Mipui tawrhna pawisa lo
Commercial Vehicle Joint Action Committee (CVJAC) tih hming invuahte chuan Mizoram pum-pui tibuaiin sorkara lungawi lohna an lantir mek a. Hetianga an tih avang hian sumdawnna lirtheite hi an tlan lo a, mipuiin an tuar nasa a, damlo, zirlai, chhiat ṭhat thila zin turte tan harsatna an siam a, mirethei City Bus vela veivak
ṭhinte hi a tuar nasa ber an nih ka ring.
Zin kawnga thing-pui dawr leh hotel neituten an tuar a, taxi-a chhungkaw chawm tak taktuten an tuar a, ni khat din avangin daily-a rawih ṭhin driver-te hlawh a kiam a, tuna an kal dan en hi chuan lirthei neitu sumdawng hausa tawh tan chuan ni 10 din pawh hi chuti vakin a pawi lo. Lirthei neitu rau rauvah pawh nitina eizawn ngaite leh a hausa ve tak tak lo chinin an tuar nasa a, pawl hruaitute chin hi chu a rethei thei an ni bawk si lova, hengte hi chhut a ngai a ni.
Kei chu an thil demand lam hi chiang takin ka zuk chhui ve lova, hetia ka thlir mai hi chuan anmahni hmasialna vek, an tana ṭha tur vek an nawr a, a nawrna hmanruaah mipui tawrhna an hmang niin ka hmu. Chhiah te hi a sang deuh a nih pawhin Mizorama motor chuan man sanzia kan hria a, an la hlawk zawk thoin ka hria.
Aizawla taxi chuan man san em em dan hi mak ka ti khawp mai kei chu, ka zin kual ve nual tawh a, Aizawl aia taxi rate to hi khawpui dangah ka la hre fuh ve lo. Aizawlah hian auto rickshaw a awm ve si lova, kan hman theih chu taxi chauh a ni a, Chanmari aṭanga Millennium Centre-a kal dawna Rs 50 la duhtute a nia tuna nuarte hi - kei chu an rate hi a to uchuak ka ti a ni.
Kan Maxi Cab te rate pawh hi a to. Aizawl to Guwahati rate aṭang hian chhut ta ila khaw tin Sumo chuan man hi a to uchuak vek a ni zawk lo maw? Kan City Bus chuan man te reng hi a puang chak asin, hei zawk hi CVJAC hian ngaihtuah ve se, anmahni hamṭhatna tur nawr vang maia mipui tawrhna thlentir an pawisa lo lutuk leh hmanni lawka an nawrh hnua hetia an ti leh kher hi chu kei ka support miah lo.
Sorkar pawh hian a tawlh theihna a neih chuan nawrh kher hi nghak chhuak lo bawk se a ṭhain ka hria. An din tlang ngam dawn a nih erawh chuan ding tlang se, tichuan motor chuan man pawh a san belh tawh lo ang chu. An din tlang ngam loh chuan nakin lawkah motor chuan man tihsan phutin an la nuar leh ang a, sorkar bawk hi a buai leh ka ring deuh tlat.
Sorkar leh motor neitute inkar thu avangin mipuiin an tuar a ni zawk mai lo maw? tunlai Zoram dinhmun hi.
- Lalzarmawia