MIZORAM UNIVERSITY LEH ADMISSION CHUNGCHANG

Kum 2020 - 2021 session atana Mizoram University hnuaia zirna course hrang hrang atana luh dilna hun chu September ni 30 khan a lo tawp ta a. Kum dangah chuan June ni 30 hi luh dilna hun tawp ni a ni tlangpui ṭhin. Kuminah chuan hripuiin kan kaldan a tihmuan tak em avangin sawn hlat leh siamrem ve zel a ni. Kum hnih/ kum thum kal ta vel aṭang khan dilna hi online veka thehluh a nih tawh bakan nikum lam aṭang phei kha chuan zirlaite tana a hautak lo zawk tur ngaihtuahin a hard copy (a lehkha phekin) thehluh pawh ngai tawh lo tura ruahman a ni. 

MZU-a zirna chhunzawm duh tam tak zirlai kum tinin an awm a. Dilna chungchang leh luh theih dan kawng hrang hrangah hriat fuh loh deuh leh tihdan hriat loh avanga zawhna tam tak awm ṭhinte sawifiah hi ṭhaa hriatna a awm tak avangin mi nawlpuiin min hriatpui tura kan duh te kan han tarlang dawn a ni. 

Course hrang hrang kan neih te: Mizoram University hian Bachelor’s Degree (a awlsam zawngin BA leh a tlukpui) zir zawha zir chi Post-Graduate (MA leh a tlukpui) zirna subject hrang hrangah kan nei a. He’ng bakah hian Pawl 12 zir zawha zir chi Technical lam (B.Tech & B.Arch) kan neih bakah Vocational Course, Pawl 12 zir zo tawhte tana zir theih kan nei nual bawk. B.Ed leh M.Ed zirna bakah subject hrang hrangah Ph.D zir theih a ni bawk a ni. (M.Phil hi kumin aṭangin NEP rawtna dungzuiin lak thar a ni dawn ta lo)

MZU a lut thei tura ṭulte: Course hrang hrang kan neih hovah hian a lut thei tura thiamna ngai a awm vek a. Hei hi kan website www.mzu.edu.in ah hmuh theihin a awm. 

Lut tur thlanna atan hian a thiam thiam lak an ni mai ṭhin: Zirlai, zirna chhunzawm duh, Mizoram pawna kalna tur nei lem lo leh kal duh lem lo hi kum tinin a sang telin kan nei ṭhin. Department tinin kan seat neih zat hi a inang lo a, seat neih tam berna Department-ah pawh 50 bak a la awm thei rih lo. Hei vang hian zirlai lak tur thuah MZU hi a fimkhur em em a, eng course-ah pawh lut thei tura thiamna an neih ngai (qualifying exam) a an marks hmuh zat aṭanga zaa sawmnga leh entrance exam a an mark belhkhawmin a sang sang aṭanga thlang chhuakin lak an ni ṭhin. 

Kuminah erawh chuan hripui leng avanga inhnaih chilh a rem loh avangin zirlai mark neih zat aṭanga a sang sang lak tura rel a ni. 

Insawipuiin awmzia a nei lo: Mizoram University kan inchhuanna leh dik kan intih vena ṭhin chu zirlai admission tura in sawipuiin awmzia a nei lo hi a ni. A hma lama ka’n ziak tawh ang hian a mark sang sang lak mai ṭhin a nihna hian thawktute min zangkhai hle. Hetiang a nih mek lai hian khawi khawiah emaw ‘sawipuitu neih loh chuan admission hmuh a har’ tih ang sawi rik a lo awm leh ṭhin. 

Mizote hi in sawipui hnam, chhung leh khat leh ṭhen leh rual induhsak tura hmalak ching kan nihna hian kan zirlaiteah thui tak nghawng a neiin anmahni inringtawk lovin kan siam a ni mai em tih hi zawhna lian tak a ni awm e. 

