A Bul Ṭan Ṭhat Hi
Taimakna leh thawhrimna te, tumruhna te, rinawmna te, inpekna leh a hun taka tih ṭhinna ṭang kawp chuan ṭha takin bul a rawn ṭantir thei ṭhin.
Sawrkar hnathawkin a bul a rawn ṭan ṭhat dawn chuan a thil tihte chu a hun takah zel a tih a ṭul a, chumi ti thei tur chuan rinawmna leh taimakna nun a neih a ṭul a, a hnaah leh a thawhchhuahah a lungngawi tawk a ṭul bawk a ni. Sawrkar hna thawk rinawm lo, a tir aṭanga bul ṭan ṭha lotu chuan, hun a vawng ṭha lo va, a hnaah leh a sum hmuhah a lungawi tawk lo va, Department kal tlanga sum lo kal te chu ama tan a lo la peng fo ṭhin. Chu chuan amah leh a awmna Department mualphona a thlen ṭhin.
Lo neitu leh huan siamtute hian bul an ṭan ṭhat leh a ṭul a, zing thawh hma te, tukṭhuan ei hma te, hna thawk tura thawh chhuah hmate hi a ṭul em em a, Lo neitu tho tlai, tukṭhuan ei tlai, feh tlai ṭhin chuan a lo a dah hnim ṭhin. Chutiang mi chu vengchhunga miten ‘thatchhia’ an ti a, a hming a ṭha thei lo, chutiang ang mi tan chuan buh hawpkhawp thar a harsa ṭhin. Hnathawktu tan chuan a hun tak zela hna thawh hi bul ṭan ṭhatna ṭha ber chu a lo ni.
Ram hruaitu (Politician) te chuan ṭha tak leh dik taka ram hruaina hna thawk turin bul ṭan ṭhat an duh ṭhin a, mahse, an hnuaia mi party worker leh Political campaigner te sawrkar hnathawkte bawkin bul an rawn ṭan dik lo va, dan zamte an bawhchhia a, a tawpah ram hruaitute bawkin a mawh a phur a, an lo hmingchhe leh ṭhin.
Zoram hi kum tam tak chhung chu bul ṭanna dik lo hmangin enkawl a lo ni tawh a, kan ram dinhmun leh a chhunga cheng mihring nun phung chu hruai chhiatin a awm mek a ni.
Zoram hian sawrkar thar a hrawn mek a, anni hian a bul aṭangin dik tak leh ṭha takin, eirukna tel lova hna thawh chhoh an tum viau mai, an thil tumte tihlawhtling turin an hnuaia mi sawrkar hnathawkte, an awmna party mite leh pawn lam mite thlengin an thunun hneh a ngai dawn a ni.
An tumte tihhlawhtlin a nih theih nan mipuite pawhin bul kan lo ṭan ṭhat ve a ṭul hle dawn a ni. Bul ṭanna dikin LALPAN min hruai zel a, keini pawhin mite kan hruai ṭhat ve theih nan kan thil tih kawng tinrengah kan bul ṭanna chu lo dik zel tawh rawh se.
“Aw ṭhalai kan ram tan lo pen chhuak ru, Diknain Zoram hi chawisang ru, Hmangaihna leh Zonunmawi nen, I duat ang u, kan Zoram nuam hi.”
- H. Neihchungnunga,
Durtlang North