Lsc Lem 35 Te Kha!

Document lem, signature lem, tangka lem, entawn emaw, thil lem siam, dik lo taka lakchhawn, a lem siam chawpte hi ‘forgery’ an tih chu a ni. Hetiang lemchanna khawvel hian Zonun zemawi tak hi a chim pil mek a ni. Inkhawm tam, thawhlawm chi hrang ngah, inkhawmpui uar, zawlnei der ngah, political party ruihchilh ching, hriselna ngaihthah, nungchang mawi erawh hmuh tur awm chuang si lo. A va'n hahthlak tehlul êm!

Pawi-Lakher Regional Council ṭhin chu Mara Autonomous District Council (MADC), Lai Autonomous District Council (LADC) leh Chakma Autonomous District Council (CADC) -ahte hmun thumah ṭhendarh (trifurcate) niin India ram danpui Sixth Schedule hnuaiah April 29, 1972 khan Autonomous District Council siam a ni. Khata ṭang khan heng ADC pathumte hian Revenue Department leh department dang dangte an lo nei chho ve ta zel a. Tichuan, Kum 2007 khan India leh Bangladesh ramri hung tura hma lak a ni a. India leh Bangladesh ramri hungna tur atana sorkarin CADC huam chhunga mimal ram a laksakah, LSC lem 35 hmangin zangnadawmna la an awm tih hriat chhuah a ni. CBI chuan chhui zuiin, hetih hun laia CADC Revenue Officer Ranga Mohan Chakma chu LSC lem pe chhuaktu berah puh a ni. CADC hnuaia Surveyor pahnihte nen inthurualin ram lak ngai tur hming list pawh dik lo taka siama puh an ni a, LSC pek chhuahho hi sorkar pisa chawlhnia pek vek nia hriat a ni bawk.

Hei vang hian Prevention of Corruption Act, Special Judge Pu HTC Lalrinchhana chuan Land Settlement Certificate, LSC lem hmanga zangnadawmna la mi 23-te thiam loh a chantir a, bail-a lo chhuah lailawk tawh pawh sutin tan ina khung nghal turin thutlukna a siam ta a ni.

UT/State kan nih hnu tun thlengin kum 52 kan hmang ral mek. Khatih hun chhung zawng khan Land & Revenue Department, Mizoram Govt. hnuaiah LSC lem, LSC thlawk thei, Land least lem etc. hi eng zat nge awm tawh ang le? Zangnadawmna lakna tura CADC Revenue Department-in LSC lem 35 a siamsak hi chu nep tak a la ni. Mizoram State Revenue Department-in LSC thlawk thei; Land least thlawk thei a siam zozaite hi thehkhawm ta chiah ila, India rama truck lian ber leh sei ber chi pawhin a phur seng tawh kher lo vang. Ram changkangah chuan hetiang ram lem, LSC lem hmanga inbumna (fraud) hi a awm ve ngai lo.

Hmanni lawkah Mizoram CM-in lehkha lem (forgery) hmanga zirtirtu 28 lak tawhte banna thupek pawmpuina a ziah hnan tawh bawk. Sawi tur a tam lutuk, sawi sen a ni lo. CBI kan ko lut ta bawk a, CADC, LADC, MADC leh Mizoram State Land & Revenue Department-te hi uluk deuha chhuitir ni ta se, man chhuah tur an ngah viau ta ve ang. Revenue Minister 9 vel kan neih tawhte khan Revenue LSC lem leh LSC thlawk thei/Land least thlawk thei hi an tireh thei miah lo va, tuna Revenue Minister tal hian he hlemhletna tenawm tak hi titawp ngam se. Hetiang renga kan kal zel dawn a nih chuan ADC a ni emaw, State Revenue a ni emaw, LSC lem, a thlawk thei/Land least thlawk theite hi khawvel tawp thleng pawhin chhungtinte'n kan la hum fur dawn tih hi thil chiangsa a ni e.

- Dr. C. Lalrampana