Dialysis khawl kan indaih lo
Kal ṭha lo zual tan Transplant (thlak) emaw dialysis emaw tih a ngai a. Dialysis hi chi hnih, Continuous Ambutatory Perito-neal Dialysis (CAPD) leh Hemodialysis (HD) te an ni a.
Hengah hian kan hman lar zawk chu HD hi a ni. Tunah hian Civil Hospital-in khawl pahnih chauh an nei a, damlo Dialysis tih ngai kan lo ṭhahnem viau tawh mai a, an indaih lo hle a ni. Sorkar ni loah chuan Presbyterian Hospital-in an nei a, New Life Hospital-in 2 an nei a, Serkawn (Lunglei)-in an nei a, Aizawl Hospital-in an nei bawk. Nei dang pawh an lo awm mai thei.
Dialysis khawl hi mi ṭhenkhat ka zawh chuan nuaih 15 man vel niin an sawi a. New Life Hospital-a Dr. Mapuia chuan nuaih 7 man vel niin a sawi. He khawl hi Civil Hospital-ah kan indaih lo em em mai a, a hna thawktute pawhin hrehawm an ti hial a ni. Damlo mamawh an tam avangin a tih hun chhung an sem rual a, darkar 4 mamawh te pawh darkar 2/3 emaw an tih sak thei chauh a ni. Chuti chung pawh chuan an lo book khat deuh ṭhup hman tawh ṭhin.
A ṭha ber chu sorkar ber hian khawl 10 tal lei belh sela a
ṭha ngawt ang. Ṭum khatah khawl 10 han lei ṭhawt chu a har deuh a nih pawhin an neihsa pahnih nena panga tal nei thuai tura hmalak a ngai a ni. Pakhat nuaih 10 vela lei theih a nih chuan panga lei nan nuaih 50 vel a lo ni ang a, Sorkar tan thil harsa a ni hran lovang.
Kal ṭha lo tan chaun Dialysis hi nunna chhanna atana thil pawimawh ber a ni a, State pakhat Hospital ve riang ruang chuan khawl 10 te chu neih ve awm chu a ni. A mamawhna leh nunna chhanna atana hmanrua a nihna hi kan lo ngaihtuah lo deuh mai niin a lang.
Private Hospital te hian nei pawh nise a hman man a lo to deuh nge nge a, vawi khatah sang telin a lo inthlau a, damlo harsa zawkte tan chuan a hautak em em a ni. Kar khatah vawi 3 tih te a lo ngai a, vawi khatah private-ah chuan Rs. 4,000/- chuang daih te a lo ni a. Ka hriat sual loh chuan Serkawn Hospital-ah an ti tlawm ber. Chanchinbu-a kan lo chhiar dan kha chuan Durtlang-ah a to ber.
Intih to siak aiin intih tlawm siak tum ta zawk ila, midangte tan malsawmna thlen-tu nih a awl zawk ang. Thuneituten ngaih-ven rang se a ṭha ang.
- Rualkhuma Hmar