Remna Ni lawm chiam ṭul ka ti lo
"Krismas hi i lawm chiam teh ang u. Uar deuh taka lawm a phu a ni," ti an awm lo, kan lawm nasa hle a, lawm a phu a, kan phur tlang a, kan lawm a ni. Remna Ni hi kan phur tlang lova, lawm tur chi niin kan ngai ta lo tihna a ni a, Central YMA-in hetia lawm an rawt thar hi a chhan tur ka zawng a, tute emaw tana kawng remchang inhawng tur ni maiin ka hria a, ngaihtuahna a kal thui thei khawp mai.
Remna Ni chu 1986-ah kha chuan lawm a phu a, inthurual sa niawm takin a ram pumin kan lawm a. Mei kan det a, tlang kan tlir a, khatih hunlaia kan tih theih langsar tak motor ke la khawmin kan hal a, kan lam tlaivar a, kha kha Remna Ni kan lawm dan tur dik tak a ni. "Remna Ni hi i lawm tawh lo ang u," tiin kan inthurual zui pawh ni chuang lovin hun a kal zel a, Remna Ni hi lawm bung bung kher a ngai tawh lova, Remna leh Muanna hnuaia awm pawh ngaiah kan nei thiam tawh a, inrem taka kan awm tawh avangin MNF leh Congress pawhin he ni hi lawm vak a ṭul an ni tawh lo niin ka ngai.
Political Party lamin lawm ṭul an ni tawh lova, mipui nawlpuiin lawm kher ngaiah kan ruat tawh lova, Remna Ni chu public holiday nuam takah kan ngai tawh a ni. Chutihlaia a Central YMA berin lawm lo rawt ve sek mai hi ka ngaihdan zuk ni hauh lova. Central YMA chuan YMA Day lawm se, chu chu sorkar-in chawlhah a puansak tawh a, he ni hian tun hma angin lawm a hlawh tawh lova, hruaitute programme pawhin ngaihsak a hlawh tawh loh vangin Central YMA kaihhruai ni si programme lian tak siam hrim hrim duhna aṭanga lo piang chhuak a ni lo lo maw? tih zawhna hi ka rilruah a piang tlat a ni.
Remna Ni lawm hi khawi-lai aṭang mahin 'demand' a awm tawh lova, sorkarin chawlhah a puang a, Remna leh Muanna kan neih tak avangin chawlh hahdamna
ṭha kan neiah ngai ila, family outing atante hmang ila a ṭhat tawk tehlul nen, CYMA-in puipun khera lawm thar a tum hian inerna bak a chawh chhuah ka ring lo.
Platform khatah Congress, MNF, ZNP, MPC etc thu an sawi dawn chuan lo ngai reng rawh u, Inrem Lohna Ni a chhuah ka ring. Congress hian sawi duh tak tak se Remna a thlen chhanah hian an hnathawh ropui tak sawi tur an nei a, MNF hian an ngah hlei hlei mai thei a, ZNP president pawh hi Remna thlentu ber niawm takin Zonet TV-ah khan kan lo hmu bawk a, MPC President pawh hian an founder president thu leh hla aṭangin sawi tur a nei ve tho ang. Inhnialna leh mahni insawi vawngna platform a piangin ka ring a, mipui pungkhawm hmaa thu an sawi phei chuan ṭawngkam thiam thiam tan campaign-na platform ṭha a ni ang a, Central YMA hruaitu ṭhenkhat tan political career inṭanna remchang pawh a ni ve thei bawk. A chhan chu YMA General Conference lamah mipui an ṭhahnem vak si lo tihte hi thil awm thei a ni lo maw?
Remna Ni thar thawha mipui kohkhawm hi tute emaw tana hun ṭha siamna a nih ka hlau a ni - he ni hi Inrem Lohna Ni chhuahna ni lul suh se.
- Lalromawia