Biak inpui

Biak Inpui, Mission Veng, Aizawla mi hi a din-hmun, Biak in dang ang lo takin dang-lamna a nei a.

Heng hi lo en ila: Kum 1914 thleng hian Aijal Koh--hran (Mission Veng Kohhran) Aizawla Presbyterian Kohhran ding chhun a ni. Kum 1915-ah Rahsi Venghlui, tuna Venghlui ni ta hi a in dang a, kum 1918-ah Dawrpui, kum 1927-ah Tlangnuam an in dang leh.

Biak Inpui hming put chhan: Biak Inpui tih hming a put ṭan laihi hriat a ni chiah lo a. Rual ute leh rawngbawltu hmasate sawi dan chuan, Mizoram Kohhran hringtu nu ber a nih vangin feminine gender 'pui' tih hming hi belh niin an sawi. A hming pawh hi Mission Veng Kohhran mite phuah ni loin pawn lam miten Mission Veng Biakin an sawi nana hman a ni ṭhin a. Tunah erawh chuan Kohhran hovin kan hmang ta vek a ni.

Mission Veng hi Kohhran hmasa hmunpui leh Synod lo zik chhuahna a ni a. Mission Veng Biak in 'Biak Inpui' kan han tih bikna nen pawh hian a inhmeh hle a ni. (Bawlhmun-Bethel, Mission Veng Kohhran Biak Inpui - 2011. Phek 49, 55, 89).

Chutianga Synod nena inngheng reng kan nih avang chuan Mission Veng Kohhran pawh hi Kohhran azawnga Synod rawng kai nghet ber a ni awm e. (Bawlhmun Bethel. P.89).

Mission Veng Biak Inpui dinhmun hi hetiang hi a nih avangin a hmun thuah pawh ama pual bika ramri chin bik chiah nei hranpa em em lem lovin Mission/ Synod huang chhungah a ding mai a. Ram thuah pawh a mamawh angin Synod hnenah a thlen mai a; tin, chutia dilna a rawn siam pawh chu a neitu chhungkaw hnenah a mamawh a rawn thlen a ni mah zawk a. Chutiang chu a nih avangin he Biak Inpui hi chuan, a nihna bik avangin a ram mamawh chu Synod-ah a thlen zel hi a kalhmang reng a ni a, a ṭul leh a theih anga ngaihtuahsak a ni mai ṭhin.

Tunah pawh hian a Biak in ding lai chhak lam pang ram remchang a zau thei ang bera pek an ni hi, Synod hotute an fakawm ka ti a. Tin, Biak Inpui pawh an lawmpuiawm ngawtin ka hria.

Upa C. Dorema leh Pu Rin Sanga ten Chanchinbua hemi thua an ziahna an ngaihdante ṭawm-puiin he Biak Inpui hi kan ta neih ṭheuhna laite awm tlata hriain rilru a tlangnelna deuh tak nei chungin ka han chhunzawm ve a ni.

He Biak Inpui hi a nihna kalpui a nih zelna pawh hi a lawmawm khawp mai.

- Rev. Rokhuma, Mission Vengthlang