Smuggler ho tual lenna Mizoram

- Zothanpuia

Rangkachak cheng vaibelchhe tam man a bo meuh chuan, "Kei hian rangka­chak ka phur a," te an ti lo thei tawh lova, rangkachak tawlh ru ṭhinte pawh kan hriat belh zel a ni. Hei hi smuggling a ni a, ruihhlo tawlh ruk leh silai tawlh ruk pawh smuggling vek a ni. Smuggling hi kan vei loh chuan kan ram hi dinhmun hlauhthawnawm takah a ding thei a nia.

December-a thil thleng kha April 21, 2016-ah FIR thehluh a ni a, Mizoram sorkar leh Police hoin an hre ve chiah a nih chuan kan ramah hian rangkachak vaibelchhe tam tak man tawlhrukna leh inrawkna rapthlak, silaia intin chunga invau behna, Aizawl khaw dai maia thleng kha tumahin kan hre dawn lo tihna a ni. Hei hi ngaihtuah chiang ve mah teh u, a rapthlak asin. Mizoram a ralmuan thu kan sawi nasat nen, silai ṭha ber ber nen, lirthei tam tak kengin, Aizawl khaw dai maiah an inrawk a, sorkar dan bawhchhiatna smuggling lian tak a thleng a, chu chu December-March chhung mipuiin kan hre miah lo.

A lan danah chuan smuggler-te an duhtawka an khawsakna ramah kan ram hi a chang zo ta. Pseudoephedrine tawlhtu chiang taka mante pawh an tang chuang lova, Aizawla milian leh langsar, a ṭhen chu damdawi dawr neite pawh an dawr kawta an khehpuam man a nih thu kan hmuh hnuah jail an tang chuang lo; rilru hi a na a ni mai lova kan ram kalphungah hian keini ṭhang­thar zawkte thin hi a rim ṭûn zawk a ni.

Silai tawlh rutu an man te, khehpuam tawlhtu an man te, rangkachak tawlhtu an mante hi dan bawhchhia vek an ni a, an tang rei ngai tak tak bawk si lova, heti reng reng chuan, "Tawlh ve mai ang u, an tang tak tak lo," kan ti mai ang tih hlauhawm a nia. Ṭhenkhat lahin, "In rin loh deuh deuh hian smuggling an kalpui a nia," an la ti zui bawk si. Mipui kan him ta lo e. A hre chiang deuhin rawn ziak ve se, Mizoram hi smuggling tihna kalkawng leh hmunpui a nih hmain sorkar hi ṭang ve deuh se.