hmasak te, a chhehvel kalphung (business environment) siam ṭhat phawtte hi thil pawimawh leh tih ngei ngei tur hmasa (pre-requisites) a ni tih policy duangtute’n an hre ringawt pawh hi ka lo lawmna a ni. Sorkar kalphung tihawlsam (simplification of government procedures) lam te, eizawngtute tan kawng awlsam siam (ease of doing business) lam te an sawi thei ta - a hlimawm e.

Mipui tana inthlakthlengna siam a tum a nih chuan sorkar a insiamrem a, a inherrem a pawimawh a ni tih policy siamtute’n an hre chhuak a. Ruahmanna an han siam ta hi tunlai ṭawngkam takin, ‘a lawmawm tofs.’ Policy ziaktute hian central sorkar-a ministry hrang hrangte thil ruahman dan pawh an zirchiang tih pawh a lang thei. An thumal leh ṭawngkam hman tam takah hian economic reforms
ṭawngkauchheh a lang hnem. Chumai ni lovin alo thlawna sum leh pai sem riral leh rahchhuah tur awm lova tangka thehthang lam a lang lo hrim hrim hi a lawmawmna a ni bawk. Central sorkar-in state-te hnena a hmanna tur bik tuk hmasa lova sum pek (untie fund) hman ṭhat pawimawhzia rilruah a lo lang a. Ngaihtuahna sengtute an fakawm hle mai.

NLUP alo chhuah tirh 2008 khan he chanchinbu-ah ngei hian ka ziak tawh a. NLUP hi economic policy a tling love, retheihna umbo policy (poverty eradication programme) chi khat a ni e, ka lo ti ve tawh a. An han implement ta ngei a, NLUP meuh kha chuan kan economy a chhandam lo chiang a ni. Kha thil kha chu a agri-oriented ngeu ngoo lutuk a. Chutah mah tunlai khawvel mila ‘commercialization of agriculture’ an tih mai ‘Agri-business’ lam kan hawi chhuak zo si lo. Kan ram mipuite “Agripreneurship” lama khalh luh aiin “traditional farming” ah kan inhamtantir rei lutuk lua a ni. Tuna kan NEDP hi chuan kawng dik a rawn hmu a. Kan ram hi ‘farming land’ chu a ni lo chiang hle mai a. Kan pi leh pu aṭanga kan lo tih ṭhan a ni bawk si. Kan ti duh ṭalh zel a nih chuan ‘Hi-tech agri-business’ lam kan hawi a ngai.

He policy hian ‘look/act east policy’ te pawh hmathlirah telhin Infrastructure development leh Climate Change project thlengin a thlur chho va. Keini state te reuhte hian engtinnge ‘Look/Act east policy’ kan lo chhawr ṭangkai ang a, chumi atan chuan engtinnge kan lo inrin ve ang tih ruahmanna mumal ‘documented vision’ siama a ṭulzia te min ngaihtuahtir thei bawk. Tin, kan theihna (potential) remchang, kan la tihfuh chiah si loh ‘skill development’ chungchangte pawh mumal zawka hma lak dan tur ruahmanna te chhawpchhuah a ni ta. A tawi zawngin sawi ta ila - NEDP hian a huamkim hle.

Ka sawi ve duhte

1. Tunhma deuh aṭang khan kan sorkar hian policy ṭha leh mawihnai tak taka lo zam tawh a. Mi state policy ṭha te chu a “copy paste” theih vek mai a ni. Mizoram Industrial Policy te, Mizoram Information Technology Policy etc te chu kan lo belchiang hrep tawh ṭhin a. Mahse, vawiin ni hi kan thleng a ni. A ziakah chauh hian policy kan nei ṭha leh ang tih chu thil hlauhawm tak a ni. Sorkarna fung vuantu hotupa ber leh a hnungzuitute’n “Ka kutzungpui” ti khawpa an hriatchian a, an tuipui lem loh chuan darbentrhek ri mai mai a lo ni leh ang - chutiang chu ni lo hram se ka duh hle mai.

2. He policy huam zau ṭha tak hi a khaikhawmtu tur body a awm ngai hle mai. Chu body chu thuneihna sang tak nei, pawisa pe theitu, pawisa pek tawh pawh hnukkir leh thei a nih a ngai. ‘Terms of reference’ mumal lutuk tak neiin a theih phei chuan ‘autonomy’ hran nei ni hial sela. “A ni hi kan party senior member a ni a, member-ah awm ve teh se,” tih mai mai a chi tawh lovang. Chu Implementing and Monitoring Authority-ah chuan economist te, entrepreneur te, stakeholders aiawhte tel thei se a ṭha ngawt ang.

