RESERVED FOREST BIHCHIANNA - II

REVENUE vrs FOREST

Kum 1965 a Aizawl- Silchar via Sairang inkar kawng (800 mtrs) hi Roadside Reserved Forest atana puan a nih aṭang khan vawiin ni thleng hian Forest Dept chuan an ramah chhalin, neitu dinhmun an la hauh ngar ngar a (Reserved a nihna ang chuan an enkawlin an humhalh chuang lem hlei lo va). Revenue Dept lam lahin ram hi kan ta tiin Reserved Area chhungah In hmun leh Ram Pass hrang hrang an pe chhuak chur chur reng bawk a. Neitu nia inchhal ve vete hi Mipuiten tu nge a neitu tak tak zawk ni ang tih hi kan zawhna a ni.

Dt.16.12.2022 a RTI hmanga zawhna, DFO Kolasib in a chhanna ṭhenkhatte hi lo tarlang ila : Zawhna 1. Roadside Reserved Foresr Area ah hian EF&CC Dept hian hma a la em? Engtin nge a enkawl? P/Patta, House Pass/ LSC te LR&S Dept in a pek te hi Forest Dept hian a hriatpui em? Objection a siam em?

Chhanna : Roadside Reserved Forest hi EF&CC hian neitu nihna (Nodal Dept) neia him taka awm tura dan (Forest Act 1955 & Forest Conservation Act 1980) hmanga humhalhna bak sum leh tha senga enkawlna a awm hran lo. LR&S Dept in Roadside Reserved Forest chhunga P/Patta, House Pass/ LSC a pek te hi EF&CC Dept chuan a hriatpui lo va, remtihpuina pawh a pe lo. Chu mai chu ni lovin LR&S Dept hian a chhunga ramngaw humhalhna dan kan tarlante hi an bawhchhia a ni. Hetiang Pass te hi a pechhuaktu Dept hnenah Cancel tura ngenna / hriattirna pek ṭhin a ni a. NGT Order Dated 12.05.2020 bawhzuiin Kolasib DFO pawhin dan bawhchhia Pass a lo pek chhuah tawhte pawh Cancel leh turin Dt.12.10.2020 khan LR&S Dept hnenah lehkha a lo pe tawh a ni.

Zawhna 2 : Roadside Reserved Forest Area enkawl nan hian EF&CC Dept hian Sum eng zat nge a sen tawh? Sum a seng a nih chuan a senna details min pe thei em? Tin, thing a phun a nih chuan eng thing te nge?

Chhanna : Roadside Reserved Forest enkawl nan hian EF&CC Dept hian a hranpain sum sen a nei lo.

Zawhna 3 : Roadside Reserved Forest Area chhunga In leh Lo neite hi EF&CC Dept hian eng tin nge tih a tum?

Chhanna : Dt.19.02.2022 a GAD Meeting Minute chuan CALA Kolasib-in Dt.25.10.1980 Forest Conservation Act lo pian hma leh a lo pian hnua Roadside Reserved Forest huam chhunga Ram Pass neite lo thliar fel a, a report chu DFO Kolasib hnenah thehlut tura a tih chu tun thlengin a la thehlut lo va. He report hi a thehluh veleh 25.10.1980 hnu lama Pass pek chhuah te chu Cancel tura hmalak a ni ang.

