I lirtheiah mud-guard a ṭha em?

Fûr a inṭan chho leh ta. Fûrah hi chuan ruah a sûr duh em em a, kan tuidûl leh viau dawn. Kawngpuite a huh ang a, kawngpuia tuihâwk a luan dûl dûl cháng a awm ang a, kawngpui hmun ṭhenkhatah chuan tui nu leh bawlhhlawh tak tak a tling piau puau ang. Lirthei, a bikin bike khalhtute fimkhur a ngai.

Ruah sûr lai leh kawngpui tuihâwk leh tui tling a awm laia lirthei i khalh a nih chuan kawngpui sîr vela awmte leh kalte i chìl per thei tih hriain fimkhur ang che. Tui awmna lai i thlen chuan a bul hnai, lirtheiin i chìl per phâkah mi an awm em, tih en ṭhin la, an awm a nih chuan tlân muang ṭhin rawh. Mihring an awm chiah loh a nih pawhin, tui chîl per avanga mi tana thil pawi thei a awm leh awm lohte pawh ngaihtuaha en tel a ṭha viau.

Two wheeler, a bikin bike hoah hian a hnung lam ke chunga mud-guard awm lo (thlawn daih) leh tê lutuk a tam hle. Chutiang bike hnunga ruahsur laiin tlân a hrehawm hle a, bike ke hnung lamin tui, tuihâwk nu tak a phiah perin a hnunga mite a per ṭhin. Intihthinrim ṭanna a ni thei.

Mudguard awm lo bike (lirthei dang pawh) ruahsur laia i khalh chhuak a nih chuan i fimkhur a ngai; mi tan harsatna i siam thei a ni tih hriat a ṭha. I hnunga tlânte mai bakah, bike hnunga chuang (pillion rider)-te ngei pawh a phuh per pha ṭhin a, i mi phurhte tan ngei pawh a ṭha lo thei a ni. Mudguard awm lo bike-te chu ruahsur lai chuan chak taka tlân loh a ṭha tihna a nih ber chu.

A hrim hrimah lirtheite hi a siamtu company-te'n a ṭha ber tur anga an siam lo tihdanglam ṭhin hi a ṭha lo thei a; lirthei kaihhnawih dan pawhin a phal lo. Mudguard thlawn hi dan bawhchhiatna a ni.

Traffic thuneitute pawhin mudguard thlawn phal a nih loh thu hriattirna an lo chhuah tawh ṭhin a, chuti chung chuan mi tam takin an zawm ṭha duh chuang lo. Traffic police-te'n mudguard thlawn vanga lirthei mante pawh an lo nei tawh ṭhin niin an sawi.

Mudguard chungchanga Traffic thuneitute'n hriattirna an lo chhuah tawh hi a la ding rengin a rinawm a. Tunah fûr a inṭan chho leh ta bawk nen, fimkhur a ṭul hun tak kan thleng chho leh ta a. Traffic police-te pawhin mudguard nei loa bike tlan a awm leh awm loh en zui ṭhin se a ṭha ngawt ang.

- Zoramchhana