3. He policy atana ‘Operational Guidelines’ hi a hranpaa siam tur a ni em ka hre hauh lo na a, tihdan phung pangngaiah chuan ‘OG’ hi awm ngei tur a ni. Chumi OG a awm hunah chuan chiang lehzualin he NEDP nihphung tur tak tak hi kan hre dawn a. OG alo chhuah hunah a danglam leh hu ang em tih erawh chu ngaihtuah tham a ni. Party worker te induhsakna hmanrua, huapzau tak huam kim si lo a ni ang tih a hlauhawm.

4. He policy-in hma lak nasatna tur bika a thlan chhuah (Identified sectors)-ah te hian sorkar-in sumpai pawh a hmang hnem dawn tihna pawh a ni tel a. Chutah chuan a line department ṭheuhte mawhphurhna hi a sangin an ruahmanna ṭheuhte chu Planning Department-ah thehluh tur a nih hmel a. Ka lo ngaihtuah chu hei leh chen hi department ho hi an kal tawh a, project rotling leh ngelnghet (sustainable projects) engzatnge kan neih han inzawt ila. Kut zungṭang kan thliak zo thei meuh em tih hi a ni. NEDP duangtute beiseina hi kan department ho hian an deliver thei ang em le? Stakeholders meeting leh consultation meeting an koh lohva, sustainable projects lama consulting group leh consultation agency rintlak an koh loh phei chuan NEDP hian su a ti leh se ang tih a hlauhawm.

5. Industry lamah Manufacturing leh Service Sector te hi hma lak nasat bikna tur a ni - PM Modi-a “Make in India” lam hawi a ni mai awm e. A tak takah pawh a ṭul reng a ni. Hei hi kan ti tak tak dawn a nih chuan Entrepreneurship tihhmasawnna lam uchuak taka kan uar a ngai dawn. Kan
ṭhalaite tana ka lo vahvaihpui ve subject kha a ni a, sawi tur a tam hle mai. A pawimawh ber chu ‘business environment’ ṭha siam a ni. Sorkara in ziahluh dan tihzangkhai te, state dang investment pawh luh tamte a ṭul. Foreign Direct Investment vel hi chu keini state chuan kan beisei pha lo leh ngei ang. Inter-state investment lam hawi ila – Pharmaceuticals industry te, food processing leh wood/bamboo based industry te, Service sector lamah BPO leh IT Enabled Services lama investor-te a bik taka welcome te pawh an ngai dawn a ni.

School-ah ‘entrepreneurship’ subject siam te, college zawng zawngah tihtak tha (large scale initiatives) a entrepreneurship awareness siam te a ṭul. Kerala state-in entrepreneurship development board a siam angte pawh zirchian a ngai hle. He lama kal turte mamawh ber chu
bulṭanna tur sumlu ‘start-up-capital’ a ni a, kan
ṭhalaite puala project proposal competition siamsak a, viable leh feasible project-te soft loan pek leh India sorkar-in a make in India programme atan liau liauva a ruahman MUDRA loan, bank hrang hrang-in an pekte vil a, enpuite a ṭul hle ang. Service sector lamah hian a hmasa berah “skills mapping” hi National Skill Development Corporation hian kan nei tawh e, an ti naa kan state chhung skill-gap hi zirchian hmasak leh vek a ngai hle bawk.

Thlir thuak thuakna chauh a nih avangin kan fak kim thei lova, thil ṭul kan sawi kim thei bawk lo. NEDP hi short, medium leh long term huam a nih avangin a hlimthla kan hmu riai ruai chauh a ni. Kan ram hi a te a, mihring kan tlem bawk a. Thil ti tak tak lovin thil tak tak hi i ti tawh teh ang u. Tih-tak-taka-tih-duh-na a awm phawt chuan mipui hi kaihhruai kan nuam lutuk, a lu ber aṭangin han inherrem se, kan hruaitu leh hotute-ah thil danglam kan hmuh hmasak phawt chuan mipuite hi chu kan danglam ve mai ang, ka ti deuh a ni.

- Joseph L. Ralte, Mizoram Entrepreneurship Network

(Send your feedback to 9862566772 or join me @ https://www.facebook.com/josep...)