Public Library Day pawimawhna

Raja Rammohun Roy Library Foundation (RRRLF), Ministry of Culture, Govt. of India chuan nikum 2015 aṭang khan ni 22 May hi, India khawtlang nun siamṭhatna atana thawktu, Social reformer ropui Raja Rammohun Roy-a pianchampha chu Public Library Day atan a puang a. Mizoramah pawh he ni hi hmang ve-in State Library, District Library leh sorkar recognised NGO Branch Library thahnem takin an hmang a. Library puala programme/ fucntion te buatsaih a ni a, banner leh poster te tarin Library hman ṭangkai a pawimawhna te Mizoram hmun hrang hrangah lantir a ni a, a lawmawm hle a ni.

Mizoramah Public Library hian nasa takin hma a sawn chho zel a. Central sorkar hnuaia RRRLF kaltlangin ṭanpuina (Assistance) kan hmu chho reng a ni. Mizoram sorkarin Library service atan sum duhthusam a neih ṭhin loh avangin Public Library service ṭhanna leh hmasawnna innghahna chu RRRLF scheme hi a ni lo thei lo a ni. Kum 2014 chho aṭang khan RRRLF chuan RRRLF scheme hnuaia ṭanpuina dawng thei turin Library ‘thingtlang’ lama awm te chu ‘Rural Public Library’ tia vuahin matching leh non-matching hnuaia
ṭanpuina Assistance scheme a duang a. Tun sorkar kum kal ta 2015-2016 chhung khan Art & Culture Department, Govt. of Mizoram enkawlna hnuaiah Sorkar Recognised NGO Library District 8 (pariat) huam chhungah 480 neih tawh a ni a. Heng sorkar enkawl NGO Branch Library, Rural Public Library’ ti-a RRRLF-in a vuahte kaltlang hian matching scheme 90:10 (state leh sorkar laipui intum-
ṭawmna) hmang hian Public Library service chuan nasa takin hmasawnna a nei chho zel a ni.

Finna leh hmasawnna min neihtir tur thuziak ṭha tam tak a kum telin a chhuak chho va. Mithiamte irawm chhuak leh thuril te chu thupbo mai lovin lehkhabu hmangin puanzar leh puanchhuah a ni chho zel a. Tunah hian state sorkar leh sorkar laipui ṭanhona avangin Mizoram khaw tin tih theih deuh thawah khawtlang mipui vantlang tan Library din chhoh a ni tawh a. Thuziak ṭha tak tak sorkarin heng Recognised Library te tana a pek leh a semte hi chhiar lohva khup bo mai mai atan chuan a uihawmin a pamhmai takmeuh a ni.

Library din duhtawk mai lovin NGO hruaitu Branch, Section, member-te hian lehkha chhiar uar turin hma hruai a ngai hle mai. Public Library Day hi khawtlang mipuite tan Library lama min ṭhanharhtirtu a nih ngei hi a pawimawh takmeuh a. A bik takin NGO lian ber YMA te hian mahni Branch chhungah ṭheuh Public Library day pual denchhen hian Library tihhmasawnna tur kawng 2/3 tal chhar chhuah or duanchhuah tum theih nise a va lawmawm dawn em. Branch hrang hranga NGO enkawl Library te hi a enkawltu Branch hruaitute thuneihna leh enkawlna hnuaia awm an nih avangin Library enkawl ṭhat leh enkawl ṭhat lohah mawh an phur nasa hle a ni.

Library service tiṭhang lian chho zel tur hian mitin hian mawh kan phur tlang vek a ni. Kum 2015-2016 kum kal ta khan Govt. Recognised Rural Public Library-ten Library reports an thehluhna aṭanga a lan dan chuan Mizoram chhunga District 8 huam chhunga NGO Branch Library sorkar recognised-te lehkhabu collection neih zat chu nuai 10 chuang a ni a. Library member neih zat belhkhawm chu 55500 (Singnga leh sangnga zanga) vel a ni a, thla tina Library tlawhtu zat belhkhawm chu 79000 (Singsarih leh sangkaw) chuang an ni a. Kar khat chhunga lehkhabu hawh chhuah zat belhkhawm chu 42900 (singli sanghnih zakua) vel a ni bawk.

Report-a a lan danin Library puala NGO-in Library building an neih zat belhkhawm chu 270 vel a ni bawk.

Tin, tuna sorkar enkawl Public Library panga te lehkhabu collection neih zat chu hetiang hi a ni 1) Mizoram State Library 59399, District Library Aizawl - 43386, Kola-silb - 23673, Champhai - 27646, Lunglei - 36640 a ni a, an vaia lehkhabu neih zat belhkhawm chu 1,90,744 books a ni. Heng sorkar Library-te member neih zat chu hetiang hi a ni- State Library 5819, District Library Aizawl - 4290, Kolasib - 1654, Champhai - 1726, Lunglei - 1818 an ni a, heng sorkar enkawl Library member belhkhawm chu 15307 a ni.

Tichuan, Mizoram chhunga Public Library kan neih State, District, NGO Govt. Recognised Library te lehkha-bu neih zat belhkhawm chu 1191000 approx. a ni a, Library member neih zat belhkhawm hi 58200 approx. niin kum khat chhunga sorkar Public Library visitor neih zat chu average-in 30700 a ni.

NGO sorkar recognised Library visitors neih zat chu 9,48,000 approx. a ni.

Mithiamten “People’s Univeristy’ tia a sakhming an sawi Public Library chi hrang hrang State Library, District Library leh Sorkar recognised NGO enkawl Rural Public Library-te hian Public Library Day ni 22nd May lo inher chhuak tur Pathianni hi Public Library Day anga hman a remchan dawn loh avangin ni 21 emaw ni 23 May 2016 hi Public Library Day Mizorama a ṭum hnih hmanna ni atana hmang tur leh hemi ni denchhen hian kan bul hnai Public Library te tlawh ṭheuh turin ṭan la ila. Public Library Day i hmang
ṭangkai ang u.

Public Library Day vawi 2-na hi Mizoram State Library Reading Hall-ah ni 23 May 2016-ah programme tawi te buatsaiha hman tum a ni a. Khuallian atan Art & Culture Secretary Pi Thanhliri Pachuau beisei a ni. Ni 23/5/2016 a State Library, New Secretariat Complex, Khatla rawn tlawhtute tan thingpui in tur buatsaih tum a ni a. Mi tin huap zo ‘Public Library' chi thum Mizoramin kan neihte State Library, District Library, Sorkar Recognised NGO Rural Public Library-te hi belbulin hman ṭangkai ṭheuh hi mitinte chanvo leh mawhphurhna a ni .

- Lalramliana,

State Librarian,

Mizoram State Library