Hun hmalamah kha chuan kan Mizona avangin tute’n emaw ‘min lo sawipui/ min lo hre reng rawh aw’ an tih hian a mawi atan ‘aw’ kan ti mai ṭhin a. Thawktuho zingah pawh kan sawipuite kha an mark hmuhin a phak loh chuan an hmu dawn lo tih kan hriat avangin kan sawi zui ngai lem lo. Tun hnaia lo lang ta erawh chu anmahni thiamna leh an mark a san avang liau liauva lut tura thlan ten sawipuitu an neih vanga lut emaw an intih ṭhin avanga ‘sawipuitu nei tana luh awlsam’ anga thu a lo thang ta hi a ni awm e. 

Zirlai tumah, sawipuitu a neih ṭhat avanga amah aia thiam zuan khuma lak an awm ngai lo tih leh an thiamnain a tlin phawt chuan zirlai sawipuitu nei miah lo pawh lak an ni ṭhin tih hi hriain kan nau/ fate hi zirna sang zel chhunzawm an duh a nih chuan mark ṭha tak nei tur leh an zirlai thiam turin a hunlaiin fuih sauh sauh zawk ang u.

Quota/ Reservation: MZU hnuaia zirna peng hrang hrangah hian seat hauhsak bik awm dan chu- za zela sawmnga(50%) General Category tan a ni; a dang sawmnga (50%) chu SC/ST tana dah a ni. 

Seat zawng zawng aṭanga za zela panga (5%) chu piangphunga rualban lote tana zuah a ni. Pianphunga rualbanlo diltu an awm a nih chuan an rualbanlohna tichiangtu lehkha aṭangin 60% aia nasaa rualbanlohna eng pawh nei chu an mark hmuh saah 7% belh an ni ang a, 40% aṭanga 60% a rualbanlohna nei chu mark 5% belh an ni ang. 

University-in special quota, seat awm zawng zawng aṭanga 10% a hauhsakte chu- 

(i) Zirna lama hmun hnufual aṭanga lokalte - ram pum (India) zirna dinhmun (literacy percentage) aṭanga 5% a hniam aṭanga lokalte chu an mark neihsaah 5% mark belh an ni ang. 

(ii) Infiamna a thei chungchuangte - infiamna lama India ram aiawha khawvel huap inelnaa tel tawhte chu 10% mark belh an ni ang a, an awmna State aiawha ram pum inelnaa telte chu 5% belh niin ram pum huap Inter-University infiamnaa telte chu 3% mark belh an ni bawk ang. 

(iii) Mizoram University a thawk nghet fate - MZU a thawk nghet, an thawk nghet a ni tih Registrar aṭanga lehkha nei fate chu an mark hmuhah 7% belh theih a ni bawk. Hetah hian hriat ṭhelh awm fo chu, heng quota hnuaia dil zawng zawngin seat an hmu tura ngaihna hi a ni awm e. Seat hauh bik hnuaia diltu hi a seat awmzat aia an tam chuan mark belh theih ang ang hi belh an nih hnuah a sang sang lak an ni ang. 

Economically Weaker Section: Kum kal ta aṭanga central lamin scheme thar an rawn siamah chuan seat awmsa zawng zawng bakah EWS tan seat belhna 10% chu Central University zawng zawngte pek kan ni a. He seat hi reservation nei ve lo (SC/ ST/ OBC etc), general kan tih maiho zinga sum lakluh kum khata nuai 8 aia tlem tana dil theih a ni. He seat dah bik hi Mizoram angah chuan dil thei hnam dang an tam loh avangin hnawh khah lohvin a awm ṭeuh mai a. Kan unau Nepali, eng category maha seat hauhsak dawng ve thei lote zingah he seat hauh bik hi rawn dil nachang hria an pun deuh deuh kan duhsak hle. 

Form fill up chungchang: Online a dilna hi thehluh vek a nih tak avangin zirlai tam tak mahni inring tawk lo an awm ṭhin. Zawhna pawh kan dawng hnem ṭhin hle. Dilna hun leh hmun hawn a nih tirh aṭanga hriat tur pawimawhte dah vek a ni a, kan zirlai leh anmahni puitute hian chiang taka chhiar turin kan beisei ṭhin a. Harsatna bik eng emaw chinfel pui ngaite puih inhuam reng thawktu kan neih rualin in kaihhruaina chiang tak awm reng erawh en nachang hre turin kan inchah duh bawk a ni. 

-