ZORAM KALSIAM TAK HI AW!

Tunlai chu khua a lumin, thosi a tam ta viau mai a, fimkhur a ngai hle mai. Tlang hri leng leh natna chi hrang hrang avanga thihna a tam viau rualin, hei ai mah hian natna ber pawh hriat loh, stroke-a thihna a tam ta em em maite hian Zoram mipui min va tithlabar tak em. Kan Aizawl khawpui chhungah ringawt pawh hian ruang chhar a va tam tak em. Tunah chuan ‘Ruang chhar’ hi kan Aizawl khawpui hri hlauhawm ber pakhat chu a nih ber tak hi a! He hriin a man lah hi naupang leh kum upa lam an awm ngai si lo va, ṭhalai tak tak hlir an ni mai leh nghal a, natna hlauhawm tak zawng a nih ngei awm hi a!

He ruang chhar hri hi kan Aizawl khawpui bakah kan District capital-te hian tlem an tawng ve chu a ni mai a; hri hlauhawwm tak, khawpuia leng ni ber awm a ni. Kan khawpui ber, kan Jerusalem-in he hri heti taka a vei reng mai hi chu a lungchhiatthlakin, a dona hna hi tha thlah lova kan thawh tlan a ngai hle mai. Zan rei lam deuhah kan Jerusalem chhuahsan tura han tlan nikhuate hian khawi lai laiah emaw, ṭhalai rual lo bawrkhawm tal tal hi hmuh tur an awm fur zel a, heng ho hi chu sumdawnna lam khawih an nih hmel vak awm pawhin an lang lo. Hetiang bawrkhawm ṭhin zinga mi hi an ni mai awm mang e ‘ruang chhar’ hri vei avanga boral ta ṭhin hi, te pawh min tihtir rum rum mai a! Kan sorkar chak tak hian he hri laka kan fihlim deuh theih nan kan khawpui zan boruak ziaawm deuh theih nan ruahmanna fel fai ṭha deuh ruahman dan nei se la, khawpui chhung hmun tina ‘Zanreh’ mi tinin an hman vek theih nan, zan reh hunte hi khauh takin lekkawh se la a ṭha hle awm e. Tichuan ‘Ruangchhar’ hri leng aṭang pawh hian kan ziaawm deuh thei mai awm e a!

Kan sorkar liam ta kha Covid hripui khan a tibuai nasain, kha hri kha khawvel puma leng kha a niin, kan sorkar pawh kha an mangangin an thlabar hle ni khan a lang a. Thingtlang khaw tam tak phei chuan lo inven nan kawtchhuahah gate te an siam a, an khua a luhte an phal lo hial a nih kha. Kan sorkar kha hripui a lo kian deuh hnu pawh khan an la thlabar reng ni hmiang thingtlang khaw te deuh, health sub centre nei ve lote hnenahte Health Clinic Centre a hawng ta vek a, Health Worker-in a ṭhutchilh zel bawk a. Thingtlang khua, health sub centre nei ve lote tan chuan an innghahna ber a ni hlawm a, mahse tun kan sorkar hian engti zia teh lek nge, kha'ng health clinic centre-te kha a nuai bo tak vek ni. A aia ṭha zawk leh changtlung zawkin a han thlak leh dawnah kan lo ngai hmiah mai a ni ber e.

Tin, National Health Mission hma laknain kan Health Sub Centrete chu Healh & Wellness centre-ah hlankai a ni hlawmin, Health & Wellness Officer, B Sc Nursing-ten an ṭhutchilh ta zel hlawm a, Hriselna lama kan ṭhat zawk nan leh kan phuisui zawk nan heng Health & Wellness Officer-te pawh hi Zoram sorkarah dahngheh ni se la, tichuan hriselna lamah hma kan sawn deuh ngei chuan a rinawm. Ram hmasawnna atana pawimawh ber pakhat chu ami chengte hriselna hi a ni si a.

Tun thla hnih khat lek chhunga thihna tam ber pawl chu motor accident hi a ni tlat bawk. Tunah chuan kan kawngpuite a lo zauvin a lo mam ṭha ta viau mai a, kan lirthei pawh kan khalh chak tain, mahni side pawh enfiah hman mang lovin kan tlan ta pur pur mai. Kan ṭhalaite lah hian tlan chak hi kan intihhmuh a ni ber awm e. Nimin lawka Serchhip rawlthar pahnih bike insua boralte pawh kha, an tlan chak lutuk insu a nih hmel viau a, a pawi khawp mai. Khawvel an hmang ṭan dawn chauh va, an tlan chak tuar lovin an boral ta mai a ni si a, an uiawm hle mai. Hmun ṭhenkhatah phei chuan bike-in ka intlansiak e te an ti a, bike racing changkang tak tak TV lama an hmuh ṭhinte entawnin, kan kawngpui zau lo tak - zau laiah an lo tlan ve ṭhin a. Heng hian thihna a thlen ta fo a nih bawk hi. Kan sorkar leh police lam pawh hian hetiang laka kan ṭhalaite an fihlim deuh theih nan fing leh remhre takin hma han la teh se.

Aw le, kan sawi ta nual a, engkimah kan sorkar hmalakna tur zawngin kan sawi ber a, mahse a pawimawh ber chu 'kei hi ka ni' tiin inngaihtuah vek thei ila a ṭha hle ang. Amaherawhchu, sorkar lam hian bengvarna leh kan beng chhitna tur hian mi hrilh hre ṭhin se, dan leh hraite hi min hrilh hre ṭhin se, tichuan kan fimkhur ve deuh ngei chuan a rinawm. Ram leh hnam him nan hawh teh u, sorkar nen ṭan tlan zel i tum teh ang u.

- Patrick Z, Chhingchhip.