Thlanmual a min leh mai ang

Kumin chu Ṭo leh Ruahthimpui haw a mumal vak lova, khua a han sang leh deuh nain tunah chuan Fur ruah sur leh khaw cheng kan hma chhawn chho leh dawn ta a, Lusun chhungkaw ṭhenkhat tan chuan thin thia mutmu tuah a har ṭan leh mek ta mai. Hun engemaw chen aṭang khan thlanmual min thawm kan hre ta fo mai a, Aizawl khaw-pui leh a chhehvelah a hluar deuh em ni aw a tih theih.

Hetianga thlan-mual min ta fo hi a chhan awm ve thei pakhat awma ka hriat avang leh inven theih chen awm theia ka hriat avangin, thu ngaihnawm leh beng fah nimah suh se, ka han thawh chhuahpui ve a ni.

Tun hma chuan thingtuai te hmangin thlan kan hung mai ṭhin a, hun a lo kal deuh a, khawpui leh a chhehvelah chuan thir pal (Angled Iron leh Flat Iron) te hmangin kan han hung leh a. Khawpui chhung veng tam takah phei chuan feet khat, etc. aia sanga hung loh turte pawh kan ti hlawm a nih kha. Khatih lai kha chuan leirawhchan (Brick) kan la hmang uar teh chiam lova.

Tunlaiah chuan, nakina thlan lung phun huna a awlsam zawk nan leh rin zui nghal theihte a nih ṭhin avangin leirawhchan hmangin kan hung/dawm kual nghal deuh vek hlawm tawh a ni. Thlan vurna leivung a chim/tlak phai leh kan hlauh avangin a chung kan siam phal rih si ṭhin lova. Tin, a lo chim/tla phai leh ngei bawk ṭhin nen. Hetianga thlan buatsaih ho hi fur lai chuan tuikhuah/tanky ṭha tak vek a lo ni thei reng mai a. Ruahtui leh tuihawk chu muangchangin thlan siam lohte aṭang chuan lei chhungrilah a relhru zo ta ṭhin a. Thlan siam loh a tam tham deuh chuan lei hnuai lamah tui tak a put lut a, lei chhungril a chiah hnip a, lei min a siam thei mai ṭhin niin a rin theih.

Hetiang hi thil awm thei a nih avangin, thlan thar pawh nise, leirawhchana hung a nih chuan thlan chung kha cement concrete hmangin, pan te pawh nise, zut phui ta ila, tui a hnam lut lo ang a, nakinah lo chim hniam pawh nise a vur ṭhat leh zel theih dawn tho a ni.

Tin, thlan chung mai bakah pawh, hmun awiah chuan thlan inkar tui put theihna apiang chu zut phui theih nise, ngaih a ngam leh zual ang. Hei hi thil ni thei awma kan ngai te a nih chuan fur thlen hma hian khawtlang leh YMA te pawhin ngaihtuah tlangin hma kan lak thuai a ṭha ang.

- Jerry-a pa