Roadside Reserved Forest chhungah hian Dan ang thlapa In hmun leh Huan Pass nei tam tak an awm a. Ṭhenkhat chu District Council hunlaia mite a ni a, tin, 2010 hma lama Village Council in Ram pek/ṭheh phalna an neih hunlaia VC ten Pass an lo pekte pawh a awm nual bawk a. Revenue Dept hian Mizoram (Land Revenue ) Act 2013 tlawh chhanin Valid Pass a pe chhuak reng bawk a, chung Pass neite chuan Sawrkar ah chhiah mumal tak an chawi bawk a ni. Forest Dept hian Reserved Forest chhunga dan lova awm, Pass an lo pek chhuahte Cancel turin Revenue Dept ah lehkha te hial an lo pe tawh a ni a; hei hi Revenue Dept te hian tun thlengin hma an lak awm kan la hre lova, an pek belh zel zawk niin a lang a ni. Tunah hian Reserved Forest hi neitu nihna pahnih awm mek karah mipuite hi min awmtir ni berin a lang a, Sawrkar hian a rang lama a tihchian vat hi a ngai a ni ber mai. He thil hi chinfel vat a nih loh chuan Ram inchuhna avanga intualvuakna hial pawh thleng thei a ni a, thuneitu lam te pawhin ngaihven rang se a tha khawp ang. Tin, Forest Dept hian RRF hi kan ta a ni ti a a hauh a nih chuan a then a zar chauh hi hauh lovin Reserved Area zawng zawng hi hauh sela, strict takin enkawl bawk rawh se, a nih loh chuan Reserved Forest hi phum bo ngam rawh se.

RESERVED FOREST HI HMASAWNNA DALTU A NI

Roadside Reserved Forest Buaina : Reserved Forest avanga Zoram tana thil pawi tak chu hmasawnna tithuanawptu leh tibahlahtu a ni hi a ni. Project hrang hrangah harsatna siamtu a ni a, kan nih tur ang ni phak lovin min siam a, kan thenawm state te aiin kan hnufual phah bawk. Reserved Area chhunga ram neitute tibuaitu leh a hun taka an ram man la thei lova tihkhawtlaisaktu a ni bawk.

Tun hnaiah Vairengte – Sairang inkar 4-Lane kawngpui laih turah pawh RRF avangin harsatna leh buaina nasa tak a thleng mek a. Kum 2020 atanga ram lak fel tawh vawin ni thlengin a la fel hlei thei lo chu a nih hi. Forest Dept te chuan he 4-Lane kawngpui kalna tur ram hi Roadside Reserved Forest a ni e tiin Forest Clearance a demand a. Chutih mek lai chuan Dt.27.01.2021 khan Guwahati High Court chuan Mizoram Forest Act 1955 Section 14 & 21 tlawhchhana Reserved Forest an puanna chu a rawn paihthla ta a. High Court thu benchhanin Mizoram Sawrkar pawhin ram tihchianna ( Status of Land ) ti chhuakin , Reserved Forest a awm tawh lova, he ram hi Govt Land / Private Land a ni tawh, chuvangin Vairengte – Sairang inkara 4-Lane kawng kalna turah Forest Clearance pawh lak a ngai love tiin thuchhuah a siam zui ta a ni. Forest Dept chuan High Court Order leh Sawrkar thuchhuak chu pawm duh lovin, vawin ni thleng hian Thingkih phalna ( Tree Felling Permit) a pechhuak duh ta lo a ni. Chumi avang chuan he 4-Lane kawng laih hna pawh hi tan thei lovin an awm a, ram an laksak te hnenah pawh Zangnadawmna sum pek chhuah theih lohvin a awm phah ta a ni. Hetia Forest Dept ten Court Order leh Sawrkar thuchhuak pawisa lo leh zawm duh lova a awm ta mai hi thil mak tak a ni. Court zahawm tak thuchhuak zah lohna ( Contempt of Court ) thubuai te hi an awrh palh ang tih pawh hlauhawm tak a ni.

Kan hriat angin Vairengte – Sairang kawng hi Mizoram Kawngpui pawimawh ber leh kan chak lakluhna ( Lifeline) pui ber a ni a, tuna kan kawng dinhmun te enin kawngpui tha neih hlan hi a nghahhlelhawm em em a ni. Ministry of Road Transport & Highway ten 4-Lane siam tuma hma an lak mek laia Roadside Reserved Forest avanga tun thlenga kawng laih hna tan thei lova a awm ta mai hi a vanduaithlak tak zet a ni. Roadside Reserved Forest avanga he 4-Lane kawng laih tur hi pamtul a nih vaih chuan engtikahmah hetiang proposal hi kan ramah an rawn siam leh tawh lovang, an Cancel a nih chuan Zoram tan channa nasa tak a ni bawk ang.

