2015 -2016 HSLC & HSSLC result kha
Tunah chuan 2015-16 zirna kuma HSLC & HSSLC Result chu a chhuak fel ta a, a pumpui result han thlir khan a ṭha thawkhat kan ti thei awm e. Amaherawhchu, han thlir chian chet chet erawh chuan kan sorkar sikulte hi an ti ṭha vak lo niin a lang a, tih laiin Private sikulte leh Deficit sikulte erawh thung chu an ti ṭha viau leh lawi si a. Mizoramah Deficit sikul tlemte a la awmin, khang sikulho khan an thawh hlawk zek mai kha an fakawm hle.
Kumin chu MBSE lamin sikul tinte hnenah selection exam neih a phal tak loh bur avangin khawi sikul mahin selection test an nei ngam ta lova, chuvangin an zirlai class X leh class XII registration a lang zawng zawngte chu a nihna ngai ngaiin an regular candidate tir vek a ngai ta a. Khatiang a nih avang khan kumin HSLC leh HSSLC result hi chu sikul tinte hlimthla dik tak lanna a tih theih mai awm e. Result aṭang hian sikul ṭha leh ṭha lo emaw result nei ṭha leh ṭha lo emaw chu chiang takin a lang theiin a lang.
Engpawh nise sikul ṭha leh ṭha lo kan tehna hi a inang lo fur theiin a rinawm a. Khawpui sikul changkang tak tak, a bikin St. Paul’s HSS te, First Division a pass lo chu admit lo mai pawh ni lova, admission pawh a dila dil ngamna hauh loh sikulte hi chu result
ṭha ngei turah dah nghal mai ila.
Heng ang sikulte hi chu sikul ṭha an ni a, tun hma lam daih aṭanga an kalphung leh thawh rim rah avanga hetiang dinhmun sanga ding thei hi an niin, an chhuanawmin an ngaihsan awm a, public sikul kan tih mai, mipui nawlpui lenna sikul an ni ve vak lo pawh kan ti thei awm e. Chuvangin, sikul nawlpui sawi zingah pawh telh ve ta lo ila a ṭhain a rinawm.
Tunah chuan van-tlang sikul, division sang leh hniam pawh sawi lova admit theih vekna sikul, kan ram sikul tam berte chanchin hi sawi ta ila. An tan chuan kumin result hi sikul ṭha leh
ṭha lo tehfung lian tak a ni thei awm e.
Private leh Deficit sikulte pass an nei tam zawk tlat mai kha thil mak tak chu a ni! A zirtirtute sorkar sikul aia hlawh tlem zawk leh dinhmun chhe zawk si-te kha a thawk rim leh result nei ṭha an ni zawk tlat. Kan Bible chuan kan thawh rah ei tura min tih laiin sorkar sikula zirtirtu tam tak hi chuan an thawh rah aia tam an ei a nih hmel.
Private leh Deficit sikul zirtirtute hian an naupangte over class an ti, Saturday chawlh pawh nei fumfe hman loin an thawk a, test chi hrang hrang an neih pui a, an theihna zawng zawng hmangin an zirtir a ang viau a ni.
Hetia han sawi takah chuan heng St. Peter’s HSS, Chhingchhipa mite angte hi class room-ah pawh zirtirtute hi an ṭhu hman lo a, period khat chhung chu an ding tluan chhuak parh parh mai nia! Sikul result pawh a ṭha leh viau ṭhin!
Mize chi hrang hrang, distinction aṭanga third division leh simple pass thleng pawha lo admit fai vek thei, an result han thlir a, topper aṭanga division chi hrang hrang nei a, fail result thleng nei
ṭhin sikul angte hi kei ka hmuh dan chuan sikul ṭha an ni.
- Patrick Z, Chhingchhip