Inneih inkhâwm hi...

Inneih inkhâwm hi kohhran pangngai deuhva ngaihah hi chuan inkhâwm pangngai anga ngaih, khùnkhàn tak leh biak in zahawmna vawng chunga tih a ni ṭhin. Chuvangin, inneih inkhawmna hmun chu biak in a ni emaw Vestry a ni emaw, eng hall leh in emaw pawh ni se, inneih hi Pathian thil a nih miau avangin kohhran dan thianghlima inneihna hmun rêng rêng kha chu a thianghlima ngaih a ni a.

Inneihnaa kalte pawhin inkhâwm pangngai anga ngaiin zahawm taka kan ṭhut luh a ngai tih hi hriat a ṭha hle. Inneih hun chu eng pawh ni se, Pathian biak inkhawm pangngai anga ngaih a nih avangin, innei turate leh mipuite pawh ṭan hmaa biak in chhunga ṭhut hman chu tih dan tur a ni a.

Tunlai hian biak in chhunga mipui an khah ṭhup tawh hnua monu rawn lut chauh hmuh tur a awm ta nual mai. Hei hi tun hma aṭanga Mizoten kan tih dan chu ni lovin a lang. Eng hnam tih dan emaw la pawh ni ila, hetiang hi tih dan phung ṭha a ni lem lo tih hria ila, chìn loh atan a ṭha khawp mai. Tin, hetiang chi ni lo, monu tlai hrim hrim pawh hriat tur a awm hial a, hei ngat phei chu a zahawm lo lehzual hle.

Inneih inkhawm hi tlai lo tùrin a hma daih aṭangin a innei turate chuan thil an ruahmansa vek tur a ni. Entir nan, inkhawm tlaitir thei tura ngaih, traffic jam leh thil dangte an ngaihtuah thleng pha ngei tur a ni.

Tlai lutuka in­neihna hmuna monu a luh hian a tir lamah zai a awm lo bawk nen, inneihna hmun chu mihring lamah hulumtu awm lovin a lang thei a, chuvangin mipui lam tan chuan a rei awlin a hrilhhai thlak lek lek bawk ṭhin.

Tlai lutuka in­neihna hmuna luh hi innei turate an ni emaw inneih hriatpui tura lokal kan ni emaw a dang lem lo va, inneihna hmun (Pathian awmna) zahlohna chi khat a nih theih hial avangin kan thlen chin aṭang hian hmasawn i tum ṭheuh vang u.

Mopa (leh monu ṭhian) inneihna hmun­ah hma taka ṭhu a, a hnu daiha tuin emaw hruaia monu rawn luhtir lovin inkhawm ṭan hun pangngaia rawngbawltute an kal hma bik ṭhin ang deuh hian tlai zawk awm chuang lovin, a innei turate chu a ṭhu hmasaah ṭang ve ve thei se.

Chu chuan Pathian a chawimawi ang a, biak in/ inneihna hmun a lo zahawm ang a, innei turate an zahawm ang a, inneih hriatpui tur leh Pathian pawl tura mipui leh kohhranho lokalte tan pawh a hlimawmin duhthusam a ni bawk ang.

- Dr J.T.Vanlalngheta