Burma mi hnawhchhuah runpui kha...

Tunhnai khan Myanmar aṭangin media lama kan thawhpui, Chin Media Network (CMN) mi 17 lai Mizoram rawn tlawhin Aizawlah zan thum an cham a. MJA te nen pawh kan inkawm hlim hle a, nuam an tiin Mizoram sorkarin media-te tana hamṭhatna a siam leh thil dang dangte an zirin ropui an ti hle.

MJA-te'n kan la tih zen zen loh member nawlpui nen Press Club-ah ruai kan lo ṭheh-pui nghe nghe a ni.

Myanmar ram khi sipai rorelna hnuaiah kum tam tak awmin mipuite'n an kham em em a, sipai sorkar duh loh zawnga chete phei chu jail-ah khungin rim taka hnathawhtir an ni a; ei leh in an pe chhe em em ṭhin. Myanmar-ah democracy meichher a lo alh chhuak ta a, media pawhin awmzia a neiin zalenna an nei mek a, an lawmpui awm tak zet a ni.

CMN-te chuan an haw dawn zanah MJA zinga OB chin Heritage Lodge-ah zanriah min kilpui ve thung a, hlim takin kan inthlah liam ta a. Khami zan khan kan Vice President Pu Zonunsanga Khiangte chuan kum 2003 kuma mi pakhat thil sual tih avanga Burma mi tawh dek dek chu ramsa zim taka zimin kan um chhuak nasa hle tih a sawi a, a tawpah MJA-te'n ban pharin thuchhuah kan siam vangin inhnawhchhuah kha a tawp zui ta tih a sawi nghe nghe a ni.

A ni tak a, khami kuma mi pakhat thil sual tih vanga kan khawchhak mi khati taka kan um chhuak kha a rapthlak a, chenna in halsak te pawh an tam a nih kha. Nunau bungbawrin an khaw lam panin an insul zut zut a, tuman ka chhungte tia lo ṭanpui theih loh khawpin mipui vantlang kan che a nih kha - a lo rapthlak ngawt mai.

Kha mi hunlai kha MNF sorkar lai a ni a, sorkar a ngawi tlat a nih kha. Congress emaw party dang pawh sorkar se politics-a hamṭhat-na a kiam hlauin an ngawi tlat tho ang tih a rin theih.

Central YMA a ngawi a, zirlai pawl pawh an ngawi tlat bawk si a, nunau khawngaih-thlakzia MJA-te'n an hriat khan committee neiin in hnawhchhuah demna leh ti tawh lo tura ngenna thu kan chhuah hnuah a reh ta chauh a ni.

Tunah Myanmar-in democracy meichhe an chhi ṭan a, political party te, Central YMA te, MZP leh MSU-te thlengin an ram hruaitute duhsakna chibai bukin an insul leh ta zut zut mai nia! Kum 2003 thil thleng erawh an hre leh duh tak tak lo a nih hi. Political party chu dem viau theih an ni lo maithei; Mizoram mipui lungawina ber tura ngawih an chuh kha an tihawm tak a ni thei e.

Khang hunlaia ngawi tlat, democracy an lo inṭan taka phur ber ber ni leh si NGO-te erawh hi chu hriatthiam an har ngawt mai.

Chin Media Net-work palai lokalte khan kum 2003 thil thleng, an mipuite rapthlak taka khatianga um chhuah an nih dan te, a ni ta em em lo e tia MJA-in ban a phar dan an hriat khan MJA chet dan kha media-te role play dan tur dik tak a nih thu an sawi a. MJA-te min endan pawh a chungnun phah hle a ni.

Burma mi um chhuah mai ni lo, veng ṭhen-khatin vai curfew an puan, MJA-in ban a phar avanga curfew an puan tawh an hnuhdawh thlengin MJA khan hna a thawk ve viau a ni.

- Lal Rinmawia