4- Lane kalna tur Alignment chhungah hian mimal ram nei thahnem tak an awm mek a, chungte chu sawrkar in he kawng kalna atan hian dan angin an ram chu laksakin , kum 2020 atang khan an ram hi khawih theih lohvin a lo khuahkhirh (Freeze) sak tawh bawk a ni. Huan thlaia eizawngte pawhin nasa takin harsatna an tawk mek a, kum 4 lai mai an ram khawih thei lova awmin hmathar pawh an la thei lo a ni. Ram neitu thenkhat phei chuan 4-Lane kalna tur ram an lo pek tawh hi Sawrkar in pekir leh mai se an duhthu an sawi hial a ni. Thenkhat chuan RRF avanga buaina an tawk hi an hrethiam lo hle a, Forest-in kan ram an tih chuan a hmunah rawn kalin an ram chu rawn kawk rawhse tiin an thinrim thu an auchhuahpui hial tawh a ni.

Hetih mek lai hian harsatna siam belh tumin Environment NGO te pawh an awm mai mai biklo. An rawn vei thar ta thut emaw tih turin 4-Lane a kal dawn ta maw tihah kan Environment chhe tur an rawn hmangaih thar veleh a. Assam nena Ramri a kan buai laia Sawrkarin Nuai sang tel tehmeuh senga Ramri Kawng hmun hrang hranga an laih mup mup laite khan khawiah nge an awm le ? Khang an kawng laih te kha belhkhawm ila tuna 4-Lane kawng an laih tur Vairengte – Sairang ai pawhin a thui zawk ngei ang. Khang an kawng laih te khan nasa takin kan Environment a tichhe lovem ni ? Ram chhe tur hi vei tak tak nisela a thim a var pawh thlu lovin mawngvawmba ang maiin an che chhuak tur hi a ni asin le. Sum awmna lam a Environment chhe tur vei kan lo pung hluai thin te pawh hian ngaihtuahna a ti thui mang e. Zoram tana thil tha ti ni a inngai Environment veitute hmalakna hi mi zawng zawngin tha kan ti vek lemlo, an hmalakna phenah hian mi tam tak rilru hrehawm ngawih ngawihin an siam a ni tih hi hre tel mawlh tehse. Reserved Forest hi hmasawnna daltu a ni kan tih rual hian , a phena environment activist te hi an hnawk zawk mah awm e.

RESERVED FOREST NOTIFICATION HI DENOTIFY / DE-RESERVE A NGAI

Harsatna tam tak min siamtu RRF hi Denotify / De-reserve tura hmalakna hi Sawrkar emaw Pawl angin emaw a la awm chiah lo niin a hriat. Reserved Area chhunga cheng mipuite pawh hian kan bengkhawn vaklo nge, heti lam hawia Sawrkar han nawr kal turin Aw kan chhuah ngai meuhlo niin a lang.

