Digital media/journalism

Social media chu Mizo mipuiin kan hrethiam tlangpui tawh a, sawifiah a ngai tawh lo. Tunah chuan digital media/journalism kan sawi lar leh ta hle a, Mizoramah pawh kan uar viau tawh a, phai lam media liante pawhin an ti nasa lehzual a, mainstream/traditional media (chanchinbu leh TV/radio news) ti tel miah loa digital media chauh ti leh eizawnna atana hmang pawh mi eng emaw zat an awm.

Digital media hi social media nen a inang thuak a, internet leh online kaltlanga thu thar thehdarh hi a ni mai a. Website-te pawh a huam tel a, Mizo zingah phei chuan digital media kan sawi hian website-a thuthar leh thlalak thehdarhte hi kan kawhtir deuh berin a lang. Professional journalist ni lote pawhin an khawih nasa a, traditional media ti tel loa digital media chauh khawih professional journalist eng emaw zat an awm bawk.

Website-a chanchin thar thehdarh ṭhin zingah journalism-a tawnhriat nei ṭha tawh tak tak mi eng emaw zat an awm a, traditional media ṭhenkhat zingah pawh digital news tichhuak tel tam tak an awm. Mizorama digital news (website news)-te hi a rintlak tlangpui.

Digital/social media ṭhatna

Digital media ṭhatna chu, mipui chhiar leh hmuh theih tura an tichhuak zung zung thei hi a ni. Hunbî a awm lo a, engtik hunah pawh tihchhuah theih a ni a, zanlaia thil thleng pawh zanlaiah vêk tihchhuah theih a nih avangin a rang em em. Traditional media kan tih - chanchinbute leh radio/TV-te erawh chuan chhuah hunbi an nei a, duh hun hunah chanchin thar puan chhuah theih a ni lo a, digital media aiin a muang zawk.

Digital media hian a thleng thui a, traditional media aiin mipui a háwl kim zawk. Aizawla chanchinbu chhuakte hi thingtlang lamah hmuh tur a tam tawh lo a, digital/social media a chak tawh êm vang a ni ber. Chanchinbu thlen phâk lohnaah pawh digital media chu a thleng thei a, hmun kilkhâwr zawka mite'n thuthar an hriatna hnár ber pakhat a ni tawh. Tihchhuahna atan sum sên belh a ngai lo a, 'production cost' ngai miah loin chanchin thar a tihchhuah char char theih a; sum pawh lak luh theihna a ni.

Digital media inenfiahna tur

Mizoram bikah chuan traditional media-te aiin digital media-te hian chanchin thar leh a kaihhnawih thilte tihchhuah turah an duhtui lo deuh niin a hriat a, an thu ṭhenkhat pawh a puitling lo deuh zawkin a lang. Chanchinbu leh TV channel-te'n chanchin thar atana puan tlâka an ngaih loh, digital media-in an tichhuah si tam tak a awm tawh.

Digital media-te hian chanchin thar thupui (caption) an duhtui lo deuh bawk. Mipui mit la tur, mi hmuh leh chhiar châkawm tur chi thupui (clickbait) an uar deuhin a lang. Kum 2000 hma lamah khan Mizorama chanchinbu (magazine)-te'n a káwmah chhiar châkawm deuh tur thupui hman an chíng a, a chhung thu en lâwk theih lohin an chilh tlat ṭhin. A káwma thupui an dah a pui viau laiin, a chhung thu erawh a ho leh viau si ṭhin a nih kha. Khatiang chi kha tunlaia Mizorama digital media-a thu leh hla kan hmuh ṭhinah hian a awm fo. Youtube-ah an uar lehzual. Mizo journalist-te'n an kalsan tawh, mipui pawhin ṭhing an tih leh an nuihzat ṭhin angah khan tam tak chu an lêt leh mek a ni.

Chanchin thar bakah, thu leh hla thehdarhah digital media-te hi thupui an siam danah an fimkhura an uluk lehzual a ngai àwm e. Mi ṭhenkhatin tuna an tih ṭhin anga an tih reng chuan mipuiin an ning thuai ang a, an nuihzat thuaiin a rinawm. Rintlak taka an kal a, tlo tura an ṭan sauh sauh a ngai ang.

Traditional media tan chona

Tunlaiah digital media a lâr tawh a, Mizorama chanchinbu ṭhenkhat chu a ei chhe mek. Chinchinbu ṭhenkhat tan chuan chanchinbu hard copy tihchhuah a harsa ṭalh tawh. Chanchinbu la chhuak ve tho si, mipuiin an lâk tawh loh leh chhiar ngai tawh lêm loh a awm nualin a rinawm a; chanchinbu ṭhenkhat phei chu an tàwp phah hial a ni thei.

Digital/social media chak tak, mipui hnen thleng nghal zung zung thei a lâr chho mek hi do ngawt chi a ni lo a, do hneh chi pawh a ni lo. Chuvangin, traditional media-te leh professional journalist-te an ṭan lehzual a ngai a, ṭan phah nan leh taimâk phah nan an hmang tur a ni ang. Chanchin thar bakah thu leh hla ṭha, digital media-te'n an tihchhuah ve loh tur nei turin kawng an zawn thiam a ṭul a, kua a hreuh belh zel a ngai ni.

- K Zothanpara