Kan topper-te mark a hniam lutuk deuh (HSLC & HSSLC Result Review)

April 28, 2016-ah MBSE-in HSLC Exam 2016 result a tichhuak a, May 11, 2016-ah HSSLC Exam 2016 result a tichhuak leh bawk. India ram state Board hrang hrangte leh CBSE, etc zingah MBSE hi HSLC & HSSLC Result tichhuak hmasa ber pawl a ni deuh ziah a. HSLC result hi board tam zawk chuan May thla chawhnu lamah an tichhuak hman chauh ṭhin a, HSSLC phei chu June thlaah an tichhuak tlangpui. Chuvangin, ṭha taka exam an conduct mai ni lo, rang tak leh ṭha taka result an tihchhuah theih ṭhin avangin MBSE hotute leh hnathawktute an fakawm.

Tunhnai kum 4/5 vel aṭang khan HSLC leh HSSLC result hian hma a sawn nasa a, pass percentage pawh a sang ve hret hret. Sawi zui tur tam tak a awm a, amaherawhchu, ka vei em em ṭhin, topper-te mark chungchang chauh hi i han sawi zui rih teh ang.

HSLC 2016 topper hian 93.4% chiah a hmu a, kum 2015 a topper pawhin 93% a hmu. Kum 2014 topper phei chuan 91.8% chauh a hmu. Hei hi mi nawlpui thlirna aṭang chuan sang viau angin lang mah se, Mizoram puma pakhatna mark hmuh atan chuan a hniam lutuk deuh. CBSE leh ICSE hnuaia Matric topper-te chuan 98% chunglam an hmu deuh ziah a ni. Tin, zirlai ti ṭha deuhho mark kan en kual chinah chuan Science leh Mathematics-ah mark an score sang deuh vek a, English leh SS-ah an hniam tlangpui. HSLC topper 2016 hian English-ah mark 84 chauh a hmu a ni. Tin, Mizo subject hi percentage/ position siamna remchangah hman a, mark sang lehzual hmuh a ngai bawk.

HSSLC lamah pawh Topper-te mark hi a sang tawk lo hle a, hei hi thil pawi tak a ni thei. Mizoram topper-te mark percentage hi lo en ila: Arts topper - 89.2%. Science topper - 92.4%. Commerce topper - 81.2%

Zirlai naran mark chu nise sawi tur a awm lo ang; mahse, Mizoram puma pakhatna mark hmuh atan chuan a hniam lutuk hlawm deuh a ni! CBSE 2015 class XII topper, Delhi tleirawl M.Gayatri khan 99.2% mark a hmu daih a, amah hi Commerce zirlai a ni nghe nghe. A mark hmuh dan pawh hetiang a ni: English: 98, Mathematics: 100, Economics: 98, Business Studies: 100, Accounts: 100 = 496/500.

Mizorama zirlaite leh all India a zirlai thiamtheite khaikhin hi thil dik ber a ni lo maithei. Amaherawhchu, zirna sang chhunzawm dawn te, institution ṭhaa luh dawn tein all India entrance-ah heng zirlai ṭha ho nena kan inel leh tho tho avangin khaikhin loh theih kan ni tawh si lo; dan hmanga inel luih tir kan ni tawh tlat. Chuvangin, India ram puma zirlaite hi kan el a ngai tawh a, nasa lehzuala ṭan kan lak a ngai takzet a ni.

Kan topper-te mark hmuh sang tawk lo chungchang kan sawi hian "MBSE-in mark an ren em alawm, CBSE hnuai chu nise..." tiin MBSE marking system kan mawhpuh deuh ṭhin a, a dikna chen pawh a awm maithei. Amaherawhchu, MBSE hian an mark pek dan system hi an siam
ṭha nasa tawh a, tunah chuan mark paihna tur ni lo, mark pekna tur an zawn ve ngar ngar tawh avangin an mark pek hi a hniam chhe hauh lo ang. Tin, mark pek dan inang, zawhna thuhmun kan chhan chiahin heng all India zirlai thiamthei hote nen hian kan inthlau lutuk! All India Medical Entrance, NEET 2015-ah khan Mizoram aṭangin seat hmu pha turin zirlai 10 pawh an tling pha lo. State entrance aṭangin seat kan hnawh khat mai mai.... "NEET chauh rin tawh tur... state entrance rin tawh loh tur" tiin Supreme Court-in order a chhuah thar lehnghal... MBBS zir pha kan nei tawh mang dawn em ni?

Arts stream-a topper 89.2% mark hmutu hi Delhi University hnuaia College ṭhaho-ah chuan a lut pha lo nghal tawp! Kum 2015 khan DU hnuaia Lady Sri Ram College-a BA zir tur hian ST tan pawh 94.50% hmuh a ngai tlat. Seat awl hnawh khah nana cut-off mark vawi 6 an tihhniam hnuah pawh 90% chin tal an la ti hram tho. Chutiang zawng zawng hnua seat awl a la awm hlauh chuan Pathian khawngaihna nen a la lut thei hram mahna le... College ṭha hoah cutoff mark 90% aia hniam hi a awm mang lo.

Commerce Topper hian 81.2% chauh a hmu a, hetiang hi a mark hmuh dan a ni: English - 81, Business Maths - 80, Business Studies - 82, Accountancy - 87, Economics - 76 = Total 406. India rama Commerce zirna college ṭhahoah hian cut-off mark hi 90% aia hniam a awm mang si lo a. Mizoram puma pakhatna hi India rama Commerce zirna college ṭhaho-ah hian a mark avang ringawt hian a lut thei lo nghal ringawt dawn tihna a ni.

Rawtna

Hetiang hi kan dinhmun a nih avangin zirlai nawlpui tan mai bakah kan zirlai thiamthei filawr deuhte kawng kan sialsak theih dan tur hi ngaihtuah a ngai ta niin a lang. Chutiang tur chuan kan topper-te mai ni lo, top 10/20 a lang ho mark hmuh dan uluk taka zirchian a, eng subject-ah nge an hniam, eng nge an chak lohna tih zawng zawng kan zir chhuah a ngai. Tin, kan marking system pawh ennawn a, heng a thiamtheiho paper thleng hian ennawn leh vek nise a duhawm hle.

Zawhna leh zirchian deuh ngai thil a tam hle. Kan zirlai thiamthei deuhho hian an thiam lehzual theih nan eng nge an mamawh? School-ah zirlai thiamthei lo zualte a bika enkawlna kan pek ṭhin ang hian a thiamthei zual deuhte hi a bika enkawl deuh an ngai em? Kan society huau huau tam lutukte hian a tihbuai loh theih dan tur zawn a ngai em? Engtin nge an thiam lehzual theih ang? Thiam em em siin exam hmachhawn dan an lo thiam tawk lo zawk em ni? Language subject-a mark kan hmu sang thei reng reng lo maite hi siamṭhat dan a awm em? (2016 HSSLC Arts topper-in English-ah mark 80, Science topper-in 90, Commerce topper-in 77 an hmu a. HSLC topper pawhin English-ah hian mark 84 chauh a hmu).

School Education Department leh MBSE-te hian zirtirtu pawlte phung-bawma sawma hmalak deuh chu a ngai niin a lang. Kan zirlai pawlte pawh hian Top 10 chin chawimawi ringawt lovin, percentage sang tak target nei se, chumi hmu pha chin chu lawmpuina/ chawimawina hlu tham tak pe zawk se, zirlaite zingah competition a siam zawkin a rinawm.

- C.Lalhriatpuia, Students’ Outlook