COVID POSITIVE KA NIH LAI KHA

Zing karah chuan kan nu nen kan hnar kan va hawlhtir a, ka vawikhat inhawlhna tur a ni bawk a, a za ka tiin ka hahchhiau nasa ngang mai. RAgT hmanga an han test chuan ka lo Positive reng mai niin, ‘Ka Pu, i Positive‘ min han ti chu a dawnsawn a nuam lutuk hran lo. Inthlahrunna nei hauh lo leh ṭawngkam fiahfai takin ‘I Cancer’ pawh min ti zawk ni se la, ka dawnsawn dan chu a danglam kher awm chuang lo e. Ka pawm lo chuan ‘A dik chiah maw’ ka han ti leh kher a, ani lah chuan confi takin ‘Dik e’ tiin min chhang leh a, chutah zet chuan ka inpawm thei ta a, CoviD Positive chu ka lo ni ta ka inti a. Chuta ka rilrua thu rawn awm hmasa ber chu, ‘He CoviD vang hian ka boral thei a, ka boral lo thei bawk. Pathianin keimahah duh a nei a ni ngei ang’ tiin lawm taka pawm ka tum ta a.

Nimahsela, CoviD hri kai chu natna dang ang a lo ni hauh lo mai a, Pathian zarah kan vanneiin a natna ngau ngau chu engmah tham a ni lo zawkin kan palzam thei viau mai. Lu na fek fek a awmin thil ei a tui lo bawk a, kua a lo chiang lo ṭhin bawkin taksa pangti kham a lo awm bawk chu a ni deuh mai a, kan vannei viau a ni. Chu aia tawrh har zawk leh min tichautu zawk chu a boruak chu niin mi ṭhenkhatte tan phei chuan depression neihna tham hial pawh a ni awm e. Kan taksa natna ber lah palzam mai mai tawk emaw lek a ni a, mahni in chhungah awm mah ila, pawnah chhuah a rem loin ṭhenawm khawvengte lah chuan min rawn ngaihsakin ‘in dam em’ min rawn ti awl lo a. Chawhmeh min suah fo bawkin Phone Call kan dawng awl lo bawk te chuan min tichau zual zawk em ni tih tur a ni. Nimahsela, chu'ngte chu annite tan chuan an tih ngei ngei tur a ni bawk si a, thil lawmawm leh min lainatna vang a ni bawk si a.

Pathian hnenah ṭawngṭai fan fan lo ila chuan ngaihtuahna ṭha lo tak tak pawh ngaihtuah awl tak a ni a, chutiang thil ṭha lote chu inbawhbehtir mai pawh awl tak tur a ni. Chuvangin mihring tak pawha routine siam ngaiin ka hre ta a, hetiang hian ruahmanna kan han siam ta a; ni tin thu pakhat tal ka ziak tur a ni a, darkar hnih tal lehkhabu ka chhiar bawk tur a ni tih chu taksa enkawlna piah lama ni tina tih ngei ngei turin. Pathian zarah kan Positive chhung khan nikhat pawh chawl loin ka tihlawhtling thei kha lawmawm ka ti hle mai a, a chang phei chuan nikhatah thu pahnih/pathumte pawh ziah theih chang a awm bawk a. Chutihlai chuan ni sawm chhung vel kan inkhung chhung khan a tam zawk chu lu hreng chungin Computer ka ṭhutchilh a, taksa sil ṭhem ṭhum nena ka nilen ni hi a tam zawk bawk ngei ang. Mut leh ringawt ṭhin hi ṭhain ka hre si lo a, in chhung dungah ka vei kual zing hle ṭhin bawk a ni.

Mi tam takin CoviD hi an paltlang tawhin Zoram chhungah ngei pawh paltlang an tam tawh a, chutih rualin CoviD vanga nunna chan pawh chhiar tham fe an awm tawh bawk a, keini ngei pawhin kan paltlang dawn nge CoviD vang hian kan hnuk hi a chat mai zawk ang tih zawhna pahnih lian deuh awm chuan ni tin ka inzawtin, a khawi zawk zawk emaw chu kan hmaah a awm si avangin a pahniha hmachhawn thei turin ka inbuatsaih a, ka thlarau lam ngei pawh tihchak tumin ni khatah hunbi neiin ṭawngṭaina ka nei ziah bawk a. Engpawh tawkin engpawh thleng se la, Pathian remruatnaa ngai thei turin keimah ngei pawh inhneh ka tum fan a. Chu'ngte chuan ka thinlungah hmun pawimawh tak changin ngaihtuahna tibuaitu nei loin ka hahdam phah a, zanah luna avangin harh zauh zauh chang awm mah se la, tui taka ka mu thei ṭhin pawh cheng tam tak man niin ka hria a, ka lawm hle a ni.

Pathian malsawmna hi hriatthiam a har ṭhin a, hrehawmna leh natna leh vanduainate kan tawh avanga vui mai tur kan lo nih loh ziate a takin ka hre thar leh ṭhin. Chutih lai chuan CoviD hri kai ka nih a, positive ka ni tih pawh inhre lo khawpa nilenga buai chang pawh ka nei a. Ni khata thu pathum ziah chang neih phei chuan kan thinlung zawng zawng hi kan pe lo thei lo a, thil dang reng hian hmun a chang thei mawlh lo a, mi dang chimbuaitu nei lo mah ila, mahniin dawhkanah lehkhabu chi hrang hrang chhawp hnawkin a lo buai theih ve viau ṭhin mai. Nimahsela, chu chu tun hnua ka ngaihtuah let leh hian lawmawm ka tiin Pathian malsawmna ni bawkin ka hria a, chutiang chuan buai lo ni ila chuan ka inngaihtuah lungchhia emaw a ni ang a, a ṭha lo zawngin thinlung ka lo nei palh thei reng bawk a. Pathian hnenah lawmthu ka sawi nawn leh fo ṭhin.

Ka chhar chhuah taka ropui ber nia ka hriat chu – Mihring hi kan lo chapo hma em em mai a, chapo hi nuam pawh kan lo ti bawk hle mai. Nimahsela, Pathian hian chapona thinlung kan neih hi a lo hre rengin, a duh hunah chuan chapona tlangchhip aṭang hian min lo hnuk thla rang thei viau mai a, engmah kan lo nih loha vaivut ang chauh kan lo nih zawkzia min hriattir leh ṭhin. Amah chu kan mamawh a, A tel loa engmah kan nih lohzia hi min hriattir a tum bawk ṭhin avang hian vaivut aṭanga siam mihringte hian, chapo thei zia zang kan lo nih lohzia hi min hriattir a duh ṭhin a lo ni zawk a, chumi hmanrua atan chuan khawvel thiamnain a damdawi a la hmuhchhuah loh CoviD hri hi a hmang a ni ang tih rinna lian tak ka neih phah bawk a. Mi hausa ber ber leh mi rethei ber berte pawhin he hripui lakah hian himna kan mamawh vek a, Concrete Building ropui tak tak leh Di In chhe tak chhunga chengte zawng zawng pawh, he hri lakah hian kan him thei bik chuang lo a ni tihte pawh fiah takin ka chhar chhuah phah a, Ama hnenah chauh damna a awm a, amah chauh chu kan damna piah lamah kan hlimna leh kan thlamuanna chu a ni tih, fiah takin ka hriat thar phah leh avangin lawmthu ka sawi nawn leh lo thei lo a.

- Mahmuaka Chhakchhuak