Lungleiah Music Festival
Tun hnaia Tourism Minister hoa thuneitute ṭhutkhawm chuan kumin aṭangin Anthurium Festival tihtawp a, a aiah Leitlangpui Music Festival buatsaih turin thutlukna an siam a. Ṭha zawk tak maw, ṭha lo zawk tak maw?
Anthurium Festival hi MNF sorkar hun hmasa, kum 2006/2007 vela huaihawt ṭan a ni a, chuta ṭang chuan nikum thleng khan buatsaih a ni. Buatsaih chhan ber chu–'Khualzin hîpna atan' a nih thu Tourism department-in an tarlang. Buatsaih chhan ber hi chu a hlawhtling vak lo niin a lang a, hlawhtling lo chungin kum 15 chuang chu buatsaih a ni tho. Buatsaih chhan ber hlawhtling lo mah se, mi ṭhenkhatin sum leh paiah hlâwkna an hmuh phah ve thung.
Anthurium Festival-ah hian hun hmasa lamah khan ni khat ka kal ve a, chu pawh chawhma lam chauh. Chumi hnuah ka kal ta miah lo a, kal châkna leh tumna ka nei zui ta miah lo bawk. Keimah ang hi mi tam tak an awm. Mi ṭhenkhat chuan mi hausate intâwllênnaah an ngai niin a lang. Chungte vang pawh chu a ni mahna, sorkarin kumin aṭanga Anthurium Festival tihtawp a tum hi ui lotu leh pawi ti lo mi tam tak an awmin a hriat.
Tourism department-in kût buatsaihna atan central aṭangin sum a hmu ṭhin si a, chuvang chuan Anthurium Festival tihtawp rualin kût dang buatsaih tur an dap lehnghal niin a lang. Thil reng reng Aizawl leh a chhehvela nghat vek loa hmun danga tih ve ṭhin hi a ṭha a, Anthurium Festival aiah Lunglei lama music festival huaihawt an rel pawh hi a ṭha ve pah reng. Mahse, a hming atan 'Leitlangpui Music Festival' tih erawh mi tam takin an helh.
A ni lah tak a, Lunglei lam hian 'regional feeling' an nei lian lutuk em ni chu aw, tih turin thil a awm fo mai. Lunglei mi, thil eng emawa hlawhtlinna neite an tarlanah, 'Lunglei tlangval/nula' tih ang chi hi a tam riau. Aizawl lam hi chuan 'Aizawl tlangval/nula' an ti lo angreng khawp mai. Tourism department thoin Aizawl tih hming dah tel loin 'Winter Festival' an buatsaih mai a nih hi.
Lungleia music festival buatsaih an tum pawh, Tourism Minister hi Lunglei mi a nih bakah, 'Leitlangpui' tih ngat mai hi mi tam takin 'A khaw te rilru' an tih phah a ni mai thei.
Duhthu han sam ve ta ila. Tourism department-in Lungleia festival buatsaih an tum hi a ṭha, a hming erawh Lunglei/Leitlangpui ti tel kher loin, hming dang vuah thei se. Music Festival tih ringawt pawh ni se a ṭha, Mizoram Music Festival tih pawh a ṭha, Rimawi Kûtpui emaw, Mizoram Rimawi Kûtpui emaw tih ni phei se chuan a ṭha hlei hlei. Ngun zawkin lo ngaihtuah thei se a va duhawm em!
- Zoramchhana