Indicator light leh high beam

Aizawl-a lirthei a pun chakzia inhrilh tur hian data neih a ngai lo, motor number aṭang hian a lang reng. Lirthei registration number hi alphabet A-Z hmangin, 01 aṭanga 9999 thleng a kal ṭhin a, mimala ka lo chhinchhiah danin nikum October thla vel khan Z hi a tawp a ni. Tunah hian AB a kal leh mek a, lirthei registration number ka hmuh thar lam berah chuan alphabet AB hian 6000 a kai leh tawh a ni.

Heti a nih chuan K registration chin hi la dam angin ngai ta ila AA registration thleng chauh chhut pawhin Aizawlah hian lirthei nuai khat leh singruk chuang a awm a ni. Chu chu kan kawngpui hian a zo chiah em tih chu chhut tham fe a awm ang. Kan kawngpui hi mi zawng zawng tana siam a ni a, kea kal leh lirthei khalhtute tan pawh siam a ni vek a ni. Ka ta bik a ni lo a, i ta bik pawh a ni hek lo. Midang tana harsatna kan siam loh nan lirthei khalhtute hian hei hi hre thar leh teh ang u.

Lirthei hian mihring tan awlsamna nasa tak min siamsak a, mahse, kawngpuiah hian midang tan harsatna a siam thei bawk. Lirthei zawng zawngah hian indicator light a awm vek a, hei hi lirthei khalhtute'n kan hmaa mi emaw, kan hnunga mite tana kan lirthei khalh lai kan tlanpuina lam tur hriattirna a ni. Hnunga mite tan min pel rawh tihna a ni lo a, hmaa mite tan indicator ka pek lohna lamah tlan rawh tihna pawh a ni lo. 'Heti lamah hian ka tlan dawn e' tihna a ni. Chuvangin lirthei khalhtute hian midang danga speed laklawh, balance laklawh, tlan dan leh kal dan tur laklawh kan siam loh nan; kan ding dawn emaw, kan peng dawn emaw a nih chuan indicator light hi dik takin pe ang u.

Mihring kan danglam ṭheuh angin lirthei khalhtu pawh mi chi hrang hrang kan awm a, dawih deuh leh lirthei ngam deuh te, khalh thiam ṭantir leh hnehsawh em em tawh te. Tin, phai lam ang lo takin kawng chhuk chhoah kan tlan tam a ngai. Kan sawi tak ang khian, kan dinhmun inan lohna avangin kan lirthei khalh danah pawh danglamna a awm ngei ang, mahse, hei erawh kan hriat tlan a ṭha e; kan lirtheiah hian a head-light hi chhun sang leh chhun hniamin a dah theih a, kan tlanna a zirin ṭangkai hun pawh a danglam, zanah chho zawnga kan tlan a nih erawh chuan chhuk zawnga min tawktute tan kan lirthei headlight high beam hi a hnawk hle tih hi. Zana chho zawng tlan kan nih chan kan lirthei high beam hi kan on duh a nih pawhin, min tawk zawnga lirthei tlan a awm a nih chuan off hram hram ang u. Kan inchhun khalhna lamah chetsual pawh a hlauhawm zozai ta e.

Paula'n Korinth khuaa mite hnena heng zawng zawngah hian hmangaihna a ropui ber tih a chah ang deuh khan, midang tana harsatna thlen loh piah lamah, Aizawlah lirthei khalhtute zawng zawng kan lo him tlan zawk nan khing zawng zawng piah lamah khian, kawng a kawi a nih chuan kan hmaa lirthei pelh hram tum lo hram teh u.

- Lalrinfela