Pu Duhoma thawnthu ka hriat ve dan

Hmanlai hian Hmunkhawhar khuaah mi pakhat a awm a, chu pa chu Rualrem khuaah a pem a; nimahsela pem lehkha a lak hman loh avangin Rualrem khaw mi chu ni tawh mah se Hmunkhawhar khua anga ngaih a la ni a, tuna a awm mekna chu Rualrem khua ni chung siin technically (dan mitah) chuan Hmunkhawhar khaw mi anga ngaih a la ni. 

Chuti chung chuan a awmna chu Rual­rem a nih tawh avangin Rualrem khua angin engkim a ti a, a inziah luhna chu Hmunkhawhar ni mah se Rualrem khaw mi a nihna a bo chuang lo; a chhan chu tuna a chen mekna chu Rualrem a nih tawh tlat avangin. 

Pu Duhoma leh ZPM Party MLA Candidate zawng zawng khan ZPM hminga MLA chuh kha duh mah se Election Commission lamah khan ZPM an la ziah luh loh avangin Independet in an chuh a, mahse an zavai khan ZPM an ni tih chu mi­pui­in an hre sa vek a ni. 

Inziah luhna chu Independent a ni a, an khawsakna leilung leh an awmna chu ZPM a ni a, an inziah luh dan te mai chauh kha a ZPM lo lai a ni a, chu pawh chu ZPM kha dan anga ziah luh a la nih loh vang chauh mai a ni. 

Flag eng (yellow) hmangin ZPM MLA candidate zawng zawng kha an campaign vek kha a ni a, rorel lai Congress MLA 30 chuang nei aiin MLA te kha an rawn la tam zawk thei a, kha kha Independent chakna ni lovin ZPM chakna a ni. Flag eng leh lukhum symbol-a hmangtute chakna kal zel avangin ZPM chuan seat pariat an la ta ṭhawt a ni. 

ZPM MLA an ni tih hi chu a thlang tlingtu mipuite thlan chhan a ni a, Independent MLA ni turin an thlang lova, "Independent kan ni e," tiin an candidate miah lova, "ZPM min lo vote ve rawh u," tia campaign avanga MLA an ni. Pu Duhoma phei chu ZPM mai pawh ni lovin ZPM in Chief Minister atana an candidate a ni tih mipuiin an la hria a ni. 

MNF MLA, thiamna lama sang ve fu fu leh kohhranah pawh mi chhuanawm tak tak siin, "Pu Duhoma hi Independent MLA ni si ZPM Office ah mi thar a lawm lut," tih vanga MLA aṭanga bang tura an nawr hi Hmunkhawhar khaw chhuak Rualrem khuaa pem tawh pem lehkha la lak loh avang, "Tunah Rualremah cheng tawh mah la, Rualrem khaw mi i ni lo, i inti Rualrem lutuk," tih ang vel chauh a ni lo'n ni Pu Speaker?

Tuna a khawsak mekna ni na na na chu pawm mai tur a ni a, hmana a lo khawsakna aṭanga pem lehkha neih loh vang mai maia thil khel hi rilru ṭhat vang niin a lang lo. 

Mizo patling thiltih duh dan hi Vanapa leh Taitesena kha lo tho leh se zahthlak an ti ve ngawt ang.