Sawi tur ting chuan Mizoram Sawrkar chuan TN Godavarman Case chungchangah 1997 khan Supreme Court ah Affidavit File a lo thehlut ve tawh a. Amaherawhchu, he thil hi bawhzui chhunzawm a ni ta lo nge vawin thlengin a thawm hriat tur a awm lo. Dt.27.02.1997 a Supreme Court a Affidavit a thehluhah hian Expert Committee Report pawh kimchang taka thehluh tel a ni.Expert Committee ten Mizoram chhunga Reserved Forest neih chhunzawm zel a remchan tawh lohna chhan hrang hrang te sawiin hei hi tihtawp (Abolished) mai nise tiin rawtna an siam a ni. Tihtawp rawtna chhan point thenkhatte han tarlang ila : i) Loh theih lohva lo neia eizawngtuten ram (reserved forest) an tihchereu zel vangin, ii) Reserved Forest chhungah khua (villages) engemawzat a awm vangin, iii) 1965 kuma Reserved Forest an puan atanga Forest Conservation Act 1980 inkarah , heng reserved hmunah hian chenna in (permanent residential) leh huan nghet nei tam tak an awm tak vangin, iv) Mizoram chu kum 20 chuang rambuai in min tlakbuak a, hemi chhung hian dan angin reserved forest te hi humhalh theih a nih loh vangin, v) Kum tam tak reserved area chhunga lo awm tawhte sawn chhuah hi thil theih ni a lan loh vangin. He Affidavit hi Sawrkar hian thar thawh leh sela a duhawm khawp mai. Nikuma Sawrkar in Lui kam humhalhna Dan thar – The Mizoram (Protection of Rivers) Act 2023 a duan lai khan Kawngpui kam – Roadside Reserved Forest an lo ennawn telve lo kha a pawi ngawt mai. Ram mipui khawih thil a ni a, dan siamtute tan pawh ngaihthah chi a ni lo.

Reserved Forest Notification hi Guwahati High Court-in lo hnawl tawh mahse, Court sang zawka Appeal leh theih a ni a, Court-in a ngai ang hian awm leh rawh se tiin thutlukna pawh a siam leh thei a ni. Chuvang tak chuan he RFF Notification hi Denotify / De-reserve tir hi tihmakmawh a ni. Denotify lova a awm reng chuan tuten emaw remchangah la in Court-ah an Appeal leh ngei ngei dawn tih hi thil chiang sa a ni. Denotify tir hi Sawrkar mawh liau liau a ni. Ram mipuite harsatna sukiang tura Sawrkarin hma a la duhlo a nih chuan a mualpho ngei ang. A ranglamin Roadside Reserved Forest dinhmun dik tak hi zirchiang sela, effected area a mite pawh min rawn tawh sela, he reserved hi a tak taka hman zui zel a remchang tawhlo a nih chuan thiah tir mai kha thil finthlak tak a ni.

Tun dinhmunah State sawrkar pawh hian Reserved Forest a an lo puan tawh hi ama thuin a lo tidanglam ngawt thiang lova, Forest Conservation Act 1980 hmalam kha chuan heng reserved te hi a tul a tih chuan a De-reserve thei a. Amaherawhchu, Forest Act 1980 hnulamah chuan De-reserve emaw Denotify tur chuan Central Sawrkar ah thlenin Supreme Court phalna a lak ngei ngei a ngai a ni.

Mizoram, State puitlinga hlankai kan nih dawn a he Forest Reserved Notification 1965 , Assam hnuaia kan awmlaia diklo taka an lo puan ennawnna chang hre lova a ngai ngaia kan lo pawm / senglut tawp mai kha a pawi ngawt mai. Law Dept lam tal khan lo zirchiangin lo hnawl sela chuan tun hnua buaina tam tak hi kan tawk lo tur a ni a. Hemi avang hian Tuirial Hydel Project ah nasa takin kan buai phah tawh a, hun rei tak project a tikhaihlak a; hei tunah RRF avang bawkin 4-Lane kawng laih turah kan buai leh ta chiah a, kum 4 hnuah pawh kawng lai thei lovin an awm phah. RRF hi advantage ah la in thenkhatin a tihbuai dan tur ringawt an lo dap ve char char bawk a, RRF avang hian kan buai nuai nuai ni berin a lang. Dan dik lova an lo puan RRF hi mi thenkhat ten hum tum tlatna rilru an pu reng mai pawh hi a dik biklo.A diklo leh tangkai tawhlo na na na chu paih ngam a tha. RRF paih lova heti lehchen kan lo awm hi a phenah hian paih phallohna chhan tur thildang a awm zawk em ni tih hi ngaihtuah tham a tling.

- James Vanlalringa, Vairengte