Five Star Hotel Vs. BPL

Tunlai chu ka rilruah ‘Five Star Hotel Vs. BPL’ tih hi a lang reng mai. ‘A mak teh daih e!’ in lo ti mai thei. Thil in persan tak mahse inkung-kaihna nei an ni ve tlat.

Five Star Hotel han tih ngawt chuh! Thiam ang tawkin hrilhfiah kan tum ve ang e. Five Star Hotel chu Hotel changkang tak, Mizorama kan hotel changkang ber ber te ai pawha changkang daih, ei tur leh in tur duh ang zawng zawng lam theihna, tui cheng duh tan pawh swimming pool awm thlap, massage (malis) duh tan pawh duh hun huna in massage (malis) tir theihna, engkim deuhthaw awmna hmun a ni mai awm e. Khawvel thilah chuan a aia thlenin nuam zawk a awm thei tawh kher lo maithei. Thlen man pawh a sang thawkhat viau. Mahni sum senga thleng tur phei chuan Mizo zingah thleng thei/ thleng duh kan tam vak pawh ka ring lo. Vanneiha siamin Delhi-a Five Star Hotel-ah ṭum hnih International Seminar leh National Level meeting-ah ka tel ve hlauh tawh.

Below Poverty Line (BPL) lam han sawi kai ve leh lawk ila. BPL hi chu Five Star Hotel ai chuan kan hre tlanglawn zawkin ka ring. Tunlai pawh hian Mizoram pumah BPL list siam thar tumin sorkar pawn hma a la mek a. BPL nih chak fe fete pawh kan la awm a nih hmel. BPL chhungkua kan tih te hi nitina mahni chhungkaw ei khawp pawh hmu zo lo, miretheiah pawh a chhumchhia kan tih ang chhungkua hi an ni. Rethei tak, dinhmun harsa tak, midang
ṭanpuina tel lo chuan mahnia din chhuah ngaihna pawh awm lo khawp dinhmuna ding an ni thung.

Ṭum khat chu kan meeting-naah kan Senior Professor pakhat hian ‘India ram puma BPL te chawikanna tur ngaihtuahin Five Star Hotel-ah meeting an nei’ tih a sawi a. A sawilai chuan, thil kalphung pangngai alawm tiin ka ngaithla liam ve mai a. Mahse kum a vei hnuah pawh Five Star Hotel-a meeting leh an meeting chhan BPL hi ka ngaihtuahnaah a lo lang leh
ṭhin. Roreltute dinhmun leh an relsakate dinhmun hi a inthlau mang e. A reltute hian mi chanhai zawkte dawmkanna tura ṭha bera an ngaihdanin ruahmanna an siam tho ang.

BPL-te dinhmun hi a hahthlak a, ‘vawiin hian enge kan ei anga enge kan in ang aw’ tia buai reng rengin, a sur a sa hnuaiah dam khawchhuah vena tur an zawng a ni. Thil a kal fuh a, an tana thuneitute ruahmanna zar an lo zo ve thei hlauh a nih chuan lei rem an rawn rah chhoh vena tur kawng a in hawng ang. Ruahmanna a kal tluan loh erawh chuan chuti hlauh chu a ni thung. An tan tihngaihna reng a awm lo.

Ngaihtuahnaa awm chu ‘Five Star Hotel-a ruahmanna siamtute khan ṭhahnem ngai taka ro an relsak BPL-te dinhmun dik tak kha an zu hre phak tak tak ang em aw?’ tih hi a ni. A tak takah chuan BPL-te dinhmun dik tak hriat pui lo tan chuan anmahni chawikanna tur ruahmanna tluantling duan chhuah hi a har ngawt ang. Khi lam (Five Star Hotel) aṭanga ṭha awm deuha lang kha he lam (BPL lam) tan chuan a lo ṭha ber kher lo maithei. Phai ram mila ruahmanna siam tam tak pawh hi tlang ram nena inmil lo a tam ṭhin viau a ni.

Five Star Hotel rap pha chin leh BPL-te chenna mual hi a inthlau em mai! Meeting-a tel mi pakhat tana senso ringawt pawh hi BPL chhungkaw thla khat sum lak luh ai pawn a tam zawk hial ang. Kan kalphung a ni miau a, VIP culture-ah chuan dinhmun a lo inthlau thei em a nih hi. Ngaihtuah chian erawh chuan Five Star Hotel-a BPL-te ham-
ṭhatna ngaihtuah tura meeting neih hi a inhmeh hlawl lo. BPL-te din khawchhuahna tur tak tak duang chhuak
ṭhin ni se ngaih a ṭha deuh tur. Mahse, a tlangpuithuin BPL-te dinhmun hian hma a sawn phah em emin a lang si lo a, ngaih a ti ṭha lo tlat - ‘a fair lo mang e’ tih awl deuh asin.

Kan ‘VIP culture’-a kan dinhmun inthlau lutuk leh thlirna tlang inang lo lutuk ṭhin hi development lama kan ṭhan mawh bawk ber niin ka hria. A chang chuan, ‘thu tawp siam thei chin tak tak, VIP light chhi pha chin leh designation plate tar pha chinte hian rawng an bawl sak mipui, a bik takin miretheite harsatna hi a hmun ngeiah zir chiangin anmahni nena sawihona te nei ṭhin se. Chumi zulzui chuan ruahmanna te siam ṭhin se, kan ram tan a chhenfakawmin hmasawnna lamah min hruai zawk awm mang e. Mahse, ka ngaihtuahna hian tun maiah chuan a tak ram a thleng awm si lo a. A tak ram thlen hun awm tak ang maw?

Beiseina erawh a la bo vek lo. Kan dinhmun inthlau lutuk te,VIP leh P lo inkar (gap) zau lutukte hi tizim deuh ila, thlirna tlang khat
aṭanga thlir hoin (a ṭul chuan suit leh necktie te pawh phelh mai ila) inpawh takin sawiho
ṭhin ila, ruahmannate siam ho ila. A neitu dik tak rilru pu chungin, a tuate pawn hmala theuh ila kan in dawm kang ngei ngei ang. Chutih hunah chuan kan ram a ding chhuak ngei bawk ang.

- Dr. Lalnilawma,

Mizoram University